Read Tedim Chin SAWLTAK 23 Bible Online

SAWLTAK 23 - Tedim Chin bible

SAWLTAK 23

¹Paul in ulian kikhawmte limtakin enin, “Lawmte aw, tuni ciang dong ka nuntak sung tawntung, Pasian mai-ah kisuanna ka nei het kei hi,” a cih leh

²siampi lianpen pa Ananias in Paul gei-a omte kiangah, “A muk na betsak un,” a ci hi.

³Paul in, “Leikang tawh a kizut kulh tawh a kibang pa aw, Pasian in nang hong beenggawp taktak ding hi. Keimah thusitna-ah Thukham a zui ding pa hinapi-in Thukham zui loin kei hong kibet nadingin thu na pia hi,” a ci hi.

⁴Paul gei-a om mite in, “Pasian’ siampi lianpen pa na zahko hi,” a cih ciangun

⁵Paul in, “Lawmte aw, siampi lianpen pa ahihlam ka thei kei hi. Lai Siangtho in, ‘Na mite uh a ukpa na gensia kei ding uh hi,’ ci hi,” ci-in a dawng hi.

⁶Paul in tua uliante lakah Saddusi mi le Farisi mi a omlam a muh ciangin amaute kiangah, “Lawmte aw, kei pen Farisi mite’ suan ahi Farisi mi ka hi hi. Mi site hingkik ding hi, ci-in lamenin upna ka neih manin hih lai-ah thusitna ka thuak hi,” a ci hi.

⁷Tua thu a gen khit phetin Saddusi mite le Farisi mite kitawngpah uh a, tua uliante khen nih a pha uh hi.

⁸(Bang hang hiam cih leh Saddusi mite in mi a sih khit ciangin hingkik nawn lo ding hi. Vantung mi ahi a, kha ahi zongin om lo hi, ci uh hi. Ahi zongin Farisi mite in hih thu thumte om hi, ci-in a um uh hi.)

⁹Amau’ kitotna awging hupha semsem a, Farisi mite pawlsung a om Thukham hilh siate pawlkhat hong dingin nakpitakin hong pau uh a, “Hih mipa tungah khialhna themkhat zong om lo hi. Vantung mi ahi a, Pasian’ sawl khat peuhpeuh in ahi zongin ama tungah thu a gen hi khathei ding hi,” a ci uh hi.

¹⁰Amaute’ kitotna hong husia semsem ahih manin amaute in Paul balthanggawp kha ding hi, ci-in galkap mangpa lunghimawh hi. Tua ahih manin galkapte in Paul va kaikhia-in galkap inn-ah a paipih nadingun thu a pia hi.

¹¹Tua zanin Paul kiangah Topa hong ding a, “Hang takin om in. Hih Jerusalem khua sungah keima thu genin teci na pan’ mah bangin Rom khuapi-ah zong keima thu genin teci na pang ding hi,” a ci hi.

¹²A zing ciangin Jew mite pawlkhat kikhawm uh a, Paul i thahkhit ciang bekin anne tuidawn pan ding hi hang, ci-in kiciamna a nei uh hi.

¹³Hih bangin a vaihawm mihing sawmli val bang a pha uh hi.

¹⁴Siampi liante le upate kiangah pai uh a, “Paul ka thahkhit mateng uh anletui ka nekloh nadingun khauhtakin thuciamna khat ka nei khin uh hi.

¹⁵Tu-in note le uliante in galkap mangpa tungah thu zasak unla, Paul’ thu a cingin a theinuam kineihin, note kiangah Paul hong paipihsak nadingin na ngen un. Hih lai mun hong tunma-in kote in lamkalah ka na that ding uh hi,” a ci uh hi.

¹⁶Ahi zongin hih a thahsawmna thu uh, Paul sanggamnu’ tapa in za ahih manin galkap inn-ah va pai-in Paul kiangah a va gen hi.

¹⁷Tua ciangin Paul in galkapbute khat samin ama kiangah, “Galkap mangpa kiangah hih tangvalpa va paipih in. Amah in thugen ding khat a nei hi,” a ci hi.

¹⁸Galkap bupa in zong galkap mangpa kiangah va paipih a, “Hih tangvalpa in nang tungah gennop khat hong nei ahih manin nang kiangah kong paipih nadingin thongkia Paul in a hong sawl hi,” a ci hi.

¹⁹Galkap mangpa in zong a khutin tua pa lenin amau gel guak paikhia uh a, “Bang hong gennuam na hi hiam?” ci-in a dong hi.

²⁰Tangvalpa in, “Uliante in Paul’ thu a cingin a theinuam kineihin, zing ciangin amaute kiangah Paul na paisak nadingin Jew mi aana neite in nget ding a thukim uh hi.

²¹Ahi zongin lamkalah Paul a pangsim dingin mihing sawmli val bang om uh ahih manin amaute’ hong ngetna pia kei in. Tua mihing sawmlite in Paul a thahkhit mateng uh anletui a nekloh nadingun kiciamna khat bawlkhin uh hi. Amaute a kithawisa-in om uh a, nangma thupiak ding bek a ngak uh ahi hi,” a ci hi.

²²Tua ciangin galkap mangpa in tangvalpa kiangah, “Kei kiangah hih thu nong kohna thu kuamah theisak kei in,” ci-in a vaikhak khit ciangin a ciahsak hi.

²³Tua ciangin galkap mangpa in galkapbute nih samin, “Sisaria khua-ah a pai ding galkap zanih sam unla, sakol tung tuang galkap sawmsagih le teitawi galkap zanih tawh zong pai unla, tuzan nai kua hunin ding khia un.

²⁴Paul’ tuan nading sakol pawlkhat zong keng unla, Menzipa Feliks kiangah hoihtakin va tunpih un,” a ci hi.

²⁵Tua ciangin galkap mangpa in hih a nuai-a bangin lai khat gelh hi:

²⁶“A Lian Menzipa aw, Keimah Klaudias Lysias in hopihna lai ka hong gelh hi.

²⁷Jew mite in hih mipa manin that dektak uh hi. Rom gammi ahihlam ka theih ciangin ka galkapte tawh pai-in ka va honkhia hi.

²⁸Amaute’ mawhsakna bang thu ahi hiam, ci-in theinuam ka hih manin thusit dingin amau’ uliante kiangah ka paipih hi.

²⁹Thong khiat nading le sihna thuak nadingin khialhna a bawlna bangmah ka mu kei hi. A mawhsaknate uh amau’ thukham ngeina tawh kisai hi lel hi.

³⁰Jew mite pawlkhat in amah a thahsawmna thu hong kikoh ciangin nangma kiangah puak dingin ka ngaihsun hi. Amah a mawhsakte in nangma mai-ah thu a hong gen nadingun amaute kiangah ka gen hi,” ci-in a gelh hi.

³¹Galkapte zong a thu ngahna bangun gamta uh a, tua zanin Paul paikhiatpihin Antipatris khua dong a paipih uh hi.

³²A zing ciangin khe galkapte kilehkik uh a, sakol tung tuang galkapteng bek a kha suaksak uh hi.

³³Amaute in Sisaria khua-ah Paul tunpih uh a, menzipa kiangah a lai puak uh pia-in, ama tungah Paul a ap uh hi.

³⁴Menzipa in tua laikhak sim a, koi lai gammi na hi hiam, ci-in Paul a dong hi. Amah in Sisaria gammi ahihlam a theih ciangin,

³⁵“Na langte hong tun ciangin thu kong sit ding hi,” ci-in a gen khit ciangin, Herod in a lam inn sungah Paul koihin a cin nadingun thu a pia hi.