Read Tedim Chin SAWLTAK 5 Bible Online

SAWLTAK 5 - Tedim Chin bible

SAWLTAK 5

¹Ahi zongin Ananias a kici pasal khat le a zi Sapfira a kici, nupa kop khat om uh hi. A neihsa uh pawlkhat zuak uh a,

²ahi zongin a zi tawh thukimin a sumte pawlkhat im-in, a dangteng sawltakte kiangah a va ap hi.

³Peter in, “Ananias aw, bang hangin Satan’ thu-in gamta a, na lo zuak man sumte pawlkhat kem simin, Kha Siangtho khem na hi hiam?

⁴Tua lo na zuakma-in nangma a’ hi a, na zuakkhit ciangin a sum zong nangma a’ mah ahi hi. Tua hinapi-in bang hangin tua bangin gamtat ding ngaihsun peuhmah na hi hiam? Mite a khem hi loin Pasian a khem na hi hi,” a ci hi.

⁵Ananias in hih thu a zak phetin thakhatin si-in puksukpah a, hih thu a za mi khempeuh a lau mahmah uh hi.

⁶Tua ciangin tangvalte hong kipanin puan tawh a luang tun uh a, puakhia-in a va vui uh hi.

⁷Tua khit nai thum bang ding ciangin a zi hong pai a, ahi zongin tua lai-a thupiang bangmah thei lo hi.

⁸Peter in tua nu kiangah, “Nang le na pasal in na lo zuak man uh sum pen a vekpi-in hih zah mah ahi hiam, hong gen dih in,” ci-in a dong hi. Amah in, “Hi hi, tua zah mah hi,” ci-in a dawng hi.

⁹Tua ciangin Peter in tua nu kiangah, “Bang dingin na nupa-un Topa’ Kha Siangtho ze-et ding thukim khawm na hi uh hiam? En in, na pasal a vuite kongkhak gei mahmahah om uh a, nang zong hong puakhia ding uh hi,” a ci hi.

¹⁰Amah zong thakhat thu-in si-in Peter khe kiangah a puksuk hi. Tua ciangin tangvalte hong lut uh a, a sih khitlam a muh uh ciangin puakhia-in a pasal’ gei-ah a phum uh hi.

¹¹Pawlpi mi khempeuh le hih thu a za mi khempeuhte nakpitakin a lau uh hi.

¹²Sawltakte in mite lakah lim le nalamdang tampi a bawl uh hi. Thu um mi khempeuh Solomon’ Talap-ah kikhawmin a om uh hi.

¹³Midangte in thupi sa-in hoihsa mahmah uh a, ahi zongin amaute pawlpih taktak ngam lo uh hi.

¹⁴Topa’ thu a um numei pasal tampi tak hong kibehlaplap uh hi.

¹⁵Hih bangin sawltakte’ nasepna hangin kongzingah cinate hong kipua a, Peter hong pai ciangin a liim in cinate a liahkhak theih nading deihin a lupna le a lupna pheekte uh tawh lam gei-ah a koih uh hi.

¹⁶Jerusalem khua kiima om khuapite panin mite hong pai-in, cinate le dawivei mite hong paipih uh a, a vekpi-in damna a ngah uh hi.

¹⁷Tua ciangin siampi lianpen pa le amah tawh a kipawl tua lai-a Saddusi mite in sawltakte haza-in thangpai uh ahih manin thu bawl ding a ngaihsun uh hi.

¹⁸Tua ahih manin sawltakte manin thong sungah a khum uh hi.

¹⁹Ahi zongin tua zanin Topa’ vantungmi khat in thong kongkhakte hong a, sawltakte a paikhiatpih khit ciangin amaute kiangah,

²⁰“Biakinn-ah pai unla, hih nuntak thakna thu mite kiangah va gen un,” ci-in a vaikhak hi.

²¹Ama gen mah bangin sawltakte zong zingsang ciangin biakinn-ah pai-in thuhilh ding a kipan uh hi. Siampi lianpen pa le ama kikholhpihte in ulian kikhopna a cingtaak khat a omtheih nadingin Jew mi upa khempeuh a kikhop nadingun a sam uh hi. Tua khit ciangin thong panin sawltakte va kai-in uliante mai-ah a hong paipih nadingun palikte a sawl uh hi.

²²Ahi zongin thongah palikte a va tun uh ciangin sawltakte na om lo hi. Tua ahih manin uliante kiangah kileh kikin,

²³“Thongah ka tun uh ciangin a kongkhakte limtak mahin tawh kikalh a, thongcingte in zong kongpi-ah limtak mahin a na cing ka mu uh hi. Ahi zongin thong kong ka hon uh ciangin a sungah kuamah na om lo hi,” ci-in a zasak uh hi.

²⁴Biakinn ukpa le siampi liante in hih thu a zak uh ciangin hih sawltakte a bangci thu hi ding hiam, ci-in lamdang a sa mahmah uh hi.

²⁵Tua laitakin mi khat hong pai-in amaute kiangah, “Thong sungah na khum uh mite in tu mahmahin biakinn sungah thuhilhin om uh hi,” ci-in a hong gen hi.

²⁶Tua ciangin biakinn ukpa le a mite va pai-in sawltakte hong paipih kik uh hi. Mihonte in suang tawh amaute a dengawp khak ding lau uh ahih manin sawltakte ngongbawl loin thudam tawh a paipih uh hi.

²⁷Tua ciangin uliante mai-ah sawltakte dingsak uh a, siampi lianpen pa in sawltakte kiangah thu genin,

²⁸“Hih mipa’ min tawh thu na hilh nawn loh nadingun khauhtakin thu kong pia uh hi. Tu-in na gamtatnasate uh thei un. Jerusalem khuasung khempeuhah thu na genthang uh a, ama sihna pen kote nong ngawh nuam uh hi,” a ci hi.

²⁹Ahi zongin Peter le sawltak dangte in, “Mite’ thu sangin Pasian’ thu ka mangzaw ding uh hi.

³⁰Note in singlamteh tungah Jesuh khai-in na thah khit uh ciangin i pu i pate’ Pasian in sihna panin amah hingkiksak khinzo hi.

³¹Israel mite kisik kikin Pasian in a mawhna uh a maisak theih nadingin Ukpi le Honpa-in tua Jesuh bawlin ama taklamah a tusak hi.

³²Hih thute thei-in teci a pangte pen ko sawltakte bek hi loin Kha Siangtho tawh zong ka hi uh a, tua Kha Siangtho pen amah a um mite tungah Pasian in a khongin a piak ahi hi,” ci-in a dawngkik uh hi.

³³Uliante in hih thu a zak uh ciangin heh mahmah uh ahih manin sawltakte thah dingin a ngaihsun uh hi.

³⁴Ahi zongin amaute sung panin Farisi mi Gamaliel, Thukham hilh sia khat ahi, mi khempeuh in zong a zahtakbawl mipa khat hong ding a, tawlkhat sung sawltakte a kipusuahpih nadingin thu pia a,

³⁵tua khit ciangin a lawm uliante kiangah, “Israel mite aw, hih mite na bawl nading uh tawh kisai-in limtakin kidawm un.

³⁶Tuma lam tawlkhat lai-in Thudas a kici mi khat hong khang hi. Mi lian khat ka hi hi, ci-in gen a, mihing zali ding bang in amah pawlpih uh hi. Ahi zongin amah kithatin, a nungzui khempeuh kithehthang a, ama vai beita hi.

³⁷Hih thu a pian’ khit ciangin, mi bangzah pha hiam, ci-in gam sung mi khempeuh a kisim laitakin Galilee mi Judas a kici mi khat hong khang leuleu a, amah in zong nungzui mihonpi mah a nei hi. Amah zong kithat leuleu a, a nungzuite kithehthangin maimang hi.

³⁸Tu-in zong tua bangmahin thu hong piang leuleu hi. Note kiangah kong gennop thu in: Hih mite bangmah cih kei unla, hici omsak lel un. Mihingte’ bawltawm vaihawmna ahihleh ama thu-in hong bei lel ding hi.

³⁹Ahi zongin Pasian kiang panin a hong pai thu ahihleh na zo zo ngei kei ding uh hi. Pasian tawh a kido na hi ding uh hi,” ci-in a gen hi.

⁴⁰Tua ahih manin uliante in Gamaliel’ thugen a mang uh hi. Sawltakte samkik sak uh a, a sat khit uh ciangin Jesuh’ min tawh thu a hilhkik ngei loh nadingun thu a pia uh hi. Tua khit ciangin sawltakte a khah uh hi.

⁴¹Uliante omna panin sawltakte paikhia uh a, Jesuh’ hangin mindaina a thuak dingin Pasian in kilawm hong sa hi, ci-in ngaihsun uh ahih manin a lungdam mahmah uh hi.

⁴²Nisimin biakinn sung le mite inn-ah thu hilh uh a, Jesuh, Khrih hi, cih Lungdamna Thu a gengen uh hi.