Read Tedim Chin JOHAN 14 Bible Online

JOHAN 14 - Tedim Chin bible

JOHAN 14

¹Tua ciangin Jesuh in a nungzuite kiangah, “Note lunghimawh kei un. Pasian um unla, kei zong hong um un.

²Note’ om nading mun a bawlkhol dingin a pai ding ka hi hi. Ka Pa’ inn sungah om nading mun tampi om hi. A om lo ding hileh hih bangin thu ka hong gen kei ding hi.

³Kei va pai-in note’ om nading mun ka va bawlkholh khit ciangin keima omna munah note na hong om theih nadingun note a hong la dingin ka hong paikik ding hi.

⁴Ka pai nading mun tuntheih nading lampi na thei uh hi,” a ci hi.

⁵Tua laitakin Thomas in, “Topa aw, na pai nading mun thei lo ka hih manun a lampi ding bangci theih ding ka hi uh hiam?” a cih ciangin

⁶Jesuh in ama kiangah, “Keimah in Lampi ka hi a, Thuman, le Nuntakna zong ka hi hi. Kei hong suang loin Pa kiangah kuamah tung thei lo ding hi.

⁷Note in kei na hong theih nak-uhleh ka Pa zong a thei na hi uh hi. Tua ahih ciangin tu a kipanin Pa thei-in a mu khinta na hi uh hi,” a ci hi.

⁸Tua ciangin Filip in, “Topa aw, Pa hong lak lecin ka lung uh kim pah ding hi,” a cih leh

⁹Jesuh in, “Filip aw, hih tanvei omkhawm khin napi kei hong thei nai lo lai na hi hiam? Kei a hong mu khinte in Pa a mu khin ahih manin bang hangin, ‘Pa hong lak in,’ ci thei na hi hiam?

¹⁰Kei pen Pa tawh pumkhat ka hih lamtak um lo na hi hiam? Note tungah ka hong gen thute keima thu bek tawh a hong gen ka hi kei a, kei tawh a om Pa Pasian in na semin a hong gen ahi hi.

¹¹Pa tawh pumkhat ka hihna thu hoihtakin hong um un. Na hong up nai kei uhleh zong ka nalamdang bawlnate hangin hong um beek un.

¹²A mantakin ka hong genin-ah, kei hong umte in keima sep nate mah sem ding hi. Pa kiangah kei ciah ding ka hih manin keima sep sangin zong a lianzaw sem lai ding uh hi.

¹³Tapa’ hangin Pasian’ pianzia a kilat theih nadingin keima min paulamin na hong nget khempeuh uh ka hong pia ding hi.

¹⁴Keima min paulamin na hong nget nak-uhleh ka hong pia ding hi,” a ci hi.

¹⁵Tua ciangin Jesuh in, “Kei na hong it uhleh ka thupiakte zong na zui ding uh hi.

¹⁶Keimah in Pa kiangah ka ngen ding a, note tawh a omkhawm tawntung dingin Thuman a hong lak Kha Siangtho, note hong Huhpa ding a hong pia ding hi.

¹⁷Leitung mite in tua Kha Siangtho mu thei lo, theithei lo uh ahih manin sang thei lo ding uh hi. Ahi zongin note sungah tua Kha Siangtho hong om ding ahih manin note in na thei ding uh hi.

¹⁸“Note a cimawh dingin ka hong nusia kei ding hi. Note kiangah ka hong paikik ding hi.

¹⁹Tawlkhat khit ciangin leitung mite in kei hong mu nawn lo ding uh hi. Ahi zongin kei ka nuntak mah bangin note zong nungta ding na hih manun note in kei na hong mu ding uh hi.

²⁰Tua hun ciangin Pa sungah kei ka omna thu, le note sungah ka hong om mah bangin keima sungah na omna thu uh na thei ding uh hi.

²¹Keima thupiakte sangin a zuite in keimah hong it ahi uh hi. Kei hong it mite pen ka Pa in zong it ding a, keimah in zong itin amaute tungah ka kilang ding hi,” a ci hi.

²²Tua ciangin Judas Iskariot ahi lo Judas dang khat in, “Topa aw, leitung mite tungah kilang loin kote tungah bangci-in hong kilangtuam thei ding na hi hiam?” ci-in a dot ciangin

²³Jesuh in, “Kei hong itte in ka thu zui ding uh hi. Ka Pa in zong it ding a, ka nihun tua mite kiangah pai-in amaute tawh ka omkhawm ding uh hi.

²⁴Kei hong it lote in ka thugente zui lo ding uh hi. Tu-a na zak uh thute pen keima thu hi lo a, kei hong sawl Pa Pasian kiang panin a hong pai thu ahi hi.

²⁵“Note tawh ka hong omkhawm hun sungin hih thute a hong gen ka hi hi.

²⁶Ahi zongin Pa in keima tangin a hong sawl ding Huhpa Kha Siangtho a hong tun ciangin note tungah thu khempeuh hong hilh ding a, note tungah ka hong gensa thu khempeuh zong hong phawksakkik ding hi.

²⁷Note tungah keima neih bang lungnopna ka hong pia ding hi. Tua ka hong piak ding lungnopna pen leitung mite in a piaktheih a kip lo lungnopnate pawl hi lo hi. Tua ahih manin lau kei unla, zong lungkham kei un.

²⁸‘Ka va paikhia ding a, ahi zongin note kiangah ka hong paikik ding hi,’ ka cihna thu na za khin uh hi. Kei sangin a lianzaw Pa Pasian kiangah a va pai ding ka hih manin kei na hong it nak-uhleh ama kiangah ka paina hangin na nuamzaw ding uh hi.

²⁹A thu hong pian’ taktak ciangin ka thugente na uptheih nadingun a pian’ ma-in a hong genkhol ka hi hi.

³⁰Tu-in hih leitung a ukpa hong tungta ahih manin note kiangah thu kong gen man nawn kei ding hi. Amah in keima tungah aana nei lo hi.

³¹Ahi zongin leitung mite in Pa Pasian ka itna thu a theih nadingun Pa’ vaihawmna bangbangin a gamta ding ka hi hi. Tua ahih manin kithawi un; hih lai mun panin paikhia ta ni,” a ci hi.