Read Tedim Chin JOHAN 18 Bible Online

JOHAN 18 - Tedim Chin bible

JOHAN 18

¹Jesuh in tu-a bangin thu a nget khit ciangin a nungzuite tawh Kidron lui kantanin a pai hi. Tua lai-ah huan khat om a, tua huan sungah a nungzuite tawh a lut hi.

²Jesuh le a nungzuite tua munah pai zelzel uh ahih manin Jesuh a lehhek Judas in zong tua mun a thei hi.

³Tua ahih manin Judas zong, siampi liante le Farisi mite in a sawl galkap honkhat le biakinncing palik pawlkhat tawh hiam tawi-in lalcin leh meilah de-in tua huanah a hong pai uh hi.

⁴Jesuh in zong ama tungah a piang ding thu khempeuh theikhin ahih manin hong paikhia-in amaute kiangah, “Kua zong na hi uh hiam?” ci-in a dong hi.

⁵Amaute in, “Nazareth khuami Jesuh a zong ka hi uh hi,” a ci hi. Jesuh a lehhek Judas zong tua mihonte tawh hong dingkhawm hi.

⁶Jesuh in, “Keimah ka hi hi,” a cih ciangin amaute nungkinin a puk uh hi.

⁷Jesuh in, “Kua zong na hi uh hiam?” ci-in a dotkik ciangin amaute in, “Nazareth khuami Jesuh a zong ka hi uh hi,” a ci leuleu uh hi.

⁸Tua ciangin Jesuh in, “Keimah ka hi hi, ci-in ka hong gen khinzo hi. Kei hong zong na hih uhleh hih adangte khah lel un,” a ci hi.

⁹Hih bang a cihna pen, “Kei na hong piaksate khat zong ka kisamsak kei hi,” ci-in a thugenna a tun nading ahi hi.

¹⁰Simon Peter in namsau kuah ahih manin a namsau dokin siampi lianpen pa’ silapa a sat leh a taklam bil a satkhia hi. Tua silapa’ min Malkhus ahi hi.

¹¹Tua ciangin Jesuh in Peter kiangah, “Na namsau a paai-ah siat in. Ka Pa in thuak dingin a hong piak thu thuak lo ding ka hi hiam?” a ci hi.

¹²Tua ahih manin galkapte le a bute le Jew mi palikte in Jesuh manin hen uh a,

¹³tua kumin siampi lianpen a sem Kaiafas’ sungpa Annas kiangah a paipih masa uh hi.

¹⁴Mihonte’ tangin mi khat a sih ding kilawm zaw hi, ci-in Jerusalem khua-a Jew mi uliante kiangah thu a gen pa Kaiafas ahi hi.

¹⁵Simon Peter le a nungzui dang khat in zong Jesuh a zui uh hi. Hih a nungzui dang khat pa le siampi lianpen pa kithei uh ahih manin siampi lianpen pa’ inntual dongah Jesuh tawh a lutkhawm hi.

¹⁶Ahi zongin Peter ahihleh kong pualamah a khawl hi. Tua ahih manin siampi lianpen pa tawh a kithei nungzui dang khat pa zong va pai kikin kongcing numei a hopih khit ciangin Peter zong a tumpih hi.

¹⁷Kongcing numei in Peter kiangah, “Hih mipa’ nungzuite khat hi lo na hi hiam?” a cih leh, “Ka hi kei hi,” ci-in a dawng hi.

¹⁸Khua dam mahmah ahih manin nasemte le palikte in meihol cih a, tua mei awi-in a kiimah ding uh ahih manin Peter zong va pai-in mei awi-in amaute tawh a dingkhawm hi.

¹⁹Siampi lianpen pa Annas in Jesuh kiangah ama nungzuite thu le a thuhilhna tawh kisai thu a dong hi.

²⁰Jesuh in, “Mi khempeuh’ theihin thu ka gen tawntung hi. Jew mihonpi a kikhopna innte le Biakinn sungah thu ka hilh a, thu ka sim genna om ngei lo hi.

²¹Tua ahih manin bang hangin kei kiangah hong dong se na hi hiam? Ka thugen a za mite kiangah dong lecin ka genteng amaute in hong genthei ding uh hi,” ci-in a dawng hi.

²²Hih bangin Jesuh a pau ciangin biakinncing palikte khat in Jesuh beeng a, “Bang hangin hih bangin siampi lianpen pa tungah kampau ngam na hi hiam?” a ci hi.

²³Ahi zongin Jesuh in, “A man loin kampau khial ka hih leh ka khialhna hong lak in. Ka thugen a man ahih manin bang hangin hong beeng zenzen na hi hiam?” ci-in a dawng hi.

²⁴Tua ciangin Annas in Jesuh a kikhihsa mahin siampi lianpen pa Kaiafas kiangah a puak hi.

²⁵Tua bangin mei awi-in Simon Peter a din laitakin a kiima om midangte in, “Nang, hua mipa’ nungzuite khat hi lo na hi hiam?” a cih uhleh Peter in, “Ka hi kei hi,” ci-in a nial leuleu hi.

²⁶Tua ciangin siampi lianpen pa’ nasem, Peter in a bil a sat khiatsak pa’ behte khat in, “Huan sungah amah tawh na omkhawm lai-un hong mu hi lo ka hi hiam?” a cih ciangin,

²⁷Peter in nialkik leuleu a, tua khit phetin ak a khuang hi.

²⁸Tua ciangin Kaiafas’ inn panin gam ukpa Pilat’ omna kumpi inn-ah Jesuh a paipih uh hi. Tua hun pen zingsang tung ahi hi. Jew mite ahihleh Paisan Pawi annekna sungah kihel nuam uh ahih manin biakna vai-in a siang a suahtheih nadingun kumpi inn huang sungah lut lo uh hi.

²⁹Tua ahih manin amaute kiangah Pilat hong pusuakin, “Hih mipa na mawhsakna uh bang ahi hiam?” ci-in a dot ciangin

³⁰amaute in, “Hih mipa a gamtat a sialo hileh nang kiangah ka hong paipih kei ding uh hi,” ci-in a dawng uh hi.

³¹Tua ciangin Pilat in, “Jerusalem khua-a om no Jew mi uliante mah in paikhiatpih unla, nomau Thukham tawh kizui-in ama tungah thu khen un,” ci-in a gen ciangin Jew mite in ama kiangah, “Kote in mi thahtheih nading thu ka nei kei uh hi,” ci-in a dawng uh hi.

³²(Jesuh in ama sihna dingzia a gensa thu a tuntheih nadingin hih bangin a piang ahi hi.)

³³Tua ciangin kumpi huang sungah Pilat ciahkik a, Jesuh samin, “Nang Jew mite’ kumpi na hi hiam?” ci-in a dot leh

³⁴Jesuh in, “Nang’ lungsimah a piangtawm hong dong na hi hiam, tua ahih kei leh midangte in keima thu hong gen ahi hiam?” ci-in a dawng hi.

³⁵Pilat in, “Kei, Jew mi hong sa na hi hiam? Na Jew mipihte le na siampi liante un kei kiangah nang hong ap uh hi. Bang gamta khial na hi hiam?” a ci hi.

³⁶Tua ciangin Jesuh in, “Keima ukna pen hih leitung gam hi lo hi. Keima ukna hih leitung gam hileh Jerusalem khua-a Jew mi uliante’ khut sungah hong kipiak loh nadingin ka nungzuite in a do ding uh hi. Tua ahih manin keima ukna pen hih leitung tawh kizom lo hi,” a ci hi.

³⁷Tua ciangin Pilat in, “Tua ahihleh nang kumpi hi lo na hi hiam?” a cih leh Jesuh in, “Kumpi hi, nangmah in na hong ci hi. Hih thuman a genkhia dingin mi hong suakin leitungah a hong pai ka hi hi. Hih thuman tawh a kizom mi peuhmah in keima thugen hong zui uh hi,” a cih ciangin

³⁸Pilat in, “Thuman na cih bang ahi hiam?” ci-in a dong hi. Tua ciangin Jew mihonte kiangah Pilat va paikhia kikin amaute kiangah, “Ama khialhna bangmah ka mu kei hi.

³⁹Tua ahih manin na Paisan Pawi hun uh ciangin note a dingin mi khat ka khahkhiat a ngeina ahih manin note a dingin hih Jew kumpipa hong khahkhia leng na ut uh hiam?” ci-in a dot ciangin,

⁴⁰amaute awng gawpin, “Hih mipa khah kei in! Barabbas hong khah in!” ci-in a dawng uh hi. (Barabbas pen mi suamin thongkia khat ahi hi.)