Read Tedim Chin JOHAN 4 Bible Online

JOHAN 4 - Tedim Chin bible

JOHAN 4

¹Jesuh in Johan sangin mi tam ngahzaw in a tuiphumna thu Farisi mite in a za uh hi.

²(A taktakin Jesuh mahmah in tui phum loin a nungzuite bek in a phum ahi hi.)

³Jesuh in tua thu a phawk ciangin Judea gam panin paikhia-in Galilee gamah a paikik hi.

⁴Tua a paina-ah Samaria gam a nawk ding kisam hi.

⁵Tua bangin a nawk ciangin Samaria gam sungah Saikhar a kici khua khat a tung hi. Tua khua gei-ah Jakob in a tapa Josef a piak lo khat om hi.

⁶Tua lo sungah tuikhuk khat om a, a khualzinna-in Jesuh gim ahih manin a tuikhuk gei-ah a tu hi. Tua hun pen sunkim laitak ahi hi.

⁷Tua laitakin Samaria numei khat tuitawi dingin tuikhukah a hong pai hi. Jesuh in tua numei kiangah, “Na tui hong dawnsak in,” a ci hi.

⁸Tua laitakin khua sungah an lei dingin Jesuh nungzuite paikhia khin uh hi.

⁹Jew mite in buah tang uh a, Samaria mite’ na zatte zanglo uh ahih manin, Samaria numei in Jesuh kiangah, “Bang hangin nang Jew mi in kei Samaria numei kiangah tui hong ngen na hi hiam?” a ci hi.

¹⁰Jesuh in, “Pasian’ hong piaktheih dingte le tuidawn ding hong ngen pa theitel hi lecin, ama kiang pan tui a ngen ding na hizaw a, amah in nuntakna tui nang hong pia ding hi,” a ci hi.

¹¹Tua ciangin numei in, “Sia aw, tuikhuk thuk mahmah a, ahi zongin tui khai nading bangmah na nei kei hi. Koi panin tua nuntakna tui ngah thei ding na hi hiam?

¹²Tua tham loin, i pupi Jakob sangin lianzaw ding na hi hiam? Amah a kipan a tate le a ganhingte in a nek hih tui sangin a limcizaw koi-ah ngah ding na hi hiam?” a cih ciangin

¹³Jesuh in, “Hih tui a dawn khempeuh dangtak kik ding uh a,

¹⁴ahi zongin keima piak ding tui a dawn khempeuh dangtak kik nawn lo ding uh hi. Tua ka piak tui a dawnte sungah nuntakna tuinak piang ding a, a nungtasak paisuak ding hi,” a ci hi.

¹⁵Tua ciangin numei in, “Sia aw, tua bang ahihleh ka dang a tak nawn loh nading le hih lai-ah tuitawi-in ka pai nawn loh nadingin kei zong tua tui hong pia in,” a ci hi.

¹⁶Tua ciangin Jesuh in, “Va ciahin na pasal va sam inla, hih lai-ah hong paikik un,” a ci hi.

¹⁷Numei in, “Pasal ka nei kei hi,” a cih ciangin Jesuh in, ” ‘Pasal ka nei kei hi,’ na cih pen man mahmah hi.

¹⁸Pasal nga na nei khin ngei a, tu-a na ompih zong na pasal hi lo hi. Tua ahih manin na thugen man mahmah hi,” a ci hi.

¹⁹Tua ciangin numei in, “Sia aw, nang pen kamsang khat na hihna thu ka hong thei hi.

²⁰Ko Samaria mite’ pupite in hih lai mualtungah Pasian bia uh a, ahi zongin no Jew mite in Pasian biakna mun pen Jerusalem khua ahi hi, na ci uh hi,” a cih ciangin

²¹Jesuh in, “Lawm aw, hih ka thugen ding hong um in: Mite in hih mualtung hitaleh Jerusalem hitaleh ah Pa Pasian a biak nawn loh hun hong tung ding hi.

²²No Samaria mite in na theih taktak lohpi uh na bia uh a, ahi zongin ko Jew mite tungtawnin hotkhiatna thu hong pai ahih manin kote in ka theih uh a bia ka hi uh hi.

²³Ahi zongin Pasian a bia taktakte in Pasian’ Kha’ lamlahna le thuman tak tawh a biak hun hong tung ding a, tu-in zong a hong tung khinta ahi hi. Pa Pasian in tu-a bangin amah i biak ding a hong deih ahi hi.

²⁴Pasian pen Kha ahi hi; amah a biate in tua Kha’ lamlahna le thuman taktak tawh a bia ding uh hi,” a ci hi.

²⁵Tua ciangin numei in, “Khrih a kici Messiah hong pai nading thu ka thei hi. Amah hong pai ciangin thu khempeuh hong gen ding hi,” a cih ciangin

²⁶Jesuh in, “Tu-a nang tawh a kiho keimah pen tua na gen pa ka hi hi,” a ci hi.

²⁷Tua laitakin Jesuh nungzuite hong tung uh a, ahi zongin kuamah in, “Numei aw, bang deih na hi hiam?” cihna ahi a, “Bang hangin tua numei tawh kiho na hi hiam?” cihna ahi zongin dong ngam lo uh hi.

²⁸Tua ciangin numei in a tuibeel nusia-in khua sungah ciah a, a khuapih mite kiangah,

²⁹“Hong pai un. Ka gamtatnasa a hong thei pa va en ni. Amah Khrih hi kha ding hi,” a va ci hi.

³⁰Tua ahih manin a khuapihte zong Jesuh kiangah a va pai uh hi.

³¹Mite a hong tunma hunsung tengin a nungzuite in, “Sia aw, an ne in,” ci-in a kun uh hi.

³²Ahi zongin Jesuh in, “Note in na theih loh uh nek ding an ka nei hi,” a na ci hi.

³³Tua ahih manin a nungzuite khatlekhat kiho-in, “Mi khatpeuh in an na puak khin hi ding ahi hiam?” a kici uh hi.

³⁴Tua ciangin Jesuh in, “Keimah hong sawl pa’ deihna bangin na semin, sep dingin hong piak nasep zawhna pen ka nuntakna an ahi hi.

³⁵Note in na paunak uhah, ‘Khai tuh khit kha li ciangin anlak hun hi,’ na ci uh hi. Tu-in note khuadakin lote en un. An khempeuh min khinta a, lak ding bek in sam hi.

³⁶Khaituh pa le anla pa a lungdam khawm theih nadingin anla pa thaman a kipiak mah bangin anla pa in zong a nungta tawntung dingin mi a khawm ding hi.

³⁷Tua ahih manin, ‘Khat in khai tuhin, adang khat in a an la,’ ci-in paunak a om pen thuman mahmah hi.

³⁸Tua ahih manin note in na khawh loh uh lo-ah an a la dingin ka hong sawl hi. Midang in tua lo na kho a, note in a lak bek a si na hi uh hi,” a ci hi.

³⁹Tua numei in, “Ka gamtatnasate khempeuh hong thei hi,” ci-in a thugenna hangin tua khuasunga om Samaria mi tampi tak in Jesuh a um uh hi.

⁴⁰Tua ahih manin Jesuh kiangah Samaria mite a va tun uh ciangin amaute’ khua-ah a taam nadingin kun uh a, Jesuh zong tua khua-ah ni nih a taam hi.

⁴¹Tua ahih manin tua numei’ thugenna hangin Jesuh a um mi tampi tak kibehlap hi.

⁴²Tua thu um mite in tua numei kiangah, “Nangma thugenna hangin a um ka hi nawn kei uh a, komau mahmah in a thugen za-in, leitung mite a Honkhia ding pa taktak hi, ci-in thei ka hih manun a um ka hi uh hi,” a ci uh hi.

⁴³Tua lai-ah ni nih a taam khit ciangin Galilee gamah a pai hi.

⁴⁴Jesuh mahmah in zong, “Kamsang a kuamah peuh ama gamah kipakta ngei lo hi,” ci-in a gen ngei hinapi-in,

⁴⁵Paisan Pawi hun laitakin Jerusalem-ah Galilee mite va pai-in, tua pawi sungah Jesuh’ septe khempeuh mu khin uh ahih manin, Jesuh a tun ciangin Galilee mite in na limbawl mahmah uh hi.

⁴⁶Tui, leenggahzu a suahsakna Galilee gam Kana khua-ah Jesuh paikik hi. Tua laitakin Kapernaum khua-ah kumpi nasem ulian khat om a, a tapa a ci a na hi.

⁴⁷A tapa gim mahmahin si dektak ahih manin, Judea gam panin Galilee gamah Jesuh hong paina thu a zak ciangin ama kiangah va pai a, Kapernaum khua-ah Jesuh hong pai-in a tapa a damsak nadingin a va thum hi.

⁴⁸Jesuh in ama kiangah, “Note in lim le nalamdang lian ka bawl na muh kei uhleh Topa ka hihna thu na hong um kei ding uh hi,” a cih ciangin

⁴⁹ulianpa in, “Sia aw, ka ta a sih ma-in hong pai ta peuh in,” ci-in a thum hi.

⁵⁰Tua ciangin Jesuh in, “Va ciah in. Na tapa nungta ding hi,” a ci hi. Tua ulianpa in Jesuh’ thugen um ahih manin a ciah hi.

⁵¹Lampi-ah a nasemte in na dawntuah uh a, “Na tapa nungta ding hi,” ci-in na ko uh hi.

⁵²Amah in, “Bang hunin a noptuam hong kipan ahi hiam?” ci-in a dot ciangin amaute in, “Zan sun nai khat pawlin a cisa hong kiamvat hi,” ci-in a dawng uh hi.

⁵³Jesuh in, “Na tapa nungta ding hi,” a cih hun tawh a kituak lian ahihna thu a pa in thei a, amah a kipan a innkuanpihte khempeuh in Jesuh a um uh hi.

⁵⁴Hih nalamdang pen Judea gam panin Galilee gamah hong pai khit a kipanin Jesuh in nalamdang a bawl a nihna ahi hi.