Read Tedim Chin ROM 15 Bible Online

ROM 15 - Tedim Chin bible

ROM 15

¹Upna lamah a thahat eite in upna zawngkhalte’ ginat lohna i thuakpih ding kilawm hi; eima ut bangin i gamta kei ding hi.

²Midangte a upna uh hong khangin, mihoih hong suahtheih nadingun i gamta ciat ding hi.

³Bang hang hiam cih leh Khrih zong ama nopsak theih nadingin gamta lo zaw hi. Lai Siangtho sungah, “Note hong kisimmawhna thute kei tungah hong tu hi,” ci-in a kigelh hi.

⁴Lai Siangtho sungah a om thu khempeuh pen eite hilh nading, eite in lametna nei-in i thuakzawh nading, le i thahat theih nadingin a kigelh ahi hi.

⁵Note in lungsim kikhatin i Topa Jesuh Khrih’ Pa ahi Pasian na phatkhawm theih nadingun Pasian in thuakzawhna le thahatna hong pia hen la, Jesuh Khrih deihna bangin gamta-in khatlekhat kithutuak takin hong omsak tahen.

⁷Tua ahih ciangin Khrih in note hong san mah bangin midangte in Pasian a phattheih nadingun note khatlekhat na kisang un.

⁸Hih banga kong genna pen, Pasian thuman hi, ci-in a kilat nadingin pupite tungah Pasian’ thuciamna a tungsak dingin, Jew mite hoih nading,

⁹le Gentail mite in zong ama hehpihna hangin Pasian a phattheih nadingun Khrih a hong paina hang ahi hi. Bang hang hiam cih leh Lai Siangtho sungah, “Tua ahih ciangin Gentail mite lakah ka lungdamna nang tungah ka hong ko ding a, nangma min phatna late ka sa ding hi,” cihna le

¹⁰tua ciangin, “Gentail mite aw, ama mite tawh lungdam khawm un,” cihna le

¹¹tua ciangin, “Gentail mi khempeuh aw, Topa phat un; mi khempeuh aw, amah phat un,” cihna le

¹²tua ciangin Isaiah in, “Jessi’ suante khat hong khang ding a, Gentail mite a uk dingin milian hong suak ding a, ama hangin Gentail mite in lamet lungmuanna nei ding uh hi,” cihnate a kigelh hi.

¹³Kha Siangtho’ huhna tawh note’ lametna a khan semsem theih nadingin, lametna a hong piathei Pasian in, amah na upna uh hangin lungdamna le nopsakna tawh note hong kidimsak tahen.

¹⁴Thu upna sungah sanggamte aw, note mihoih hi-in, bangci gamtat ding cih thei-in, khatlekhat zong a kihilhthei dingin kong muang mahmah hi.

¹⁵Ahi zongin hih kong laikhakna sungah note’ phawkkik dingin thu ka hong genna pawlkhatte-ah kong telkheh mahmah hi. Tua bangin ka hong telkhehna thu pen,

¹⁶Gentail mite tungah na a sem dingin Khrih Jesuh sawltak hih theih nading hamphatna lianpi Pasian in kei a hong piakna hang ahi hi. Gentail mite pen Kha Siangtho in Pasian’ tungah a piak, ama santheih biakpiaknate a suahtheih nadingin Pasian kiang panin a hong pai Lungdamna Thu ka hilhna-ah siampi bangin na ka sem hi.

¹⁷Tua ahih manin Khrih tawh kikopin Pasian a’ ding na ka sepna-ah kei ka kisathei mahmah hi.

¹⁸Kha Siangtho’ vangliatna tawh lim le na lamdangte zangin, Gentail mite in Pasian thu a zuihtheih nadingun Khrih in ka thatang le ka kam ka muk a zatna thute bekah hangtakin genin ka telkheh ding hi. Tua ahih manin Jerusalem khua panin Illyrikam gam ciang dong ka zinna khempeuhah Jesuh Khrih hangin Lungdamna Thu ka hilh khinzo hi.

²⁰A tawntungin keima tup thu in: Mi khatpeuh in a patsa nasep maban, oltakin zomin a sem mi ka suahkhak loh nadingin Khrih thu a kizak ngei nai lohna munte bekah Lungdamna Thu hilh ding keima utna ahi hi.

²¹Lai Siangtho sungah zong, “Ama thu a kigen ngei nai lohna mite in mu ding uh a, ama thu a za ngei nai lote in teltheih ding uh hi,” na kici hi.

²²Note kiangah ka hong paipak theih lohna pen tu-a kong genna thu hang ahi hi.

²³Ahi zongin hih gam kiimteng a ka nasepna man khinta ing a, note tawh ka kimuhnop zong kum tampi tak pha khinta ahih manin,

²⁴tu-in note tawh kimu theita dingin ka kilamen hi. Spain gam ka paikawmin note kiang ka hong nawk nuam a, note tawh tawlkhat i kikholh khit ciangin Spain gam ka paina dingah nong huh ding uh ka ut hi.

²⁵Ahi zongin tu laitakin ahihleh Jerusalem khua-a Pasian mite a kihuhna a puak dingin ka va pai masa ding hi.

²⁶Bang hang hiam cih leh Masedonia gam le Grik gam sunga om pawlpite in Jerusalem khua-a om Pasian’ mi a zawngte huh nadingin sum piak ding amau thu-in a vaihawmtawm uh hi.

²⁷Hih pen amau ngaihsut tawmna tawh lawptakin a huh uh ahi hi. A taktakin ci lehang hih mizawngte a huh dingun a kilawm mah ahi hi. Bang hang hiam cih leh Jew mite in kha thu tawh kisai nate Gentail mite hawm uh ahih manin Gentail mite in zong leitung nate tawh Jew mite a huh dingun a kilawm khat ahi hi.

²⁸Amaute a dingin a kikaikhawm hih sumte a cingin amaute tungah apin, hih nasep ka man khit ciangin Spain gam manawh dingin ka hong paikhia ding a, note kiangah kong baang ding hi.

²⁹Note kiang ka hong tun ciangin Khrih kiang panin thupha tampi tak ka hong puak ding lamtak ka thei hi.

³⁰Lawmte aw, kei a dingin Pasian kiangah thu na hong ngetsak nadingun i Topa Jesuh Khrih i upna hang le Kha Siangtho in a hong piak itna tawh a hong thum ka hi hi.

³¹Judea gam sunga a om thu um lo mite in kei hong gimsakkhak loh nading le Jerusalem khua-a a om Pasian mite a dingin nasepnate lungdam takin a hong santheih nadingun thu hong ngetsak un.

³²Tua bangin thu hong ngetsak le-uhcin, Pasian’ deihna ahih nakleh note kiangah lungdam takin ka hong tung ding a, note tawh nuamtakin i kimu ding hi.

³³Nopsakna a hong pia Pasian in note khempeuh hong ompih tahen. Amen.