Read Tedim Chin JOHAN 16 Bible Online

JOHAN 16 - Tedim Chin bible

JOHAN 16

¹“Note na pukkhak loh nadingun hih thute a hong gen ka hi hi.

²Amaute in a kikhopna uh innte panin note hong hawlkhia ding uh hi. Note hong that mite pen Pasian’ nasemin a kingaihsut ding uh hun hong tung ding hi.

³Amaute in ka Pa ahi a, kei ahi zongin hong thei lo uh ahih manin tu-a bangin note a hong bawl ding uh ahi hi.

⁴Hih bangin a hong gamtat hun uh hong tun ciangin ka hong gen thute na phawk theih nadingun a hong genkhol ka hi hi. “Note tawh hong omkhawm ngawn ka hih manin a kipattung lamin hih thute ka hong gen kei hi.

⁵Tu-in ahihleh kei hong sawl pa kiangah a ciahkik ding ka hi hi. Tua hinapi-in, ‘Koi-ah pai ding na hi hiam?’ ci-in kuamah in na hong dong kei uh hi.

⁶Ahi zongin hih thute ka hong gen ciangin na lungsim uh dah mahmah hi.

⁷A taktakin ci lehang, kei paikhia kei leng note hong Huh ding pa hong pai lo ding a, kei paikhia leng note hong Huh ding pa hong sawl ding ka hih manin kei va paikhia leng note a dingin hoihzaw tham hi.

⁸Amah hong tun ciangin leitung mite tungah mawhna thu, thuman thu leh thukhenna thu laktel ding hi.

⁹Amaute in kei hong uploh manun a mawhna uh lak ding a,

¹⁰Pa kiangah pai ding ka hih manin kei na hong mu nawn kei ding uh hi, ka cihna thu a manna lak ding a,

¹¹hih leitung a ukpa pen thukhenna a thuakkhin ahihna thu zong lak ding hi.

¹²“Ka hong gen ding tampi tak omlai hi; ahi zongin hong gen lai leng note a dingin tamlua ding hi.

¹³Tua ahih manin thuman hong lak ding Kha Siangtho hong tun ciangin thu khempeuh a manin hong hilh ding hi. Ama ngaihsuttawm thu hong gen ding hi lo a, ama tungah a kigen thute le a hong tung ding thute a hong gen ding ahi hi.

¹⁴Amah in keima gen ding thute note tungah hong gen ding ahih manin Pasian’ pianzia ka neihna hong kilangsak ding hi.

¹⁵Ka Pa’ neihsa khempeuh keima-a’ suakkhin ahih manin keima gen ding thute le a gen dingin ka sawlteng Kha Siangtho in note kiangah hong gen ding hi,” a ci hi.

¹⁶“Tawlkhat khit ciangin na hong mu nawn kei ding uh a, tawlkhat khit ciangin na hong mukik ding uh hi,” a cih ciangin,

¹⁷a nungzuite pawlkhat kidong uh a, “Tawlkhat khit ciangin kei na hong mu nawn kei ding uh a, tawlkhat khit ciangin na hong mukik ding uh hi, a cihna le Pa kiangah a ciahkik ding ka hi hi, a cihnate bang a cihnopna ahi hiam?” a kici uh hi.

¹⁸Tawlkhat a cihcih pen bang a cihnopna ahi hiam, i thei kei hi, a kici uh hi.

¹⁹Jesuh in amaute’ theihnop lamtak phawk ahih manin amaute kiangah, “Note khatlekhat na kidot uh, ‘Tawlkhat khit ciangin na hong mu nawn kei ding uh a, tawlkhat khit ciangin na hong mukik ding uh hi,’ ka cihnopna a kidong na hi uh hiam?

²⁰A taktakin ka hong genin-ah, note dahin na kap ding uh a, ahi zongin leitung mite lungdam ding uh hi. Note na dah ding uh a, ahi zongin na dahna uh lungdamna hong suak ding hi.

²¹Numei in a ta a suahhun a tun ciangin na sa ahih manin a dah hi. Ahi zongin a ta a suahkhit ciangin leitungah naungek khat a piangsak khin ahihna hangin lungdamin a natna teng a mangngilh ta hi.

²²Note zong tua mah tawh na kibang ding uh hi. Note zong tu-in na dah uh hangin note tawh kimukik ding ihih manin na lung uh dam mahmah ding a, tua na lungdamna uh kuamah in hong beisak thei lo ding hi.

²³“Tua hun ciangin kei kiangah bangmah nong ngen nawn kei ding uh hi. A mantakin kong genin-ah, keima min suangin na nget peuhpeuh uh Pa in hong pia ding hi.

²⁴Tuni ciang dong keima min suangin bangmah na ngen nai kei uh hi. Tua ahih manin ngen le-uhcin hong kipia ding ahih manin na lungdamna uh hong cingtaak ding hi.

²⁵“Tuhun ciang dong hih thute thugentehna zangin ka hong gen hi. Ahi zongin thugentehna ka hong zat nawn loh hun hong tung ding a, tua hun ciangin a teltakin Pa Pasian’ thu ka hong gen ding hi.

²⁶Tua hun hong tun ciangin, Pa Pasian kiangah ka hong ngetsak ding hi, ka hong ci nawn kei ding a, nomau mahmah in ka min suangin Pa kiangah na ngenpah ding uh hi.

²⁷Bang hang hiam cih leh note in kei hong itin, Pa kiang panin a hong pai ka hihna thu um na hih manun Pa mahmah in note hong it ahihna hang ahi hi.

²⁸Pa kiang panin hong pai-in leitung a hong tung ka hi a, tu-in leitung nusia leuleu-in Pa kiang a zuankik ding ka hi hi,” a ci hi.

²⁹Tua ciangin a nungzuite in, “Tu-in thugentehna zang nawn loin a kitel takin thu na hong gen hi.

³⁰Tu-in na khempeuh na theihkhitna thu ka phawk uh a, ka theihnop uh thute kote in ka hong dot ding uh zong kisam nawn lo ahih manin Pa kiang panin a hong pai na hihna thu ka hong um uh hi,” a ci uh hi.

³¹Jesuh in, “Tu-in hong umta na hi uh hiam?

³²Note khempeuh kithehthangin na inn ciat uh zuanin kei bek na hong nusiat ding uh hun a hong tung ding hi bek loin tu-in a hong tung hita hi. Ahi zongin kei guak a hong kinusia hi lo a, Pa in kei hong ompih hi.

³³Keimah tawh na hong kipawlna uh hangin lungnopna na neihtheihna dingun hih thu a hong gen ka hi hi. Leitung gimna na thuak ding uh hi. Ahi zongin keimah in leitung nate zo khinta ka hih manin lungnuamin om un,” a ci hi.