Read Tedim Chin SAWLTAK 18 Bible Online

SAWLTAK 18 - Tedim Chin bible

SAWLTAK 18

¹Tua khit ciangin Athen khua panin Paul paikhia-in Korin khua-ah a tung hi.

²Tua lai-ah Pontas gam a suak, Jew mi Aquila a kici mi khat tawh a kimu hi. Gam uk Kumpipa in Jew mi khempeuh Rom khua panin a taikhiat nadingun thu pia ahih manin Aquila le a zi Prisilla pen Italy gam panin Korin khua a hong tun uh a sawt nai lo ahi hi. Tua nupate tawh a kimu dingin Paul zong a inn uhah va hawh a,

³tua nupate mah bangin Paul zong puanbuk bawl nasep tawh a nungta ahih manin amaute tawh omkhawmin na a semkhawm uh hi.

⁴Sabbath ni simin kikhopna inn-ah limtakin thu gen a, Jew mi le Grik mite in thu a up nadingun a hanciam hi.

⁵Masedonia gam panin Silas le Timoti hong tun ciangin Paul in a hun neih khempeuh thuhilhna-in zang a, Jesuh pen Khrih ahi hi, ci-in Jew mite kiangah teltakin a gen hi.

⁶Jew mite in ama thuhilhna nialin a gensiat uh ciangin Paul in a puan tunga leivui bangte sinsanin, “Pasian tawh kikhenin siatna na tuah uhleh nomau khialhna hi a, kei nong ngawh nading uh om lo hi. Tu a kipanin Gentail mite kiangah thu ka hilh ding hi,” a ci hi.

⁷Tua ahih ciangin Paul in tua Jew mite nusia-in Pasian a bia Gentail mi Titus Justas’ inn-ah a tung hi. Tua mipa’ inn pen kikhopna inn gei mahmah ahi hi.

⁸Kikhopna inn ukpa Krispas le a innsunga om mi khempeuh in Topa thu um uh a, Korin khua-a om midang tampite in zong thuhilhna ngai-in um uh a, tui a kiphum uh hi.

⁹Zan khat, Paul in maang mu a, a maang sungah Topa in, “Lau kei in. Lungkia kei inla, na thugen zom in.

¹⁰Hih khua sungah keima mi tampi om a, nang hong ompih ka hih manin kuamah in nang bangmah hong cih lo ding hi,” a ci hi.

¹¹Tua ahih manin tua khua-ah kum khat le alang sung omlai-in mite kiangah Pasian thu a hilh hi.

¹²Rom khutnuai-ah Akhaia gam sung a uk dingin Gallio a kikoih ciangin Jew mite hong kikaikhawm uh a, Paul manin zumah a paipih uh hi.

¹³Amaute in, “Hih mipa in ngeina om lopi-in mite in Pasian a biak nadingin zol ding hanciam hi,” a ci uh hi.

¹⁴Paul in a kam ka-in thugen dingin a kipat laitakin Gallio in Jew mite kiangah, “Hih thu pen gamtat khialhna ahi a, gitloh tatna ahi zongin a gamtatna hang hileh no Jew mite’ thugente limtakin kong ngaih ding a kilawm mah ahi hi.

¹⁵Ahi zongin hih thu pen kam zatzia, min le na ngeina uh a kituh na hih manun nomau mah in khentawm un. Tua bang thute keimah in ka hong khen kei ding hi,” a cih khit ciangin,

¹⁶zum panin amaute a hawlkhia hi.

¹⁷Amaute in kikhopna inn ukpa Sosthenes manin, zum mai-ah satgawp uh a, ahi zongin Gallio in themkhat zong phamawh sa lo hi.

¹⁸Korin khua-ah ni tampi sung thu um mite tawh Paul omkhawm lai a, tua khit ciangin amaute mangpha khakin Syria gam a zuan dingin Prisilla le Aquila tawh teembaw a tuang uh hi. Paul in Pasian tungah thuciamnasa nei ahih manin teembaw a tuan ma-un Korin khuapi teembaw khawlna Kenkhrea munah a sam a metsak hi.

¹⁹Tua bangin a pai uh ciangin Efesa khua tung uh a, Paul zong kikhopna inn-ah pai-in Jew mite tawh thu a kisel uh hi. Tua khua-ah Prisilla le Aquila-te nupa a taam lai nading Paul in a gen hi.

²⁰Thu um mi pawlkhatte in ni tampi sung Paul a taam nadingin gen uh a, ahi zongin amah taam nuam lo hi;

²¹a dinkhiat ding ciangin, “Pasian deihna ahih nakleh note kiangah ka hong hawhkik ding hi,” ci-in vaikhakin, Efesa khua panin teembaw tawh a ding khia hi.

²²Sisaria khua a tun ciangin Jerusalem khua-ah pai-in pawlpite va hopih a, tua ciangin Antiok khua-ah a pai hi.

²³Antiok khua-ah tawlkhat a taam khit ciangin Galatia gam le Frigia gam sungah pai-in thu um mi khempeuh a va thakhauhsak hi.

²⁴Alexandria khuami Apollos a kici Jew mi khat, Efesa khua-ah hong pai hi. Amah thugen siam mahmah a, Lai Siangtho zong a thei mahmah khat ahi hi.

²⁵Amah in Topa’ zia thei a, lawp mahmahna tawh Jesuh’ thu a mantakin a hilh hi. Ahi zongin amah in Johan’ tuiphumna thu bek a thei hi.

²⁶Amah in kikhopna inn sungah hangtakin thu hilh ding kipan a, Prisilla le Aquila in ama thuhilhna a zak uh ciangin a omna uh inn-ah Apollos ciahpihin, Pasian’ thu paiziate a mantakin a hilhtel uh hi.

²⁷Akhaia gamah Apollos pai ding a sawm ciangin, Akhaia gam a om thu um mite in limtakin a na pawlbawl nading uh deihna tawh Efesa khua-a om thu um mite in lai a khak uh hi. Amah a tun ciangin Pasian hehpihna hangin Jesuh thu a um tua lai-a om mite a dingin nuamtuam mahmah hi.

²⁸Bang hang hiam cih leh amah in Lai Siangtho sung siksanin Jesuh pen Khrih ahi hi, ci-in mihon lakah Jew mite tawh thu kiselin a zogawp hi.