Read Tedim Chin JOHAN 7 Bible Online

JOHAN 7 - Tedim Chin bible

JOHAN 7

¹Tua khit ciangin Galilee gam sungah Jesuh zin kawikawi hi. Jerusalem khua-a om Jew mi uliante in amah thatnuam uh ahih manin Judea gam sungah zin nuam nawn lo hi.

²Jew mite’ Buk Pawi hun hong naita ahih manin,

³ama sanggamte in Jesuh kiangah, “Na nung hong zui mihonte in na nasepna a muhtheih nadingun hih lai panin paikhia-in Judea gamah va pai in.

⁴Mite’ theih ding a ut pa in a simthamin na sem ngei lo hi. Hih bangin na semsem na hih manin na sepna thu mi khempeuh theisak vet in,” ci-in zahpihna tawh thu gen uh a,

⁵ama sanggamte mahmah in zong Jesuh um lo uh hi.

⁶Ahi zongin Jesuh in, “Kei a dingin pai ding a hunhoih hi nai lo hi; ahi zongin note a dingin a hunhoih hi tawntung hi.

⁷Leitung mite’ gamtatnate hoih lo hi, ci-in gen tawntung ka hih manin amaute in kei hong mudah uh hi; ahi zongin note hong mudah lo uh hi.

⁸Tua ahih manin pawisiim dingin note va pai un. Kei a dingin a hunhoih hi nai lo ahih manin kei ka hong pai kei ding hi,” ci-in dawng a,

⁹amah pai loin Galilee gam sung mahah a omlai hi.

¹⁰Ahi zongin a sanggamte a dinkhiat khit ciangin Jesuh zong Jerusalem-ah Buk Pawi siim dingin a nungpai hi. Ahi zongin a kilang lua-in pai loin a simpai ahi hi.

¹¹Jerusalem-a om Jew mi uliante in tua pawi lak khawng Jesuh zong uh a, “Koi-ah om ahi hiam?” a ci uh hi.

¹²Ama thu hangin mihonte lakah kam kihona tampi om a, “Amah mi hoih mahmah khat hi,” ci uh a, pawlkhat in, “Mi khemin a lam khialhpih ding pa ahih manin mihoih hi het lo hi,” a ci uh hi.

¹³Ahi zongin Jerusalem khua-a Jew mi uliante a kihtakna hangun kuamah in Jesuh thu a kilangin gen ngam lo uh hi.

¹⁴Pawi kham hunsung alang bang a bei khit ciangin biakinn sungah Jesuh lutin thuhilh ding a kipan hi.

¹⁵Jew mi uliante in lamdangsa mahmah uh a, “Hih mipa cikmah a sang kah ngei lo kimlai bang hangin thu hih zah thei ahi hiam?” a ci uh hi.

¹⁶Tua ahih manin Jesuh in, “Ka thugente pen keima thu hi lo a, kei a hong sawl Pasian kiang panin a hong pai thu ahi hi.

¹⁷Pasian’ deihna bangin a gamta nuam mi peuhmah in, ka thugente pen Pasian’ kiang panin a hong pai thu a gen ka hihna leh keima thu bek tawh a gen ka hihna khenthei ding uh hi.

¹⁸Amau’ thu bek tawh thu a gente in amau’ minthan nading a zong hi a, ahi zongin a hong sawl pa’ minthan nading a zong keimah in thuman thutak gen ka hih manin zuauthu kihel lo hi.

¹⁹Moses in note tungah Thukham hong pia napi-in kuamah in na zui kei uh hi. Tua hinapi, bang hangin thah dingin kei hong sawm na hi uh hiam?” a ci hi.

²⁰Tua ciangin mihonte in, “Dawivei hi teh! Kua in nang thah hong sawm ahi hiam?” a ci uh hi.

²¹Jesuh in, “Sabbath ni-in cina damsakna nalamdang khat ka bawlna hangin lamdang na sa mahmah uh hi.

²²Moses in na tapate uh vun na at ding uh thu hong pia a, (a taktakin Moses thupiak mapekin na pu na pate un a palsat thu ahi hi) vun at ni ding le Sabbath ni a kituahkhak ciangin a vun na at veve uh hi.

²³Moses thupiakna a kipelh loh nadingin Sabbath ni-in vun at na hih uhleh Sabbath ni-in mi khat ka damsak manin bang hangin kei tungah heh na hi uh hiam?

²⁴A tungthama kimu nate siksanin thu khen kei unla, thu taktak siksanin thu khenzaw un,” a ci hi.

²⁵Jerusalem khuami pawlkhat in, “Thah dingin a sawm pa uh hih pa hi lo ahi hiam?

²⁶Tua hinapi, mihon lakah thu gengen napi-in kuamah in bangmah cih lo uh hi. Uliante in Khrih hi, ci-in theihtelna nei uh hi ding hiam?

²⁷Tua ding lah, hih mipa hong piankhiatna i theih hi a, Khrih hong pai ciangin ama piankhiatna kuamah in a theih ding hi lo hi,” a ci uh hi.

²⁸Tua ahih manin biakinn sungah a gen mah bangin mi khempeuh zakin genkhia a, “Kei hong theitel taktak a, ka hong piankhiatna mun a thei takpi mah na hi uh hiam? Keima thu tawh a hong paitawm ka hi kei hi; kei a hong sawl a thuman pa a thei lo na hi uh hi.

²⁹Ahi zongin amah in kei hong sawlin, ama kiang panin a hong pai ka hih manin ke’n ka thei hi,” a ci hi.

³⁰Tua ciangin amaute in Jesuh mat ding hanciam uh hi; ahi zongin ama hun tung nai lo ahih manin kuamah in va su lo hi.

³¹Ahi zongin mihon lak panin mi tampi mah in amah um uh a, “Khrih hong pai ciangin hih mipa sangin nalamdang tamzaw hong bawl tuan ding ahi hiam?” a ci uh hi.

³²Hih bangin mihonpite a kihona thu Farisi mite in za uh ahih manin amaute le siampi liante in Jesuh a man dingin biakinncing palikte pawlkhat a sawl uh hi.

³³Jesuh in tua mite kiangah, “Note lakah tawlkhat ka om lai ding a, tua ciangin kei hong sawl pa kiangah ka pai ding hi.

³⁴Keima omna munah note hong pai thei lo ding na hih manun tua hun ciangin kei nong zon uh hangin nong mu kei ding uh hi,” a na ci hi.

³⁵Tua ciangin Jew mi uliante khatlekhat kiho uh a, “I muh zawh loh dingin hih mipa koi lai-ah paisawm hi ding ahi hiam? Jew mite omna Grik khuapi tuamtuamte-ah pai-in Grik mite kiangah thu hilhsawm hi ding ahi hiam?

³⁶‘Kei nong zon uh hangin nong muzo kei ding uh hi,’ a cihna leh ‘Keima omna munah nong pai thei kei ding uh hi,’ a cih ciangin bang a cihnopna hi ding ahi hiam?” ci-in a kikum uh hi.

³⁷Pawi bei ni ding pen a thupi pen ni hi a, tua ni-in mihon lakah Jesuh dingin nakpitakin kiko a, “A dangtak na om uhleh ka kiangah hong pai unla tui hong dawn un.

³⁸Lai Siangtho sungah, ‘Kei hong um mite sung panin nuntakna tui luangkhia ding hi,’ a cih mah bangin kei hong um mite ka kiangah hong pai-in hong dawn ta un,” a ci hi.

³⁹Jesuh in hih bang a gen ciangin amah a umte in a ngah ding Kha Siangtho thu a genna hi a, tua hun laitakin Pasian’ pianzia nei-in sihna panin Jesuh kithokiksak nai lo ahih manin Kha Siangtho kipiakhia nai lo hi.

⁴⁰Hih thu a zak uh ciangin mihon pawlkhat in, “Hih pa pen Kamsangpa taktak hi,” ci uh a,

⁴¹pawlkhat in, “Hih pa, Khrih ahi hi,” a ci uh hi. Ahi zongin pawlkhat in, “Galilee gam panin Khrih hong piang ding ahi hiam?

⁴²Khrih i cih pen David’ suan hi ding a, David’ suahna Bethlehem khua-ah suak ding hi, ci-in Lai Siangtho sungah kigelh hi lo ahi hiam?” a ci uh hi.

⁴³Tua ahih manin Jesuh thu tawh kisai-ah mihonte’ lungsim kituak lo hi.

⁴⁴Mi pawlkhat in Jesuh man nuam uh hi; ahi zongin kuamah in su ngam lo hi.

⁴⁵Tua ciangin siampi liante le Farisi mite kiangah palikte a va ciahkik uh ciangin, “Bang hangin amah hong kai lo na hi uh hiam” a na ci uh hi.

⁴⁶Palikte in, “Hih mipa’ thugen bangin a gen kuamah om nai lo hi,” a cih uh ciangin

⁴⁷Farisi mite in, “Note zong hong khem khinzo ta ahi hiam?

⁴⁸Jew mi uliante hitaleh Farisi mite hitaleh sung panin amah a um, na theih uh omnai ahi hiam?

⁴⁹Hih mihonte in ahihleh Moses Thukham thei lo uh ahih manin Pasian’ samsiatna a thuak dingte hi lel uh hi,” a ci uh hi.

⁵⁰Tua hun ma-in Jesuh kiangah a va hawhsim ngei Nikodemas zong uliante sungah kihel ahih manin

⁵¹amah in, “Mi khat peuhmah a thu dongin ama gamtatnate i theih masak mateng mawhsakna thu i khen ding pen i Thukham tawh kituak lo hi,” a ci hi.

⁵²Tua ciangin amaute in, “Nang zong Galilee gammi na hi hiam? Lai Siangtho sung sim lecin Galilee gam sung panin kamsang khat beek a pian’ ngei lohna thu na thei ding hi,” a ci uh hi.