Read Tedim Chin JOHAN 5 Bible Online

JOHAN 5 - Tedim Chin bible

JOHAN 5

¹Tua khit ciangin, Jerusalem khua-ah Jew mite biakna pawi kibawl ahih manin Jesuh zong a pai hi.

²Jerusalem khuasung Tuu Kongpi a kici gei-ah Hebru pau-in Bethzatha a kici bual khat om a, tua bual kimkotah talap nga a om hi.

³Hih talapte sungah a mittaw, a khebai, khutlekhezaw, cina tampi lum phengphang uh hi. (Amaute in tua bualtui a kilawh ding ngakin a om uh ahi hi.

⁴Bang hang hiam cih leh Topa’ vantungmi khat in tua bual tui lok thei zel a, tui a kilawh khit ciangin tua lai a tung masa penpen ama natna panin a dam hi.)

⁵Tua talapte sung khatah kum sawmthum le kum giat sung a cina khin mi khat a om hi.

⁶Jesuh in tua cina pa mu a, tua munah sauveipi a lupkhitna a theih ciangin ama kiangah, “Na dam nuam hiam?” ci-in a dot leh

⁷cina pa in, “Sia aw, bualtui a kilawh ciangin kei hong pua ding kuamah om lo ahih manin, kei ka tun ma-in midang khat a bual sung na tungkhin pahpah hi,” ci-in a dawng hi.

⁸Tua ciangin Jesuh in, “Tho inla, na lupna pheek pua-in pai in,” a cih ciangin,

⁹tua cina pa thakhatin dampah a, a lupna pheek la-in a paipah hi. Tua ni pen Sabbath ni hi citciat ahih manin,

¹⁰Jerusalem khuasunga om Jew mi uliante in cina damkik pa kiangah, “Tuni pen Sabbath ni ahih manin lupna pheek na puak ding ngeina hi lo hi,” a cih uh ciangin

¹¹amah in, “Kei hong damsak pa in, ‘Na lupna pheek la inla pai in,’ hong ci hi,” ci-in a dawng hi.

¹²Tua ciangin amaute in, “‘Na lupna pheek la inla pai in,’ hong ci kua ahi hiam?” ci-in a dong uh hi.

¹³Ahi zongin tua munah mi tampi om a, Jesuh paikhia ziau ahih manin cina damkik pa in amah a damsak kua ahi hiam, cih a thei kei hi.

¹⁴Tua khit ciangin Jesuh in biakinn sungah tua cina dam pa mukik a, ama kiangah, “Tu-in na dam khinta hi. Mawhna bawl nawn kei in. Tua hikeileh a siazaw khat na thuak ding hi,” a ci hi.

¹⁵Tua ciangin amah zong pusuak a, Jerusalem khua-a Jew mi uliante kiangah, “Keimah hong damsak pa pen Jesuh ahi hi,” ci-in a va ko hi.

¹⁶Tua ahih manin Jesuh in Sabbath ni-in cina a damsakna hangin amaute in Jesuh bawlsiat ding a kipan uh hi.

¹⁷Ahi zongin Jesuh in amaute kiangah, “Ka Pa in tuni dongin na sem tawntung ahih manin kei zong ka sep ding mah ahi hi,” a ci hi.

¹⁸Hih bangin ama kampauna hangin amaute in Jesuh thatnuam semsem uh hi. Amah in Sabbath thukham a palsat bek hi loin, Pasian nangawn ka Pa ci ahih manin Pasian tawh a kikimin kiseh hi, ci-in a mawhsak uh hi.

¹⁹Tua ahih manin Jesuh in amaute kiangah, “A mantakin gen lehang: Tapa in ama thu bek tawh bangmah sem lo a, a Pa in a sep a muhteng bek a sem ahi hi. Tua hi a, a Pa in a septeng mah a Tapa in zong a sem ahi hi.

²⁰Pa in a Tapa itin, ama septeng mah lak a, mailam hunah zong hih sangin a lianzaw a sep ding lak lai ding ahih manin lamdang na sa mahmah ding uh hi.

²¹Pa in mi sisate nangawn thosakin a nuntaksak mah bangin Tapa in zong a ut peuhpeuh nungtasak thei hi.

²²Pa in kuama tungah thukhen nasep sem lo hi. Mi khempeuh in Pa a zahtak mah bangin Tapa a zahtak theih nadingun Pa in thukhen nasep khempeuh a Tapa tungah a pia hi. Tua ahih manin Tapa a zahtak lo mi khempeuh pen Tapa a sawl Pa Pasian zong a zahtak lo ahi uh hi.

²³

²⁴“A mantakin kong genin-ah: Ka thugennate za-in kei hong sawl pa a um khempeuh a nungta paisuak ding hita hi. Mawhsak thukhenna ngah nawn loin, sihna panin a hingkik ta ahi hi.

²⁵A taktakin ci lehang: A si mite in Pasian’ Tapa’ aw a zak hun uh hong tung ding hi bek loin tu-in a hun hong tungkhin hita a, ama aw a za mi khempeuh nungta ding uh hi.

²⁶Pa in nuntakna a piaktheih mah bangin Tapa in zong a piaktheih nadingin Pa in a bawl hi.

²⁷Amah pen Mihing Tapa ahih manin thu khentheih nading aana ama tungah a pia hi.

²⁸Hih thu ka hong gen ciangin lamdangsa kei un. Han sungah a om misi khempeuh in ama aw za-in,

²⁹han sung panin a hong paikhiat uh hun hong tung ding hi. A gamtat hoih mite pen a nungta tawntung dingin hong thokik ding uh a, a gamtat siate ahihleh mawhsak thukhenna a thuak dingin hong thokik ding uh hi.

³⁰“Keima thu guak tawh ka hihtheih bangmah om lo hi. Pasian’ hong genna bang bekin thu ka khen hi. Keima ut bangin sem loin kei hong sawl pa’ deih bangin sem ka hih manin ka thukhenna thuman hi.

³¹“Keima thu tawh kisai-ah kei mahmah in teci pang leng kuamah in a thumanin sang thei lo ding hi.

³²Tua ahih manin keima a’ ding teci a pang ding mi khat om a, keima thu genin teci a panna thuman hi, ci-in ka thei hi.

³³Note in Johan kiangah thu a dong dingin mi na sawl uh a, amah in note kiangah a thuman hong genzo hi.

³⁴Keimah in mihingte’ teci panna a kisam ka hi kei a, note in hotkhiatna na ngahtheih nadingun note a’ ding ngaihsutna tawh hih thuteng a hong gen ka hizaw hi.

³⁵Johan pen meivak bangin kuangin a taang hi a, ama khuavak sungah tawlkhat nuamsa-in om ding na ut uh hi.

³⁶Ahi zongin Johan’ teci panna sangin a lianzaw teci khat ka nei a, tua in: Ka Pa in sep dingin a hong piak tu-a ka sep thute in kei a dingin teci a pang hi a, Pa in kei a hong sawl taktak ahihna hong kilangsak hi.

³⁷Tua ban panin kei a hong sawl Pasian in zong keima a dingin teci a pang hi. Note in Pasian’ sawl pa’ thu um lo na hih manun Pasian’ aw lah za ngei lo, a maitang lah mu ngei lo, na lungsim uhah zong ama thu a ciing lo na hi uh hi.

³⁸

³⁹Nuntak tawntung ngahtheih nading lametna tawh Lai Siangtho sung na lim sim mahmah uh a, tua na sim uh Lai Siangtho in keima thu mah genin teci pang napi-in,

⁴⁰na nuntak theih nadingun kei kiangah nong painuam kei veve uh hi.

⁴¹“Hih bangin kong gen ciangin mihingte in hong pahtak ding ka deihna hi lo a,

⁴²note’ lungsim sungah Pasian itna na neih hetlohna uh ka theihna hang hizaw hi.

⁴³Ka Pa’ thu tawh kei hong pai napi-in na hong sangnuam kei uh hi. Tua hinapi-in midang khatpeuh ama thu tawh hong paitawm leh na sang ding uh hi.

⁴⁴Pasian’ pahtak theih nading hanciam nuam loin, note khatlekhat na kiphat theih nading uh a hanciam mite’ thugen, a bang hangin um zawsop na hi uh hiam?

⁴⁵Hih bangin ka hong gen ciangin ka Pa kiangah note a hong mawhsak ding pa hi, ci-in hong ngaihsun kei unla, note in suan belin na neih uh Moses pen a hong mawhsak ding pa ahih zawkna thu thei ta un.

⁴⁶Moses in keima thu gen belin nei ahih manin Moses um taktak hi le-uhcin kei zong na hong um ding uh hi.

⁴⁷Ahi zongin Moses’ laigelh thute um lo na hih manun kei hong bangci uptheih mah ding na hi uh hiam?” a ci hi.