Read Tedim Chin SAWLTAK 11 Bible Online

SAWLTAK 11 - Tedim Chin bible

SAWLTAK 11

¹Gentail mite in zong Pasian’ thu a upna uh, Judea gam sunga om sawltakte le thu um mite in a za uh hi.

²Tua ahih manin Jerusalem khua-ah Peter a pai ciangin Gentail mite zong vun a ki-at ding uh ahi hi, ci-in a ngaihsun mite in Peter mawhsak uh a,

³“Bang hangin vun a ki-at lo Gentail mite’ inn-ah tung a, amaute tawh an nangawn nekhawm na hi hiam?” a ci uh hi.

⁴Tua ahih manin Peter in a thupiang khempeuh a patna panin a ban banin gen a,

⁵“Joppa khua-ah thungenin ka om laitakin maang ka mu hi. A peek deda khat a kiu li-ah khau kivawhin vantung panin hong kikhaisuk ka mu a, keima mai sanah hong khawl hi.

⁶Tua a peek deda tung, limtakin ka et ciangin ganhing, gamsa, a bokvak ganhing le vasate ka mu hi.

⁷Tua ciangin awging khat in kei kiangah, ‘Peter aw, tho inla tuate go-in ne in,’ hong cihna ka za hi.

⁸Ahi zongin keimah in, ‘Topa aw, tuate go-in ka ne het kei ding hi. Bang hang hiam cih leh a ninin a kingaihsun an peuhmah ka kam ka tun ngei kei hi,’ ka ci hi.

⁹Ahi zongin van panin a awging in, ‘Pasian in a siangin a gensa khat peuhpeuh a nin na ci kei ding hi,’ hong ci kik hi.

¹⁰Tu-a bangin a thumveina dong hong cih khit ciangin vantungah tua a peek deda kilato kik hi.

¹¹Tua laitakin Sisaria khua panin kei kiangah a hong kisawl mihing thumte, ka zintunna inn-ah hong tung uh hi.

¹²Lunghiang loin amaute ka zuihpah nadingin Kha Siangtho in kei tungah hong gen khinzo hi. Joppa khua panin hih i sanggam gukte in zong Sisaria khua-ah hong zui uh a, ka vekpi-un Kornelias inn-ah ka lut uh hi.

¹³Tua ciangin amah in vantungmi khat a inn sungah a ding mu-in, tua vantungmi in ama kiangah, ‘Simon Peter a kici mipa a sam dingin Joppa khua-ah mi sawl in.

¹⁴Amah in nang le na innkuan khempeuh un hotkhiatna na ngah nading uh thu hong gen ding hi,’ a cihna thu a hong gen hi.

¹⁵Tua thu gen dingin ka kipat laitakin eite in Kha Siangtho i ngah cil huna mah bangin amaute tungah Kha Siangtho hong tung hi.

¹⁶Tua ciangin Topa in, ‘Johan in tui sungah hong phum a, ahi zongin Pasian in Kha Siangtho tawh note hong kidimsak ding hi,’ a cihsa thu ka phawkkik hi.

¹⁷Eite in Topa Jesuh Khrih i up ciangin eite tungah hong piak mah bangin Pasian in hih Gentail mite tungah zong a kibangin a piakna teltakin kithei ahih manin, hih Pasian’ nasepna a khaktanzo dingin kei kua ka hi hiam?” ci-in a gen hi.

¹⁸Amaute in hih thu a zak uh ciangin mawhsakna thu gen nawn lo uh a, “Gentail mite zong kisikin a nuntak theih nadingun Pasian in hunhoih pia hi,” ci-in Pasian a phat uh hi.

¹⁹Stefen a kithah huna bawlsiatna hangin thu um mite tampi kithehthang uh hi. Mi pawlkhatte Foenisia gam, Saipras gam, le Antiok khua ciang dong tung uh a, Jew mite kiang bekah Pasian’ thu a hilh uh hi.

²⁰Ahi zongin Saipras gammi le Sairin khuami thu um mi pawlkhatte Antiok khua-ah pai uh a, Topa Jesuh hanga Lungdamna Thu, Gentail mite kiangah zong a gen uh hi.

²¹Topa in nakpitakin amaute huh ahih manin mi tampi in thu umin Topa lamah a kihei uh hi.

²²Jerusalem-a om pawlpite in hih thu a zak uh ciangin Antiok khua-ah Barnabas a paisak uh hi.

²³Barnabas a tun ciangin Pasian in amaute thupha a piakna mu-in lungdam mahmah a, amaute citakin a lungsim khempeuh uh tawh Topa tungah a thuman nadingun a hanthawn hi.

²⁴Barnabas pen mihoih mahmah, upna nei-in, Kha Siangtho tawh a kidim mi khat ahi hi. Mi tampi in Pasian a um uh hi.

²⁵Tua ciangin Saul a zong dingin Barnabas pai a, Tarsas khua-ah a tung hi.

²⁶Saul a muh ciangin Antiok khua-ah a paipih hi. Kum khat sung tawntung tua lai-a om pawlpi mite tawh amau tegel omkhawm uh a, mi tampi tak thu a hilh uh hi. Thu um mite pen Khristian ci-in min a kiphuah masakna mun in Antiok khua ahi hi.

²⁷Tua hun pawl laitakin Jerusalem khua panin Antiok khua-ah kamsang pawlkhat paisuk uh hi.

²⁸Amaute sung panin Agabas a kici kamsangpa hong ding a, leitung khempeuhah kialpi hong tung ding hi, ci-in Kha Siangtho sawlna tawh a genkhol hi. (Tua kialpi pen Klaudias in Gam uk Kumpi a sep laitakin a tung hi.)

²⁹Tua lai-a om thu um mite in amau hihzawh zah ciat hanciamin Judea gam a om thu um mite kiangah huhna a puak nading uh a vaihawm uh hi.

³⁰Amaute in huh nading sum a kaihkhop khit uh ciangin pawlpi upate tungah a na piak dingun Barnabas le Saul a puasak uh hi.