Read Tedim Chin JOHAN 2 Bible Online

JOHAN 2 - Tedim Chin bible

JOHAN 2

¹Tua zawh ni nih khit ciangin Galilee gam Kana khua-ah mo pawi om a, Jesuh’ nu zong tua pawi-ah a om hi.

²Jesuh le a nungzuite zong tua pawi-ah a kisam hi.

³Leenggahzu a bei ciangin Jesuh’ nu in, “Leenggahzu om nawn lo hi,” ci-in Jesuh kiangah a gen hi.

⁴Tua ciangin Jesuh in, “Nu aw, bang hangin na lunghihmawhna hong ko zenzen na hi hiam? Keima hun tung nai lo hi,” ci-in a dawng hi.

⁵Ahi zongin Jesuh’ nu in nasemte kiangah, “Ama hong gen bangbangin gamta un,” a ci hi.

⁶Jew mite in amau biakna ngeina-ah kisilsiang nading ngeina nei uh ahih manin tua lai-ah tui tambong guk tambong sagih bang a ta thei thambelpi guk a om hi.

⁷Jesuh in nasemte kiangah, “Tua thambelpite sungah tui a dimin koih un,” ci-in a sawl mah bangin a dim sitsetin tui a koih uh hi.

⁸Tua ciangin Jesuh in, “Tu-in tui pawlkhat suak unla, zuphung pa kiangah va paipih un,” a ci hi. Amaute in zong tua mah bangin a va paipih uh hi.

⁹Zuphung pa in leenggahzu a suak tui a ciap ciangin, (tui a sung nasemte in a theih hangin) koi panin kingah ahi hiam, ci-in thei lo ahih manin zinei tangvalpa samin,

¹⁰“Midangte in leenggahzu khumte hawm masakin nei uh a, mite in a khamgawp khit uh ciangin a ngeinate hawm pan uh hi. Ahi zongin nangmah in a khum pen teng tu dong na sitlai hi,” a ci hi.

¹¹Jesuh in nalamdang a bawl masak pen Galilee gam Kana khua-ah hih bangin Pasian’ pianzia a neihna kilangsak a, a nungzuite in zong amah a um uh hi.

¹²Tua khit ciangin Jesuh le a nu, a sanggamte le a nungzuite, Kapernaum khua-ah pai-in tua lai-ah ni tawmkhat a taam uh hi.

¹³Jew mite’ Paisan Pawi hun hong naita ahih manin Jerusalem khua-ah Jesuh a pai hi.

¹⁴Biakinn huangsung a lut ciangin bawng, tuu, le kawl vakhu zuakte mu a, sumkhekte zong a sumkhekna sabuai-ah a tu mu hi.

¹⁵Amah in zong khauteep bawlin biakinn huangsung panin tuu le bawng a kipan ganhing khempeuh hawlkhia a, sumkhekte’ sabuai zong sawnpaih sakin a sum khempeuh a thehthang sak hi.

¹⁶Tua ciangin kawl vakhu zuakte kiangah, “Na kawl vakhute uh hih lai panin paikhiatpih un. Ka Pa’ inn pen sumzuakna inn phualpi-in nei kei un,” a ci hi.

¹⁷Hih bangin a gamtatna hangin, “Nangma inn ka deihluatna in ka lungsim hong uklah sak hi,” ci-in Lai Siangtho sungah a kigelhna thu, a nungzuite in a phawk uh hi.

¹⁸Tua ciangin Jerusalem khua-ah a om Jew uliante Jesuh kiangah hong pai uh a, “Hih bangin na gamtat theih nading thu na neihna bang lim tawh hong lakthei ding na hi hiam?” ci-in a dot uh ciangin

¹⁹Jesuh in, “Hih biakinn susia le-uhcin ni thum sungin ka dingsakkik ding hi,” ci-in a dawng hi.

²⁰Tua ciangin Jew uliante in, “Hih biakinn kum sawmli le kum guk sung a kilam ahi hi. Ni thum sungin dingsakkikzo ding na hi hiam?” a ci uh hi.

²¹Ahi zongin Jesuh in biakinn a cih ciangin ama pumpi a cihna ahi hi.

²²Tua ahih manin sihna panin amah a kithawhkiksak ciangin a nungzuite in Jesuh’ thugen phawkkik uh a, Lai Siangtho le Jesuh’ thugente a um uh hi.

²³Paisan Pawi hun laitakin Jerusalem khua sungah Jesuh a om sungin Jesuh in vangliatna tawh nalamdang a bawlte mu uh ahih manin mi tampi in amah a um uh hi.

²⁴Ahi zongin Jesuh in mi khempeuh limtakin theitel ahih manin amaute muang lo hi.

²⁵Amah in mite’ lungsimtawng dong thei ahih manin mite a bangci mi ahi hiam cih thu midangte in ama kiangah a gen ding kisam lo hi.