Read Tedim Chin JOHAN 19 Bible Online

JOHAN 19 - Tedim Chin bible

JOHAN 19

¹Tua ciangin Pilat in ama kiangah Jesuh paipih sakin a satsak hi.

²Galkapte in a kumpi lukhu dingin ling vialin Jesuh khusak uh a, a kumpi puan dingin puansan a silhsak khit uh ciangin

³ama kiangah nehin, “Jew mite Kumpipa, na khansau ta hen!” ci-in hopihin a khut uh tawh a beeng uh hi.

⁴Pilat zong khatvei hong pusuak kikin mihonte kiangah, “Ama khialhna bangmah a mu lo ka hihna thu na theih nadingun note kiangah Jesuh ka hong paikhia sak hi,” a ci hi.

⁵Tua ahih manin Jesuh zong ling lukhu khukawm leh puansan silhkawmin hong pusuak a, Pilat in mihonte kiangah, “En un, hih lai-ah na mipa uh om hi,” a ci hi.

⁶Siampi liante le biakinncing palikte in a muh uh ciangin “Singlamteh tungah that in, singlamteh tungah that in!” ci-in a kiko uh hi. Pilat in amaute kiangah, “Na ut uhleh paipih unla, singlamteh tungah that un! Ke’n ama khialhna ka mu kei hi,” a cih ciangin

⁷Jew mihonte in, “Amah Pasian’ Tapa-in kigen ahih manin a kithah theih nading Thukham ka nei uh hi,” ci-in a genna uh

⁸Pilat in a zak ciangin a lunghimawh semsem hi.

⁹Tua ahih manin kumpi inn huang sungah lutkikin Jesuh kiangah, “Koi lai panin a hong pai na hi hiam?” ci-in a dong hi. Ahi zongin Jesuh in dawng lo ahih manin,

¹⁰“Hong dawng lo ding na hi hiam? Nang thahtheih nading le khahtheih nading thu ka neihlam phawk lo na hi hiam?” a cih ciangin

¹¹Jesuh in, “Pasian in nang tungah hong pia lo hileh kei tungah thu na nei het kei ding hi. Tua ahih manin nangma khut sungah kei hong apte’ mawhna lianzaw hi,” ci-in a dawng hi.

¹²Pilat in hih thu a zak ciangin Jesuh a khahtheih nading lampi zongin a hanciam hi. Ahi zongin Jew mihonte awngin kiko uh a, “Hih mipa na khah peuhmah leh Rom gam khempeuh a uk Kumpipa tawh a kipawl lo na hi ding hi. Kumpi hi’ng, a ci khempeuh pen gam khempeuh a uk Kumpipa a langpang ahi hi,” a ci uh hi.

¹³Pilat in hih bangin mite’ kikona a zak ciangin Jesuh paikhiatpih a, Hebru pau-in Gabbatha a kici Suangphahpek tunga thukhenna tokhom tungah a tu hi.

¹⁴Tua ni pen Paisan Pawi hun ding Kigin’ ni hi a, sunkim laitak hun ahi hi. Pilat in Jew mihonte kiangah, “Hih lai-ah na Kumpipa uh om!” a cih ciangin

¹⁵amaute in, “That in, that in, singlamteh tungah that in,” ci-in a kiko uh hi. Pilat in, “Na Kumpipa uh that mawk ding ka hi hiam?” a cih ciangin siampi liante in, “Rom gam khempeuh a uk Kumpipa simloh kumpi dang ka nei kei uh hi,” ci-in a dawng uh hi.

¹⁶Tua ahih ciangin singlamteh tungah thah dingin amaute’ khut sungah Jesuh a pia ta hi.

¹⁷Tua ahih manin amaute in Jesuh la-in paikhiatpih uh a, ama kikhai nading singlamteh mah puasakin Hebru pau-in Golgotha a kici Lutang Guh mualah a paipih uh hi.

¹⁸Tua lai mun panin singlamteh tungah khai uh a, ama langtuakah zong midang khat tuak mah khai-in a laizangah Jesuh a kikhai hi.

¹⁹Pilat in lai khat gelhsakin, “Jew mite’ Kumpipa, Nazareth khuami Jesuh,” cisak a, singlamteh tungah a suangsak hi.

²⁰Jesuh a kikhaina mun pen Jerusalem khuapi tawh kinai ahih manin Judea gammi tampi in hih lai kigelh a sim uh hi. Tua lai pen Hebru lai, Latin lai, le Grik lai-in a kigelh hi.

²¹Tua ciangin Jew siampi liante in Pilat kiangah, “‘Jew mite’ Kumpipa,’ ci-in gelh kei inla, ‘Hih mipa in Jew mite’ kumpi ka hi hi, ci hi,’ ci-in gelh in,” a cih uhleh

²²Pilat in, “Ka gelhsa pen ka gelhsa bangbangin kip hi,” ci-in a dawng hi.

²³Galkapte in singlamteh tungah Jesuh a khai khit uh ciangin a puante la uh a, khenkhat ciatin a ngah dingun khen li a suah uh hi. Mong a nei lo, a kiphan a puantualpi zong a la uh hi.

²⁴Ahi zongin amaute in, “Hih puan balkek kei ni. A ngah ding i theih nadingin ai san ni,” a kici uh hi. Lai Siangtho sungah, “Amaute in ka puante hawm uh a, ka puantualpi ngah nadingin ai a san uh hi,” ci-in a kigelhna a tun nadingin hih bangin galkapte a gamta ahi uh hi.

²⁵Jesuh’ singlamteh gei-ah ama nu; ama nuno ahi, Klopas’ zi Mary; le Magdala khuami Mary a ding uh hi.

²⁶Jesuh in ama nu le a it a nungzui pa a dingkhawm a muh ciangin a nu kiangah, “Nu aw, tua lai-ah na tapa om hi,” a ci hi.

²⁷Tua ciangin a nungzui pa kiangah, “Na nu tua lai-ah om hi,” a ci leuleu hi. Tua ahih manin tua hun a kipanin nungzui pa in ama inn-ah Jesuh’ nu Mary a kem hi.

²⁸Tua hun ciangin Jesuh in na khempeuh kicingta hi, ci-in thei ahih manin Lai Siangtho sungah a kigelh thu a tuntheih nadingin, “Ka dangtak hi,” a ci hi.

²⁹Tua lai-ah beel khat dimin leenggahzu-hau om ahih manin amaute in tua sungah tuihupna diahin puknah hiang dawnah a koih khit uh ciangin Jesuh’ kamah a va tahto uh hi.

³⁰Jesuh in tua leenggahzu-hau ciamin, “Man khinta hi,” a cih khit ciangin a lu puksukin a si ta hi.

³¹Tua ni pen Kigin’ ni hi a, a zing ciang Sabbath ni thupi diak ahih manin tua ni-in singlamteh tungah a luangte a omlai ding deih lo uh ahih ciangin Jerusalem khua-a Jew mi uliante, Pilat kiangah va pai-in a khete uh kuaitanin a luangte a lakkhiat nadingun a ngen uh hi.

³²Tua ahih manin galkapte hong pai uh a, a tuah masak pa uh a khe a kuaihtansak khit uh ciangin a langkhat a om pa a’ zong a kuaihtansak uh hi.

³³Ahi zongin Jesuh’ khe kuaitan dingin a kithawi uh ciangin amah a na sihkhitna thei uh ahih manin a khe a kuaihtansak nawn kei uh hi.

³⁴Ahi zongin galkapte khat in a teipi tawh Jesuh’ pangpi a sut leh sisan le tui hong leengkhia hi.

³⁵(Note in na uptheih nadingun hih thupiang a mu pa in ama muhna bang a hong gen ahi hi. Ama thugente a man thu hi a, a gen pa in a mantaktak a gen ahihna thu zong a thei hi.)

³⁶Lai Siangtho sungah, “Ama guhte khat zong kitan lo ding hi,” ci-in a genna thu a tuntheih nadingin hih bangin a piang ahi hi.

³⁷Tua banah Lai Siangtho mun dang khatah, “Teipi tawh a sut pa uh a en ding uh hi,” na kici lai hi.

³⁸Tua ciangin Arimathea khuami Josef in Jesuh’ luang a lakkhiat theih nadingin Pilat kiangah va pai-in a ngen hi. (Josef i cih pen Jesuh’ nung a zui khat hi a, ahi zongin Jerusalem khua-a Jew uliante a kihtakna hangin a simzuih khat ahi hi.) Josef in Jesuh’ luang a lakkhiat theih nadingin thu ngah ahih manin va pai-in Jesuh’ luang a lakhia hi.

³⁹Jesuh kiangah a zan hawh ngei Nikodemas zong hong pai a, Jesuh’ luang a siatloh nadingin a bawl nading myrrh le aloes paknamtui kigawm tawi sawmnih bang a gik a hong pua hi.

⁴⁰Tua mi nihte in si a vui uh ciangin a bawl ngeina bangun a paknamtuite nuhin puan tawh a tun uh hi.

⁴¹Jesuh, singlamteh tungah a kithahna mun tawh kinai-ah huan khat om a, tua huan sungah kuamah a kivui ngei nai lohna hankhuk thak khat a om hi.

⁴²Tua ni pen Kigin’ ni hi a, Jew mite’ Sabbath ni hong naita ahih manin, tua hankhuk a nai ahihna hangin nawhsa thu-in tua lai munah Jesuh a vui uh hi.