Read Tedim Chin SAWLTAK 3 Bible Online

SAWLTAK 3 - Tedim Chin bible

SAWLTAK 3

¹Nikhat, thunget hun nitak nai thum laitakin biakinn-ah Peter le Johan a pai uh hi.

²Kongpi Hoih a kici gei-ah a suahtung a kipan a khebai mi khat na om hi. Biakinn-ah a pai mite tung panin sum a ngen dingin nisimin hih kongpi gei-ah amah hong kikoih zel hi.

³Peter le Johan, biakinn-ah a hong pai a muh ciangin sum a na ngen hi.

⁴Amau tegel in tua mipa limtakin en uh a, Peter in, “Kote hong en dih in,” a ci hi.

⁵Bang khat peuhpeuh ngah ding, ci-in kilamen ahih manin amaute a en hi.

⁶Peter in ama kiangah, “Sum ka nei peuhmah kei hi; ahi zongin ka neih kong pia ding hi. Nazareth khuami Jesuh Khrih min tawh, dingin lam na pai nadingin thu ka hong pia hi,” a cih khit ciangin,

⁷a taklam khutin lenin kaito a, thakhat thu-in a khe le a siakmitte hong khauhpah hi.

⁸Tua ciangin amah hong diangin dingto a, lam a pai kawikawi hi. Tua ciangin biakinn-ah amaute zui a, lam paikawm diangkawmin Pasian a phat hi.

⁹Mi khempeuh in amah lam pai-in Pasian a phatna mu uh a,

¹⁰biakinn Kongpi Hoih gei-ah sum ngenin a tupa hi, ci-in a thei uh hi. Ama tunga thupiang a muh uh ciangin lamdang a sa mahmah uh hi.

¹¹Tua mipa in Peter le Johan beel cinten a, mi khempeuh in hih thupiang lamdangsa uh ahih manin amaute’ omna Solomon’ Talap a kici-ah mite a hong tai uh hi.

¹²Peter in hih mite a muh ciangin amaute kiangah, “Ka mipih Israel mite aw, bang hangin hih thupiang lamdangsa a, bang hangin ko hong hici et na hi uh hiam? Hih mipa lam ka paisak theihna uh, komau’ vang le komau’ hoihna hang sa na hi uh hiam?

¹³I pupite Abraham, Isaac, le Jakob Pasian in a nasem Jesuh tungah ama vangliatna a pia hi. Note in aana neite khut sungah tua Jesuh na pia uh a, Pilat mangpa in amah khah dingin a ngaihsut khit ciang nangawnin Pilat’ maitang mahah amah na nial teitei uh hi.

¹⁴Amah mi hoih mi siangtho hinapi-in, amah na nial zawsop uh a, mi that khat a khahkhiat nadingin Pilat kiangah na ngen uh hi.

¹⁵Tua ahih ciangin mite tungah nuntakna a piapa na that uh a, ahi zongin sihna panin Pasian in amah hingkiksak hi. Ko tegel pen hih thu a thei teci ka hi uh hi.

¹⁶Hih Jesuh min’ vangliatna in hih khebai mipa tungah thahatna a pia ahi hi. Note khempeuh in na theih uh mah bangin hih mipa bangzah takin khebai ahih hangin Jesuh upna le ama min hangin hih mipa in dam sianthona a ngah ahi hi.

¹⁷“Tua ahih ciangin sanggamte aw, note le na makaite uh hih bangin Jesuh tungah na gamtatna uh na theih lohna hang uh hi, ci-in ka thei hi.

¹⁸Ama Khrih in a thuak nading thu, Pasian in tanglai pekin kamsangte khempeuh tungtawnin genkhol a, tu-in hih bangin a thugen kholhna a hong tungsak ahi hi.

¹⁹Tua ahih ciangin na mawhnate uh hong sawpsiangsak theih nading, Topa kiang panin a hong pai lungsim nopna hun na ngah theih nading uh le note a dingin a sehsa Jesuh Khrih a hong sawltheih nadingin na mawhna uh kisik unla, Pasian kiang zuan un.

²¹Pasian in ama kamsang mi siangthote tungtawnin tanglai-in a genkholhsa bangin, na khempeuh a thakin a kibawl hun dong mateng vantungah Jesuh a om ding ahi hi.

²²Bang hang hiam cih leh Moses in, ‘Kei a hong sawl mah bangin note sung mah panin note a’ ding kamsang khat Topa na Pasian un note kiangah hong sawl ding hi. Ama hong thugen khempeuh na mang ding uh hi.

²³Tua kamsangpa’ thugen a mang lo khempeuh, a Jew mipihte kiang panin kikhen khia-in kisusia ding hi,’ ci hi.

²⁴Samuel a kipan ama nunga hong piang kamsang khempeuh in tu laitak a thupiangte mah genkhol ciat uh hi.

²⁵Pasian in Abraham kiangah, ‘Na suan na khakte thupha ka piak bangin leitung mi khempeuh thupha ka pia ding hi,’ ci ahih manin, Pasian in ama kamsangte tungtawnin a thuciamte khempeuh eite a’ ding hi a, Pasian in i pu i pate tawh a thuciamte, eite in zong a ngah ding ihi hi.

²⁶Eite khempeuh i gitlohna panin kikheelin thupha a hong piaktheih nadingin Pasian in a Nasem dingin Jesuh teelin, eite kiangah a hong sawl masa ahi hi,” ci-in thu a gen hi.