Read Tedim Chin JOHAN 20 Bible Online

JOHAN 20 - Tedim Chin bible

JOHAN 20

¹Nipi ni zingsang khuavak ma-in Magdala khuami Mary zong hanah va pai-in a et ciangin hankhuk kihukna suangtum a kilikkhia khin a mu hi.

²Amah zong tai-in Simon Peter le Jesuh in a it a nungzui pa kiangah, “Amaute in hankhuk panin i Topa lakhia khin uh a, koi lai-ah koih ahi uh hiam, cih ka thei kei uh hi,” a ci uh hi.

³Tua ciangin nungzui dang khat pa tawh Peter zong paikhia-in han lam a manawh uh hi.

⁴A nih tuakun taikhawm uh a, ahi zongin nungzui dang khat pa in Peter makhelhin hanah a tung masa hi.

⁵Hankhuk sung a etsuk ciangin a kitunna puante a om mu a, ahi zongin lutsuk lo hi.

⁶Ama nungah Simon Peter hong tungin han sungah a lutsukpah hi. A luang tunna puan mu a,

⁷a lu tunna puan pen a luang tunna tawh omkhawm loin a tuamin a kizialin a om a mu hi.

⁸Tua ciangin han a tung masa nungzui dang pa zong lutsukin a thupiangte mu ahih manin a um hi.

⁹(Sihna panin thokik ding hi, ci-in Lai Siangtho in a genna thu a theithei nai lo uh ahi hi.)

¹⁰Tua ciangin nungzuite a inn uhah a ciah uh hi.

¹¹Ahi zongin han pualamah Mary kap a, a kahkawmin hankhuk sung lamah kunin en a,

¹²Jesuh’ luang a kisialna a lu lamah khat, a khe lamah khat, puanpak silhin a tu vantungmi nih a mu hi.

¹³Tua vantung mite in Mary kiangah, “Bang hangin kap na hi hiam?” ci-in a dot uh ciangin amah in, “Amaute in ka Topa paikhiatpih uh a, koi lai-ah koih ahi uh hiam, cih ka thei kei hi,” ci-in a dawng hi.

¹⁴Tua khit ciangin a kihei leh Jesuh mu a, ahi zongin Jesuh ahihlam thei lo hi.

¹⁵Jesuh in, “Numei aw, bang hangin kap na hi hiam? Kua zong na hi hiam?” ci-in a dot ciangin Mary in huan cing pa sa ahih manin, “Sia aw, amah na puakkhiat leh koi lai-ah koih na hi hiam hong gen in. A luang ka la nuam hi,” a ci hi.

¹⁶Tua ciangin Jesuh in, “Mary!” a cih leh Mary zong ama lamah kihei a, “Rabboni,” ci-in a dawng hi. (Rabboni pen Hebru pau hi a, “Siapa,” a cihna ahi hi.)

¹⁷Tua ciangin Jesuh in, “Kei hong lenlen nawn kei in. Ka Pa kiangah a paito nai lo ka hi hi. Ka sanggamte kiangah va pai inla, ‘Keima Pa le note’ Pa, keima Pasian le note’ Pasian’ kiangah ka pai ding hi,’ ci hi, ci-in va gensak zaw in,” a ci hi.

¹⁸Tua ahih manin Magdala khuami Mary zong nungzuite kiangah pai-in Topa a muh khitna thu va gen a, hih a kam vaikhakte zong a zasak hi.

¹⁹Tua ni pen Nipi ni nitak lam hi a, nungzuite zong a nitakin innsung khatah a kikhop laitakun Jerusalem khua-a Jew mi uliante a kihtakna uh hangin inn a kikalhnelh uh hi. Tua bang hinapi-in amaute lakah Jesuh hong ding a, “Nopna ngah ta un,” ci-in a hopih hi.

²⁰Tua bangin a hopih khit ciangin a khutte le a pangpi zong a lak hi. Topa a muhna hangun nungzuite a nuam mahmah uh hi.

²¹Tua ciangin Jesuh in amaute kiangah, “Note in nopna ngah ta un. Pa in kei a hong sawl bangin note zong ka hong sawl hi,” ci-in a vaikhak leuleu hi.

²²Tua khit ciangin amaute lamah a hu sang a, “Kha Siangtho na sang un.

²³Mite’ mawhna na maisak uhleh amaute’ mawhna a mai hi ding a, na maisak kei uhleh amaute’ mawhna a mai lo hi ding hi,” a ci hi.

²⁴Nungzuite kiangah Jesuh a kilah laitakin sawm le nihte sung panin Unau Peeng minno a nei Thomas om lo hi.

²⁵Tua ahih manin nungzui dangte in ama kiangah, “Topa ka mu uh hi,” a cih uhleh amah in, “A khut, siktukkilh tawh a kikilhna mate mu-in, tua a siktukkilh ma vangah ka khutmete ka va khum teek kei a, ama pangpi zong ka khut tawh ka lawn’ teek kei leh ka um kei ding hi,” a ci hi.

²⁶Tua zawh nipikal khat ciangin nungzuite zong innsung khatah kikhawm leuleu uh a, tua hunin Thomas zong a om hi. Amaute kong kikhaknelh uh hinapi-in Jesuh hong pai-in amaute lakah hong ding a, “Nopna ngah ta un,” ci-in a hopih khit ciangin

²⁷Thomas kiangah, “Na khutme tawh hong lawng inla ka khutte en in. Na khut zan inla ka pangpi zong lawng in. Umlah nawn kei inla, um taktak in,” a ci hi.

²⁸Thomas in zong, “Ka Topa, ka Pasian!” ci-in a dawn ciangin

²⁹Jesuh in, “Kei na hong muhkhit ciang bekin hong um pan na hi hiam? Kei hong mu lo napi-in hong umte a dingin lungdamhuai mahmah zaw ding hi,” a ci hi.

³⁰Jesuh in a nungzuite’ muhna-ah nalamdang lian tampi bawl a, ahi zongin hih laibu sungah a kigelh lo tampi tak omlai hi.

³¹Hih laibu sungah a kigelh thute pen Jesuh, Pasian’ Tapa, Khrih ahihna thu na uptheih nading uh le ama min hangin tua upna tawh nuntakna na ngahtheih nading uh deihna tawh a kigelh ahi hi.