Read Tedim Chin SAWLTAK 6 Bible Online

SAWLTAK 6 - Tedim Chin bible

SAWLTAK 6

¹Tua khit ciangin thu um mi hong tam tektek a, Jew mite le Grik pau a zang Jew mite kikalah kiphunsanna thu hong om hi. Grik pau a zang Jew mite in, “Annek tuidawn, sumlepai hawmna-ah ka meigong numeite uh hong kipiaksak lo hi,” ci-in lungkim lo uh hi.

²Tua ahih manin sawltak sawm le nihte in thu um mi khempeuh samin kaikhawm uh a, “Kote in Pasian’ thu hilh ding don man lo liangin annek tuidawn sumlepai vai-ah kong manlah ding uh kilawm lo hi.

³Tua ahih ciangin sanggamte aw, note lak panin pilna le Kha Siangtho a nei mihing sagih hong kitengkhia unla, hih thute a vaihawm dingin i koih ding hi.

⁴Tua hileh kote in ka hun khempeuh uh thungetna le thuhilhna-in kong zang thei ding uh hi,” a ci uh hi.

⁵A vekpi-un sawltakte’ thugente thukimpih uh ahih manin, Kha Siangtho tawh kidimin upna a nei Stefen, Filip, Prokhoras, Nikanor, Timon, Parmenas, le Antiok khua pan Gentail mi ahi Jew biakna a zui Nikolas a teel uh hi.

⁶Amaute in sawltakte kiangah hih mite paipih uh a, sawltakte in a lu tung uhah a khut uh nga-in thu a ngetsak uh hi.

⁷Tua bangin Pasian’ thu kizelin hong khang semsem hi. Jerusalem khua sungah thu um mi tampi tak hong kibehlap a, siampi tampi tak in zong Lungdamna Thu a hong um uh hi.

⁸Pasian in Stefen’ tungah thupha tampi tak pia-in vangliatna lianpi neisak a, amah in mite lakah lim le nalamdang lianpipi a bawl hi.

⁹Ahi zongin mi pawlkhat in Stefen langpan’ uh hi. Tua mite pen mite in, “Sal Suakta Mite,” a cihte pawl uh hi a, Sairin khua le Alexandria khua panin a hong pai Jew mite ahi uh hi. Hih Jew mite, Silisia le Asia gam pan a hong pai Jew mite tawh kipawlin Stefen tawh thu kisel dingin hong kipan uh hi.

¹⁰Ahi zongin Kha Siangtho in Stefen tungah pilna guan ahih manin amaute in thusel zo lo uh hi.

¹¹Tua ciangin amaute in mi cialin sumgolh pia uh a, “Moses le Pasian langpangin thu a genna ka za uh hi,” cisak uh hi.

¹²Amaute in hih bangin zuauna tawh mihonte, upate, le Thukham hilh siate a holhthawh uh hi. Tua ahih manin amaute hong pai-in Stefen man uh a, uliante mai-ah a hong paipih uh hi.

¹³Tua ciangin zuauthu a gen dingin mi pawlkhat hong paipih uh a, “Hih mipa in a siangtho i biakinnpi le Moses Thukham gensia tawntung hi.

¹⁴Hih Nazareth khuami Jesuh in biakinnpi phelgawpin, Moses tung pek panin a hong kipan ngeina khempeuh khelmang ding hi, ci-in a thuhilhna ka za uh hi,” a cisak uh hi.

¹⁵Ulian kikhopna sunga a kihel mi khempeuh in Stefen en uh a, a maitang pen vantungmi maitang tawh kibang hi, ci-in a mu kim uh hi.