Read Tedim Chin SAWLTAK 14 Bible Online

SAWLTAK 14 - Tedim Chin bible

SAWLTAK 14

¹Ikonium khua a tun uh ciangin Paul le Barnabas zong Jew mite kikhopna inn-ah pai uh a, amaute’ thuhilhna hangin Jew mi le Gentail mi tampi tak in Pasian thu um uh hi.

²Ahi zongin thu um lo Jew mite in Gentail mite holhthawh uh a, thu um mite a mudahsak uh hi.

³Tua lai-ah sawltakte sauveipi tam uh a, Topa Jesuh thu hangtakin a hilh uh hi. Ama dikna thu a hilhnate uh man hi, ci-in a lah nadingin Topa in amaute tungah lim le nalamdang bawltheih nading vangliatna a pia hi.

⁴Tua khuasunga om mite pawl nih pha uh a, pawlkhat in Jew mite panpihin, pawlkhat in sawltakte a panpih uh hi.

⁵Gentail mi le Jew mite in a uliante uh tawh kopin sawltakte bawlsia-in suang tawh den ding a vaihawm uh hi.

⁶Sawltakte in tua thu a theih uh ciangin Likaonia gam sunga om Lystra khua, Derbe khua, le tua gam kiima om khuate-ah tai uh a,

⁷tua a taina uh khuate-ah Lungdamna Thu a hilh uh hi.

⁸A suahtung a kipanin lam a pai thei lo khezaw mi khat Lystra khua-ah a om hi.

⁹Amah in Paul’ thuhilhte limtakin a ngai hi. Tua mipa in damna a ngahzawh nading zahin upna nei hi, ci-in Paul in a muh ciangin limtakin amah en a,

¹⁰“Na khe-in dingto in!” nakpitakin a ci hi. Tua mipa zong dingin lam pai kawikawi dingin a kipan hi.

¹¹Mihonte in Paul’ nasepna a muh uh ciangin amau’ Likaonia pau tawh, “Mihing mel pua-in pasian-te i kiangah hong pai hi,” ci-in a kiko uh hi.

¹²Barnabas pen Zeus ci-in min phuah uh a, Paul pen a thugenpi pen ahih manin Hermes ci-in min a phuah uh hi.

¹³Zeus pasian biakna inn tua Lystra khua nawl ah a om hi. Tua Zeus pasian’ na a sem siampipa in khuapi nawla a biakinn kongah bawngtalte le pakkualte hong paipih hi. Amah le mihonte in sawltakte a biak nadingun tua bawngte go-in pakkualte a pianuam uh hi.

¹⁴Ahi zongin Barnabas le Paul in hih thu a zak uh ciangin mihonte’ vaihawmna a nialna limun a puan uh balkekin mihon lakah tai-in kiko uh a,

¹⁵“Lawmte aw, bang hangin hih bangin gamta na hi uh hiam? Kote pen note mah bangin mihing ka hi lel uh hi. Bangmahin a kimang lo hih milimte na biakna uh panin kihei-in, vantung, leitung, tuipi le tuate tung le a sunga om khempeuh a bawl a nungta Pasian na biak nadingun Lungdamna Thu note kiangah a gen dingin hih lai-ah a hong om ka hi uh hi.

¹⁶A beisa hun sungah Pasian in mi khempeuh amau utbang ciatin hong gamtasak hi.

¹⁷Ahi zongin amah in a bangci Pasian hiam cih hong lahna-in mite a dingin na hoihnono a hong pia hi. Amah in van panin guah hong zusakin, a hun hunin anlak hun ding hong tungsak hi. Amah in note’ nek ding an hong pia a, lungdamin a hong omsak hi,” a ci uh hi.

¹⁸Hih bangin thu a genna uh tawh mihonte in amaute a biak loh nadingun a khozo liailiai uh ahi hi.

¹⁹Ahi zongin Pisidia gam a om Antiok khua le Ikonium khua panin Jew mite hong pai uh a, mihonte hong holhthawh gawpin suang tawh Paul denggawp uh a, si khin hi, ci-in ngaihsun uh ahih manin khuanawlah a kaikhia uh hi.

²⁰Ahi zongin thu um mite in amah umcihin a om laitakun amah hong tho-in khua sungah a lutkik hi. A zing ciangin Barnabas tawh Derbe khua-ah a pai uh hi.

²¹Paul le Barnabas in Derbe khua-ah Lungdamna Thu hilh uh a, mi tampi in Pasian a um uh hi. Tua lai panin kileh kikin Lystra khua, Ikonium khua, le Pisidia gam a om Antiok khua-ah a pai uh hi.

²²Thu um mite a upna uhah citakin a om nadingun hanthawnin tha pia uh a, “Pasian’ Ukna sungah i omtheih nadingin haksatna tampi thuak ding hi hang,” ci-in a hilh uh hi.

²³Khua pawlpi simah pawlpi upa ding sehsak uh a, an tangin thungetna tawh amaute’ muan ahi Topa’ khut sungah tua mite a ap uh hi.

²⁴Pisidia gam a khenkhit uh ciangin Pamfilia gam a tung uh hi.

²⁵Tua gam sunga om Perga khua-ah thu hilh uh a, tua khua panin Attalia khua-ah a paisuk uh hi.

²⁶Attalia khua panin teembaw tuang uh a, tu-a a zawh uh nasep a kipat nadingun Pasian’ khut sungah amaute a ki-apna Antiok khua a zuankik uh hi.

²⁷Antiok khua a tun uh ciangin amaute in pawlpi mite khawm uh a, a khualzinna uhah Pasian in na a seppihna khempeuh le Gentail mite in zong thu a uptheih nadingun Pasian in lam a honsaknate khempeuh a gen uh hi.

²⁸Tua khua-ah thu um mite tawh sauveipi sung a omkhawm uh hi.