Read Tedim Chin SAWLTAK 10 Bible Online

SAWLTAK 10 - Tedim Chin bible

SAWLTAK 10

¹Sisaria khua-ah Kornelias a kici mi khat om a, Rom galkap honte sung panin “Italy Galkapte,” a kici sungah galkapbu a sem ahi hi.

²Amah biakna a hahkat mahmah mi khat hi a, a innkuan bupun Pasian bia uh hi. Amah in Jew mizawngte huh nadingin nakpitakin na sem a, Pasian kiangah thu a ngen tawntung mi khat ahi hi.

³Khatvei nitak nai thum pawlin maang mu a, Pasian’ vantungmi khat hong pai-in ama kiangah, “Kornelias aw,” ci-in a sapna teltakin a thei hi.

⁴Amah in zong laukawmin vantungmi en a, “Topa aw, bang thu ahi hiam?” a cih ciangin, “Pasian in na thungetna hong za a, mizawngte na huhna zong hong thei-in nang hong phawk hi.

⁵Tu-in Joppa khua-ah mi sawl inla, Simon Peter a kici mipa samsak in.

⁶Tua mipa pen, tuipi gei-a teng savunnim nasepin a nei Simon inn-ah zin tungin a om ahi hi,” a ci hi.

⁷Tua khit ciangin ama kiangah thu a gen vantungmi paikhia a, Kornelias in zong ama innsung nasemte nih le biakna a hahkat mahmah, ama sawltakin a neih galkapte khat sam a,

⁸a thupiang khempeuh amaute kiangah a genkhit ciangin Joppa khua-ah a paisak hi.

⁹A zing ciangin Joppa khua-ah amaute a tun dektak laitakun, thungen dingin sun laitakin innkhumzangah Peter a kahto hi.

¹⁰Peter a gil kialin an duh mahmah hi. A zinte in an a huanhuan laitakin Peter in maang a mu hi.

¹¹Vantung kihong a, sikli a nei a peek deda khat a kiu ciatah khau kivawhin leitungah a hong kikhaisuk a mu hi.

¹²Tua a peek tungah ganhing namkim, a bokvak namkim, le vasa namkim a om hi.

¹³Awging khat in ama kiangah, “Peter aw, tho inla tuate go-in ne in,” a ci hi.

¹⁴Ahi zongin Peter in, “Topa aw, tuate go-in ka ne het kei ding hi. A ninin a kingaihsun peuhmah ka ne ngei het kei hi,” ci-in a dawng hi.

¹⁵A awging in ama kiangah, “Pasian in a siangin a gensa khat peuhpeuh a ninin ngaihsun kei in,” a ci leuleu hi.

¹⁶Tu-a bangin a thumveina dong a cihkhit ciangin vantung lamah tua a peek deda a kilato kik hi.

¹⁷Peter in tua a maangmuhna bang a cihnopna hi ding ahi hiam, ci-in lamdangsa-in a om laitakin, Kornelias in a sawl mite in Simon’ inn hong kan kawikawi uh a, a inn hong thei uh ahih manin a kongbiang hong tungta uh hi.

¹⁸Amaute in, “Simon Peter a kici mi khat, hih lai-ah zin hong tung kha hiam,” ci-in a hong dong uh hi.

¹⁹Tua bangin Peter in a maang muh lungngaingai-in a om laitakin Kha Siangtho in, “En in, mihing thum in nang hong zong uh hi.

²⁰Amaute nang kiangah a hong pai dingin ka hong sawl ahih manin kithawi-in kumsuk inla, lunghiang loin amaute zuipah in,” a ci hi.

²¹Tua ciangin Peter zong amaute kiangah paisuk a, “Kei pen na zon pa uh ka hi hi. Bang thu ahi hiam?” ci-in a dong hi.

²²Amaute in, “Galkap bupa Kornelias in nang kiangah kote hong sawl hi. Amah pen Pasian a bia mihoih mahmah khat hi a, Jew mi khempeuh in zong a zahtak mahmah khat uh ahi hi. Amah in nangma thugente a zaktheih nadingin a inn-ah nang a hong sap nadingin Pasian in a vantung mite khat ama kiangah gensak hi,” ci-in a dawng uh hi.

²³Tua ahih manin amah tawh a giakkhawm dingin Peter in amaute a sam hi. A zing ciangin Peter zong kithawi-in amaute tawh paikhawm a, Joppa khua-a om thu um mi pawlkhatte in zong a zui uh hi.

²⁴A zing ciangin Sisaria khua a tung uh hi. Kornelias in zong amaute’ tun ding lamen ahih manin, a beh a phungte le a lawm itteng a inn-ah a na samkhol hi.

²⁵Peter hong tun ciangin Kornelias in na dawn a, a khe kiangah bokin a bia hi.

²⁶Ahi zongin Peter in amah kaito a, “Ding in; kei zong mihing mah ka hi lel hi,” a ci hi.

²⁷Tua bangin a kiho kawmin Peter zong inn sungah tum a, mi tampi tak a na om a muh ciangin

²⁸amaute kiangah, “Note mahmah in zong limtakin na theih ciat uh mah bangin Jew mite pen minam dangte kiangah hawhin a kikholh ding a ngeina hi lo hi. Ahi zongin mi khat peuhpeuh a nin hi, ci-in ka ngaihsut loh nadingin Pasian in kei tungah a thu hong lakkhin zo hi.

²⁹Tua ahih manin kei nong sap uh ciangin nial loin kong pai hi. Tu-in bang thu-a hong sam na hi uh hiam?” ci-in a dong hi.

³⁰Kornelias in, “Tuni tawh sim tuma ni li lai-in tubang hun nitak nai thum laitakin ka inn-ah thungenin ka om hi. Tua bangin thungenin ka om laitakin puanpak mahmah a silh mi khat ka mai-ah hong dingvat a,

³¹‘Kornelias aw, Pasian in na thungetnate hong za a, mizawngte na huhnate zong a hong thei hi.

³²Simon Peter a kici mipa a sam dingin Joppa khua-ah mi sawl in. Amah pen savunnim nasepin nei-in tuipi gei-ah a teng Simon’ inn-ah zin tungin a om hi,’ hong ci hi.

³³Tua ahih manin nang kong samsakpah a, midik na hih manin hih lai ciang a hong tung na hi hi. Topa in na gen dingin a hong sawl thu khempeuh na hong gen ding ngakin Pasian’ omna hih lai munah a om ka hi uh hi,” ci-in a dawng hi.

³⁴Tua ciangin Peter a kam ka-in thu hilh ding kipan a, “Pasian in kuamah angvan’ tuam nei loin,

³⁵kua mi kua mi hitaleh amah zahtakin a manin a gamta mi khempeuh a sanna thu teltakin ka thei hi.

³⁶Mi khempeuh’ Topa ahi Jesuh Khrih hangin a kingah Lungdamna Thu, Israel mite tungah Pasian in a puakna thu na thei uh hi.

³⁷Johan in tuiphumna thu a hilh khit a kipanin Galilee gam a kipan Judea gam khempeuhah a piang thu lianpite na thei uh hi.

³⁸Nazareth khuami Jesuh tungah Pasian in Kha Siangtho le vangliatna pia a, Pasian in a ompihna hangin tua Jesuh in a paina khempeuhah na hoih semin, Dawimangpa in a gimsak mite khempeuh a damsakna thu zong na thei uh hi.

³⁹Amah in Jerusalem khua le Jew mite omna mundang khempeuhah a septe khempeuh a thei tecite ka hi uh hi. Jew mite in sing tungah amah khai-in a that uh hi.

⁴⁰Ahi zongin Pasian in a ni thum ni-in amah hingkik sakin hong kilangsakkik hi.

⁴¹Mi khempeuh tungah kilangsak loin, a thei teci dingin Pasian in a hong teelsa kote bek tungah hong kilangsak hi. Sihna panin a hinkik khit ciangin kote in amah tawh an nekhawm tui dawnkhawmin ka om uh hi.

⁴²Kote in mite kiangah thu ka hilh nading uh le mihing le misite tungah thu a khen dingin Pasian in amah a sehna thu teci a pang dingin a hong sawl hi.

⁴³Amah a um mite khempeuh in ama min hangin a mawhna uh a mai nading thu, kamsangte khempeuh in zong gen belin a neih khat uh ahi hi,” a ci hi.

⁴⁴Tua bangin Peter in thu a hilh laitakin tua thuhilhna a ngai mite khempeuh tungah Kha Siangtho hong tungsuk hi.

⁴⁵Gentail mite tungah zong Pasian in a Kha Siangtho a piakkhongna thu a muh uh ciangin Joppa khua panin Peter tawh a hong paikhawm Jew mi thu umte in lamdang a sa mahmah uh hi.

⁴⁶Bang hang hiam cih leh amaute in pau lamdang pau-in Pasian’ liatna a phatnate uh amau bil mahmah tawh a za uh hi. Tua ciangin Peter in,

⁴⁷“Eite mah bangin hih mite in zong Kha Siangtho ngah uh hi. Tui sungah a kiphum ding uh kua’n kham thei ding ahi hiam?” ci-in a gen khit ciangin,

⁴⁸Jesuh Khrih min tawh amaute tui a kiphum nading uh a sawl hi. Tua ciangin amaute kiangah Peter a tam lai nadingin a thum uh hi.