Read Tedim Chin SAWLTAK 15 Bible Online

SAWLTAK 15 - Tedim Chin bible

SAWLTAK 15

¹Judea gam panin Antiok khua-ah mi pawlkhat hong pai uh a, innkuan khat bangin a om thu um mite kiangah, “Moses Thukham sungah a kigen bangin na vun uh na at kei uhleh hotkhiatna na ngah kei ding uh hi,” ci-in thu hilh ding hong kipan uh hi.

²Hih thu huhau-in Paul le Barnabas, le hih mite kikalah nakpitakin thu kinialna omin thu kisel uh ahih manin, Paul le Barnabas le Antiok khua-a a om mi pawlkhatte Jerusalem khua-ah va pai-in, hih thu tawh kisai-in tua lai-a om sawltakte le upate tawh a kimuh nadingun a vaihawm uh hi.

³Amaute a pai uh ciangin pawlpi mite in khuanawl ciang va kha uh a, Gentail mite zong Pasian lamah a kiheina thu, a nawkna uh Foenisia gamah gen kawikawi uh ahih manin thu um mite khempeuh a nuam mahmah uh hi.

⁴Jerusalem khua a tun uh ciangin sawltakte, upate, le pawlpite in limtakin zin na do uh a, Pasian in na a seppihna thu, amaute kiangah a gen uh hi.

⁵Ahi zongin Farisi mite sung panin thu um mi pawlkhat in, “Amaute in Moses Thukham zui-in, a vun uh a ki-at nading uh gen ding kisam hi,” a ci uh hi.

⁶Tua ahih manin hih thu a kikum dingin sawltakte le upate a kikhawm uh hi.

⁷Sauveipi a kisel khit uh ciangin Peter hong ding a, “Lawmte aw, Gentail mite in Pasian’ thu za-in a uptheih nadingun amaute tungah Lungdamna Thu a hilh dingin sawtpi lai pekin note lak panin Pasian in kei hong teelkhiatna thu na thei uh hi.

⁸Mihingte’ lungsim sungthu a thei Pasian in Gentail mite in zong thu a uptheih ding mah hi, cih a lahna-in eite tungah a hong piak mah bangin amaute tungah zong Kha Siangtho a pia hi.

⁹Pasian in eite le Gentail mite deidanna hong nei lo a, amaute in zong a up manun mi siangtho-in a bawl hi.

¹⁰Tua ahih ciangin i pute i pate a kipan ei mahmah in i puak zawh loh vangik pen Pasian’ heh theihtheih nadingin bang hangin thu um mite tungah suan ding ihi hiam?

¹¹Tua bangin i gamta het kei ding hi. Amaute mah bangin eite in zong i up manin Topa Jesuh hehpihna tawh hotkhiatna i ngah hi,” ci-in thu a gen hi.

¹²Tua ciangin Barnabas le Paul in Gentail mite lakah amau tungtawnin Pasian in lim le nalamdang a bawlnate khempeuh a gen laitakun mi khempeuh pau loin a om uh hi.

¹³A thugen uh a man khit ciangin James in thu hong gen a, “Lawmte aw, ka thugen hong ngai dih un.

¹⁴Pasian in Gentail mite lak panin ama mi dingin mi pawlkhat a lakna tawh Gentail mite a kin ahih lamtak a hong lahna thu, Simon’ genna i za zo hi.

¹⁵Kamsangte’ thugente zong tu-a tawh kituak mahmah hi. Lai Siangtho sungah,

¹⁶‘Tanglai pek panin hih thu a hong theisak Topa in hih bangin a gen hi: Keima mi ahi dingin ka sapsa Gentail mite le midangte khempeuh in Topa a zontheih nadingun a nung ciangin ka hong paikik ding a, a kisiasa David’ ukna gam ka puahkik ding hi. A siate a ngei bangsakkikin ka dingsakkik ding hi, ci hi,’ ci-in kigelh hi.

¹⁹Tua ahih ciangin keima ngaihsutna-ah, Pasian’ lamah a kihei hih Gentail mite nawngkaisak lo zaw-in,

²⁰milim biakna-a kizang an khempeuh a siang lo suak ahih manin a nek loh nading uh, numei tawh khialhnate panin a kikep nading uh, a si luangkhiasak loin a kigawlmek sate, le sasi khat peuhpeuh a nekloh nadingun lai i gelhzawk ding hoih ka sa hi.

²¹Bang hang hiam cih leh Sabbath nisimin kikhopna innte-ah Moses Thukhamte kisim ngitnget a, khua khempeuhah Moses thugente mah hilh belin kinei hi,” a ci hi.

²²Tua ciangin sawltakte, upate, le pawlpi buppi in amau sung panin mi pawlkhat teelin Paul le Barnabas tawh Antiok khua-ah a paikhawmsak ding uh a vaihawm uh hi. Amaute tawh a paikhawm dingin thu um mite in a zahtakbawl mahmah mi nih, Barsabbas Judas le Silas teelkhia uh a,

²³a nuai-a kigelh bangin lai a puasak uh hi. Tua a lai puaksak uh sungah, “Sawltakte le upate ahi ko na sanggamte un, Antiok khua, Syria gam, le Silisia gam a om thu upna sungah sanggam ahi Gentail mite tungah hopihna kam kong khak uh hi.

²⁴Kote’ hong sawl lohpi-in ko kiang panin mi pawlkhat hong pai-in a thugenna uh tawh note hong buaisakin hong lung-amsak hi, ci-in ka za uh hi.

²⁵Tua ahih manin kote kikhawmin thu ka kikum uh a, mi pawlkhat teelin no kiangah kong paisak ding uh ka kithukim uh hi. Tua ka teel uh mite pen i Topa Jesuh Khrih nasepna-ah a nuntakna uh a pia ngam i sanggam it Paul le Barnabas tawh kong paisak uh hi.

²⁷Tua ahih manin ka teel uh Judas le Silas kong paisak uh a, hih lai sunga ka gelh uh thute mah amau kam mahmah tawh hong gen ding uh hi.

²⁸A kisam mahmah hih a nuai-a thute simloh, note tungah vangik dang suat ding pen Kha Siangtho le kote ka thukim kei uh hi.

²⁹Tua a kisam thute in: Milim biakna-in a kipiasa an khat peuhpeuh na nek loh nading uh, sasi na nek loh nading uh, a si luangkhiasak loin a kigawlmek sa khat peuhpeuh na nek loh nading uh, le numei tawh khialhna panin na kikep nading uh ahi hi. Hih thute hoihtakin zui le-uhcin note a dingin hoih ding hi. Na cidam ta un,” ci-in kigelh hi.

³⁰Tua bangin amaute paisak uh a, Antiok khua a tun uh ciangin thu um mi khempeuh khawmin amaute tungah a lai puak uh a pia uh hi.

³¹Mite in tua laikhak a sim uh ciangin a thu kigelhte hangin amaute thanuamin lungdam mahmah uh hi.

³²Judas le Silas zong kamsangte mah hi uh a, thu um mite tawh sauveipi thu kikum uh a, amaute’ lungsim thanuam sakin a thahatsak uh hi.

³³Tua lai-ah tawlkhat a taam khit uh ciangin thu uppih lawmte in lungdam takin Judas le Silas, amau a sawlte kiangah a ciahkik sak uh hi.

³⁴Ahi zongin Antiok khua-ah Paul le Barnabas taam lai uh a, midang tampite tawh kopin Topa’ thu a hilh uh hi.

³⁶Tawlkhat khit ciangin Paul in Barnabas kiangah, “Topa’ thu i hilhnasa khua tuamtuama i sanggamte kiangah va hawhkikin bang a cici uh hiam cih va en ni,” a ci hi.

³⁷Tua bangin a pai ding uh ciangin Barnabas in Johan Marka tonpih nuam a,

³⁸ahi zongin Johan Marka in a khualzin masakun a tawp dongin zui loin Pamfilia gam panin ciahsan ahih manin Paul in hoihsa lo hi.

³⁹Hih thu hangin amau tegel nakpitakin kinial uh ahih manin kikhenlawh uh a, Barnabas in Johan Marka zawnin Saipras tuikulh gam a zuan dingin teembaw tawh a pai hi.

⁴⁰Paul in zong Silas teel a, thu um mite in Topa’ khut sungah a ap khit uh ciangin,

⁴¹Syria gam le Silisia gam nawkin pai-in pawlpite hanthawnin a thahatsak hi.