Read Tedim Chin JOHAN 17 Bible Online

JOHAN 17 - Tedim Chin bible

JOHAN 17

¹Jesuh in hih thute a genkhit ciangin vantung lam ento-in, “Pa aw, a hun hong tungta ahih manin na Tapa in na pianzia hong kilatsak theih nadingin tu-in na Tapa’ pianzia hong kilangsak ta in.

²Bang hang hiam cih leh Tapa tungah na piak mi khempeuh tungah Tapa in nuntak tawntungna a piaktheih nadingin mi khempeuh tungah ukna aana a neih nadingin Tapa tungah na hong piaksa ahi hi.

³Nang bek a man Pasian na hihna thu le nangmah in na hong sawl Jesuh Khrih hong theihna pen amaute a dingin nuntak tawntung ngah nading lampi ahi hi.

⁴Nangmah in sep dingin na hong piak nasep khempeuh sem khinta ka hih manin leitungah na min a thangsak ka hi hi.

⁵Pa aw, leitung a kipiansak ma-in nang tawh i neihkhawm na pianzia mah tu-in nangma omna munah hong pia ta in.

⁶“Leitung mite sung panin keima khut sungah na hong piak mite tungah nangma min ka pulak khinzo ta hi. Tua mite in nangma thu mangin nangma mi hi uh a, ahi zongin keima khut sungah amaute na hong pia hi.

⁷Tu-in amaute in keima neih khempeuh nangma hong piak ahihna thu a thei uh hi.

⁸Bang hang hiam cih leh gen dingin na hong sawl thu khempeuh amaute kiangah ka gen ciangin um uh a, nangma kiang panin a pai ka hihna thu hong thei uh a, nangma hong sawl ka hihna thu zong hong um uh hi.

⁹“Amaute a dingin thu ka hong ngetsak hi. Leitung mite a dingin a hong ngetsak hi loin keima khut sungah na hong piak mite nangma mi ahih manin tua mite a dingin a hong ngetsak ka hi hi.

¹⁰Keima neih khempeuh nangma a’ hi a, nangma neih khempeuh keima-a’ ahih manin, tua mite’ hangin nangma pianzia ka neihna hong kilang hi.

¹¹Tu-in nangma kiangah kei a hong paita ding ka hih manin leitungah ka om nawn kei ding a, ahi zongin amaute a omlai ding uh ahi hi. Tua ahih manin a Siangtho ka Pa aw, nang le kei pumkhat ihih mah bangin amaute zong pumkhat ahih nadingun na vangliatna tawh hoihtakin na kem in.

¹²Amaute tawh ka omkhawm hun lai-in nangma hong piak na min vangliatna tawh amaute ka kem hi. Amaute ka hu a, a maimang ding pa simloh khat zong ka kisamsak kei hi. Tua a maimang pa lah Lai Siangtho sung thu a tun nading ahi hi.

¹³Tu-in nangma kiangah a hong paita ding ka hih manin keimah bangin amaute in lungdamna cingtaak a neihtheih nadingun leitungah ka om lai-in hih thute a gen ka hi hi.

¹⁴Amaute tungah na thu ka gen khin hi. Ahi zongin keimah bangin amaute zong hih leitung mite tawh kipawl lo uh ahih manin leitung mite in a mudah uh hi.

¹⁵Leitung panin amaute na lakkhiat ding a hong ngetsak ka hi kei a, a Gilopa’ bawlsiat nading panin na kep ding a hong ngen ka hi hi.

¹⁶Hih leitung tawh kei ka kipawl loh mah bangin amaute zong a kipawl lo uh ahi hi.

¹⁷Nangma thuman hilhna tawh amaute a siangtho nangma zat dingin na bawl in.

¹⁸Leitungah kei na hong sawl mah bangin kei zong leitung mahah amaute ka sawl hi.

¹⁹Nangma tungah thuman takin amaute zong hong ki-ap theih nadingun amaute ka khualna-in nangma tungah kei ka hong ki-ap hi.

²⁰“Hih mite a’ ding bek thu a hong ngetsak ka hi kei a, amaute’ thugenna hangin kei hong um mite a’ ding zong a hong ngetsak ka hi hi.

²¹Pa aw, amaute khempeuh pumkhat a suahtheih nadingun ka hong ngetsak hi. Nangmah in kei na hong sawlna thu leitung mite in a uptheih nadingun ei tegel pawlkhat ihih mah bangin amaute zong eite tawh pawlkhat hong hi tahen.

²²Nang le kei pumkhat ihih mah bangin amaute zong pumkhat a suah theih nadingun keima tungah na hong piak pianzia mah amaute tungah ka pia hi.

²³Leitung mite in kei na hong sawlna thu a theih nading le kei na hong it mah bangin amaute na itna thu a theihna hangun amaute pumkhat a suah taktak theih nadingun amaute lakah kei ka om a, kei tawh nang na hong omkhawm hi.

²⁴Pa aw, leitung a pianma pekin kei na hong itna hangin na hong piak pianzia a mu dingin keimah na hong piak mite zong ka omna-ah a hong pai theih nading ka deihsak hi.

²⁵A Thuman ka Pa aw, leitung mite in nang hong thei lo uh hi. Ahi zongin keimah in nang ka hong thei a, kei na hong sawlna thu hih mite in zong a thei uh hi.

²⁶Kei na hong itna zah itna mah amaute sungah omin, amaute tawh kei ka omkhawm theih nadingin amaute tungah nangma min ka gen khin a, mai lamah zong ka gen lailai ding hi,” ci-in thu a ngen hi.