Read Tedim Chin ROM 14 Bible Online

ROM 14 - Tedim Chin bible

ROM 14

¹Upna neu mite pawlbawl unla, na ngaihsutna uh a kituah kei leh zong mawhsak kei un.

²Mi pawlkhat in na khempeuh ka nektheih ding hi, ci-in ngaihsun uh hi; ahi zongin upna neute in anteh bek ne ngam uh hi.

³Tua ahih manin a ne mite in a tang mite simmawhbawl kei hen la, a tang mite in zong a ne mite simmawhbawl kei hen. Bang hang hiam cih leh a ne mite zong Pasian in a san mite mah ahi hi.

⁴Mi khat’ nasemte tungah kua in thu khen thei ding na hi uh hiam? A gina le a ginalo a khen ding pa pen amau’ Topa ahi hi. A Topa un hoih hi, a cih leh a kipsak zawh nading vangliatna nei ahih manin a kip hi lel ding uh hi.

⁵Mi pawlkhatte in ni khatpeuh adang sangin thupi zaw hi, ci-in ngaihsun uh a, pawlkhatte in ni khempeuh kibangkim hi, ci-in ngaihsun uh hi. Tua ahih manin a kuamah peuh in amau’ hoihsakna thu ciantakin thei ta uh hen.

⁶Ni khatpeuh thupi diak hi, ci-in a tang mite in Topa a pahtawina-in a tang ahi uh hi. An khempeuh a ne mi in zong Pasian’ tungah lungdamna ko-in ne uh ahih manin Topa a pahtawina mahin a ne uh ahi hi. Nek dingin kilawm lo hi, ci-in a ne lo mite in zong Pasian tungah lungdamna mah ko ahih manin Topa a pahtawina mahin a ne lo uh ahi hi.

⁷Ama a’ ding bekin kuamah nungta lo a, ama a’ ding bekin kuamah si lo hi.

⁸I nuntak leh Topa a dingin a nungta ihi a, i sih leh zong Topa a’ ding mahin a si ihi hi. Tua ahih manin i si a, i hing zongin Topa a’ ihi hi.

⁹Hih thu hangin Khrih pen a site le a hingte’ Topa ahih theih nadingin hong si-in hong nungtakik hi.

¹⁰Tua ahihleh bang hangin na Khristianpihte uh tungah thu khen a, bang hangin simmawhbawl thei na hi uh hiam? Thukhenna a thuak dingin Pasian’ mai-ah eite khempeuh a ding ciat ding ihi hi.

¹¹Lai Siangtho sungah, “Kei pen a nungta ka hih mah bangin ka mai-ah mi khempeuh hong kun ding a, Pasian ka hihna thu mi khempeuh in pulak taktak ding uh hi, Topa in ci hi,” ci-in a kigelh hi.

¹²Tua ahih manin a kuamah peuh in i gamtatna ciat Pasian’ mai-ah a va kigentel ciat ding ihi hi.

¹³Tua ahih manin khatlekhat kimawhsakin thu kikhen kei unla, i Khristianpihte i puksak khak loh nading, a dongtangsak ihih khak loh nadingin ngaihsun ciat ni.

¹⁴Topa Jesuh tawh kipawlin a lungsim ka theihna tawh, na khat peuhpeuh ama thu-in a dawizek om het lo hi, ci-in teltakin ka thei hi. Ahi zongin mi khatpeuh in dawizek hi, ci-in a ngaihsut leh ama a dingin a dawizek hi pah hi.

¹⁵An khatpeuh na nekna uh hangin na Khristianpihte’ lungnopmawhna na piansak uhleh itna lungsim tawh a gamta na hi nawn kei uh hi. Na an nekna uh tawh, Khrih in a sihlawh mite’ siat nading piangsak kei un.

¹⁶Tua ciangin note in hoih na sak uh thute, midangte in a sia-in a genkhak loh theih nadingun na gamta un.

¹⁷Bang hang hiam cih leh Pasian’ Ukna pen nekledawn tawh a kisai thu hi lo a, Kha Siangtho hangin i ngah Pasian’ deih bangin gamtatna, kilemna, lungdamna, cihte hizaw hi.

¹⁸Hih bang danin Khrih’ na a sem mite in Pasian lungdamsak a, mite zong a lungkimsak uh hi.

¹⁹Tua ahih ciangin mi tawh kilem theih nading le kha thu-ah khatlekhat thahatna i kipiak theih nading thute hanciam ciat ni.

²⁰Annek huhau-in Pasian’ sepsa thute susia kei ni. An khempeuh a kine thei ding ahi hi; ahi zongin tua nekna hangin mi khat peuhpeuh a pukding ahihleh a khial ihi hi.

²¹Midangte in a puklawh theih annekna, zunekna, le na khat peuhpeuh i kikep ding a man pen ahi hi.

²²Hih thu-ah no’ upna le no’ ngaihsutnate, Pasian tawh note’ kikal thu hisak un. Amau lungsim sungah man a sak bangun a gamta zote pen a lung uh nuam mahmah hi.

²³Ahi zongin lunghimawh pipi-in a ne a om leh, a upna uh tawh kizui-in a gamta hi lo uh ahih manin Pasian in tua bang mite a mawhsak ding hi. I upna bangin gamtat lohna peuhpeuh mawhna ahi hi.