Read Tedim Chin JOHAN 9 Bible Online

JOHAN 9 - Tedim Chin bible

JOHAN 9

¹Tua bangin Jesuh a paikhiat ciangin a pianpih mittaw mi khat a mu hi.

²A nungzuite in, “Sia aw, hih pa a mittawtna ama mawhna hang ahi hiam, a nu a pate’ mawhna hang ahi hiam?” ci-in a dong uh hi.

³Jesuh in, “A mittawtna pen ama mawhna le a nu le a pate’ mawhna hang hi lo a, ama tungah Pasian’ vangliatna a kilat theih nadingin a mittaw ahi hi.

⁴Sun khuavak laiteng kei hong sawl pa’ na i sem ding hi. Kuamah in na a sep theih loh zan hun zong hong tung ding hi.

⁵Leitungah ka om laiteng kei pen leitung mite a dingin khuavak ka hi hi,” ci-in a dawng hi.

⁶Tua khit ciangin leilakah a cil sia-in buannawi bawl a, a mipa’ mitah tua buannawi a nuhkawmin,

⁷“Siloam Bual-ah na mai va phiat in,” ci-in a sawl hi. (Siloam a cih ciangin, Sawl, a cihna a hi hi.) Tua ahih manin mittaw pa zong va pai-in a mai va phiat a, khua mutheisa-in hong paikik hi.

⁸Tua hun ma-in amah ngettawm suangin a om a mu a vengte le amah a mu ngei mite in khua a muhtheihna a muh uh ciangin, “Ngettawm suangin a tutu mipa hi lo ahi hiam?” a ci uh hi.

⁹Mi pawlkhat in, “Amah hi mah hi,” ci uh a, ahi zongin pawlkhat in, “Amah hi lo hi; a kisun lel ahi hi,” a ci uh hi. Ahi zongin amah in, “Kei pen tua mipa ka hi hi,” a cih ciangin

¹⁰amaute in, “Tua pa na hih leh bangci-in khua mu theikik na hi hiam?” ci-in a dong uh hi.

¹¹Amah in, “Jesuh a kici mi khat in a cil tawh buan bawlin ka mitte hong nuhsak a, ‘Siloam Bual-ah pai inla na mai va phiat in,’ hong ci ahih manin kei zong va pai-in ka mai ka phiat leh khua ka mu theikik hi,” ci-in a dawng hi.

¹²Tua ciangin amaute in, “Tua mipa koi-ah om ahi hiam?” ci-in a dot uhleh, “Ka thei kei hi,” ci-in a dawng hi.

¹³Amaute in Farisi mite kiangah tua mittaw ngei pa a paipih uh hi.

¹⁴Jesuh in buan bawlin a mit a vaksak ni pen Sabbath ni ahi hi.

¹⁵Farisi mite in tua mipa in khua a muhtheih kikna zia thu dong leuleu uh hi. Amah in, “Tua mipa in ka mitah buan hong nuh a, ka mai ka phiat leh khua ka mu theikik hi,” a ci hi.

¹⁶Farisi mi pawlkhat in, “Amah in Sabbath ni tang lo ahih manin Pasian kiang panin hong pai mi hi lo ding hi,” a ci uh hi. Ahi zongin pawlkhatte in, “A gamta khial mi in bang hangin hih bangin nalamdang bawlthei ding ahi hiam?” ci leuleu ahih manin mite’ ngaihsutna kituak lo hi.

¹⁷Tua ahih manin Farisi mite in mittaw pa kiangah, “Ka mit khua hong musak hi, ci na hih manin amah kua hi dingin ngaihsun na hi hiam?” ci-in a dotkik uh ciangin, “Amah kamsang khat hi ding hi,” ci-in a dawng hi.

¹⁸Jerusalem khua-a om Jew mi uliante in hih mipa a mittaw ngei hinapi-in tu-in khua mukik thei hi, cih pen um thei lo uh ahih manin a mittaw pa’ nu le pate sam uh a,

¹⁹amaute kiangah, “A pianpih-a mittaw na cih uh na tapa uh hih pa mah ahi hiam? Tua ahih kei leh bangci-in khua mukik thei ahi hiam?” ci-in a dot uh ciangin

²⁰a nu le a pate in, “Hih mipa pen ka tapa uh ahihna le a pianpih mittaw ahihna thu ka thei uh hi.

²¹Ahi zongin bangci-in khua mukik thei hiam cihna le kua in khua mu theisakkik hiam cih thu ka thei kei uh hi. Amah naupang hi nawn lo ahih manin amahmah dong le-uhcin hong gen thei ding hi,” ci-in a dawng uh hi.

²²Jesuh pen Khrih hi, ci-in a gen peuhpeuh, kikhopna inn panin hawlkhia ni, ci-in Jew mi uliante in thukimna neikhin uh ahih manin, Jew mi uliante a kihtakna uh hangin a nu le a pate in hih bangin a gen uh ahi hi.

²³Tua ahih manin a nu a pate in, “Amah naupang hi nawn lo ahih manin amahmah dong un,” a ci uh ahi hi.

²⁴Tua ciangin a mittaw ngei pa mah samkik leuleu uh a, “Pasian’ mai-ah kiciamin a man taktak hong gen in. Kote in hih mipa thukham palsatin a gamta pa hi, ci-in ka thei uh hi,” a cih uh ciangin amah in,

²⁵“Amah a gamta khial ahihleh ahihloh bangmah ka thei kei hi. Keima theih thu in: Nidangin a mittaw kimlai, tu-in khua ka mukik theita hi,” ci-in a dawng hi.

²⁶Tua ciangin amaute in, “Amah in nang bang hong cih a, na mit khua hong bangci muhsak ahi hiam?” ci-in a dot uh ciangin,

²⁷“A thuteng ka hong gen khitsa hinapi, ka thugen na um kei uh hi. Bang dingin za kikkik nuam na hi uh hiam? Note zong ama nungzui suak nuam na hi uh hiam?” ci-in a dawng hi.

²⁸Tua ciangin amaute in mittaw ngei pa kobawlin, “Nang pen ama nungzui na hi a, kote ka hih uhleh Moses’ nungzui ka hi uh hi.

²⁹Pasian in Moses a hopihna thu ka thei uh a, hih mipa ahihleh koi lai panin hong piang ahi hiam cih nangawn ka thei kei uh hi,” a ci uh hi.

³⁰Tua ciangin mittaw ngei pa in, “Amah in kei khua hong musak thei napi, amah koi pana hong piang ahi hiam cih na theih loh uh lamdang mahmah hi.

³¹Pasian in thukham a palsat mite’ thu ngai lo a, amah bia-in, ama deih bangin a gamta mite’ thu ngai hi, ci-in ko ka thei uh hi.

³²Leitung pian’ cil a kipanin pianpih mittaw khua a musak thei a omlam kiza ngei nai lo hi.

³³Tua ahih manin Pasian kiang panin hong pai hikeileh hih bang hih thei lo ding hi,” ci-in a dawng hi.

³⁴Tua ciangin amaute in, “Mawhna bulomtang sung panin suakin a khangkhia mipa in kote tungah thu hong hilhsawm na hi hiam?” ci-in tua mittaw ngei pa a hawlkhia uh hi.

³⁵Hih mipa a kihawlkhiatna thu Jesuh in za ahih manin amah a muh ciangin, “Mihing Tapa na um hiam?” ci-in a dong hi.

³⁶Amah in, “Amah ka uptheih nadingin amah kua ahi hiam?” a ci hi.

³⁷Jesuh in, “Amah na mukhin a, nang tawh a kiho mipa ahi hi,” a cih ciangin

³⁸amah in, “Topa aw, ka hong um hi,” ci-in Jesuh a bia hi.

³⁹Tua ciangin Jesuh in, “Mittawte in khua a muhtheih nading le khua mu thei a kineite mittaw a battheih nadingin leitungah thukhen dingin a hong pai ka hi hi,” a ci hi.

⁴⁰Ama kiangah a om Farisi mi pawlkhat in hih bangin a thugenna a zak uh ciangin, “Kote zong a mittaw-in hong ngaihsun na hi hiam?” ci-in a dong uh hi.

⁴¹Jesuh in, “A mittaw hi le-uhcin mawhna tawh na kipelh ding uh hi. Ahi zongin khua mu thei ung, ci na hih manun na mawhna uh a ngei mahin a omlai ahi hi,” ci-in a dawng hi.