Read Tedim Chin JOHAN 15 Bible Online

JOHAN 15 - Tedim Chin bible

JOHAN 15

¹Tua ciangin Jesuh in, “Kei pen leenggui taktak ka hi a, ka Pa pen leenggui lonei pa ahi hi.

²Amah in gah a nei lo ka hiang khempeuh satkhia a, gah a nei hiangte ahihleh a gah semsem theih nadingin a puah hi.

³Note tungah ka hong thugennate hangin note a siang na suak khinzo uh hi.

⁴Kei tawh hong kizom paisuak le-uhcin kei zong note tawh a kizom paisuak ka hi ding hi. A hiang pen a gui tawh kizom kei leh gah a gah theih loh mah bangin note zong kei tawh na kizop kei uhleh gah na gah thei kei ding uh hi.

⁵“Kei pen leenggui ka hi a, note pen a hiang na hi uh hi. Note in kei tawh loin bangmah hih thei lo ding na hih manun kei tawh a kizomte in gah tampi na gah ding uh hi.

⁶Kei tawh a kizom lo mite pen leenggui hiang bangin kipaai khia-in keutum hi. Tua bang hiangte meikhuk sungah kilawnin a kangtum hi.

⁷Kei tawh na hong kizop uh a, note sungah ka thu a om nakleh na deih peuhpeuh uh hong ngen le-uhcin hong kipia ding hi.

⁸Gah tampi gah le-uhcin ka Pa’ minthanna a kilangsak na hi ding uh a, keima nungzui na hihna uh kilang ding hi.

⁹Ka Pa in kei hong it zahin note hong it ka hih manin keima hong itna sungah om un.

¹⁰Ka Pa’ hong thupiakte zui-in ama itna sungah ka om mah bangin note in zong ka thupiaknate na hong zuih uhleh ka itna sungah a om na hi ding uh hi.

¹¹Note hangin kei ka lungdam theih nading le note’ lungdamna a cingtaak a suahtheih nadingin hih thute a hong gen ka hi hi.

¹²“Note tungah ka hong piak thu in: Note ka hong it zahin note khatlekhat na ki-it un.

¹³Lawmte’ tang ding sih ngamna sangin lawmte itna a lianzaw om nawn lo hi.

¹⁴Ka hong thupiak bangin na gamtat uhleh ka lawmte na hi uh hi.

¹⁵Nasemte in a tote’ nasepna bangmah thei lo ahih manin note pen nasemte ka hong ci nawn kei ding hi. Ka Pa’ tung panin ka zak thu khempeuh note kiangah hong genkhin ka hih manin note, lawm, ka hong ci zaw ding hi.

¹⁶Note in kei na hong teel kei uh a, ahi zongin keimah in note ka hong teel a, note va pai-in a kimang tawntung ding gah a gah dingin ka hong seh hi. Tua ahih manin keima min suangin Pa kiangah na nget peuhpeuh uh hong pia ding hi.

¹⁷Tua hi a, note ka hong thupiak in: Khatlekhat na ki-it un, cihna ahi hi.

¹⁸“Leitung mite in note hong muhdah leh kei a hong mudah masa ahihna thu na thei un.

¹⁹Hih leitung mite tawh a kipawl hi le-uhcin leitung mite in amau pawlte hong it ding hi. Ahi zongin hih leitung mite lak panin note ka hong teelkhia a, amaute tawh kipawl nawn lo na hih manun a hong mudah ahi uh hi.

²⁰‘Sila pen a topa sangin lianzaw lo hi,’ ci-in ka hong thugenna phawk un. Amaute in kei hong bawlsiat uhleh note zong hong bawlsia ding hi. Ka thugente hong zuih uhleh note’ thugente zong hong zui ding hi.

²¹Ahi zongin amaute in kei hong sawl pa thei lo uh ahih manin keima mi na hihna uh hangin amaute in hih bangin hong bawl ding uh ahi hi.

²²Kei hong pai kei-in amaute tungah thu a gen lo hi leng amaute in mawh pualo ding uh hi. Ahi zongin tu-in ahihleh a mawhna thu uhah kiphel nading a paulap ding uh bangmah om nawn lo hi.

²³Kei hong mudahte in ka Pa zong a mudah ahi hi.

²⁴Kuamah in a bawl ngei loh na lamdangte amaute lakah a bawl lo hi leng amaute in mawh pualo ding uh hi. Ahi zongin amaute in ka nalamdang bawlte mu khin uh ahih manin kei le ka Pa a hong mudah khawm uh ahi hi.

²⁵Amaute’ Thukham sungah, ‘Thu om lopi-in kei hong mudah uh hi,’ ci-in a kigelhna thu a tuntheih nadingin a hici mah ding ahi hi.

²⁶“Ahi zongin Thuman a hong lak ding Huhpa ahi Kha Siangtho ka Pa kiang panin ka hong sawl ding hi. Amah hong tun ciangin keima thu hong gen ding hi.

²⁷A kipat cil a kipanin kei tawh omkhawm na hih manun note in zong keima thu na gen ding uh hi.