Read Tedim Chin ROM 2 Bible Online

ROM 2 - Tedim Chin bible

ROM 2

¹Tua ahih ciangin midangte’ thu a khen note pen kuakua hita le-uh cin na suakta tuan kei ding uh hi. Midangte na mawhsakna uh thute mah note zong gamta veve na hih manun, no zong a mawh mah na hi uh hi.

²Tua bang mawhna a gamtate, Pasian in gim a piak pen a man mah ahihna i thei ciat hi.

³Midangte a mawhna hangin thu khenin, no zong tua amau mawhnate mah na bawl veve uh ciangin Pasian’ thukhenna tawh kipelh tuan dingin ki-um peuhmah na hi uh hiam?

⁴Pasian migi-in thu a diah hithiatna pen na kisikkik theih nading uh a deihna ahih lamtak phawkkha loin, a migitna, a lungduaina, a hong thuaknate neu ngaihsutkha na hi uh hiam?

⁵Lungsim khauhin na kisik nop lohna hangun Pasian’ hehna le a manin a thukhenna a hong kilat Ni ding ciangin na gimthuak ding uh a nasia semsem dingin a bawl na hi uh hi.

⁶Bang hang hiam cih leh Pasian in mi khempeuh a gamtatna uh tawh kizui-in thukkik ding hi.

⁷Pahtakna, minthanna, le hin tawntungna deihin a gamtat hoih tawntung mite tungah Pasian in nuntak tawntungna pia ding a,

⁸ahi zongin ama deihna bek zui-in, a gamtat dingin a kilawm bangin gamta loin, a man loin a gamta mite tungah Pasian in ama hehna hangin gimna tungsak ding hi.

⁹Jew mi a kipan Gentail mi dongin a gamtat sia mi khempeuh in gimna le lungkhamna thuak ding uh hi.

¹⁰Tua mah bangin Jew mi a kipanin Gentail mi dongin a gamtat hoih mi khempeuh in minthanna, pahtawina, le nopsakna ngah ding uh hi.

¹¹Bang hang hiam cih leh Pasian in kuamah deidan loin mi khempeuh tungah a kibangin thu a khen hi.

¹²Moses Thukham a nei lo Gentail mite a khialh uh ciangin thukham nei lopi mahin siatna thuak uh a, Moses Thukham a nei Jew mite a khialh uh ciangin tua thukham tawh kizui-in amaute tungah thu kikhen hi.

¹³Thukham zakna bek hangin Pasian tawh kipawlna a piang hi lo a, thukham sunga Pasian’ genna bangin a gamtate bek Pasian tawh a kipawl thei ahi hi.

¹⁴Gentail mite in thukham a neih loh uh hangin amau’ ngaihsut tawmna tawh thukham’ deihna bang a gamtat uh ciangin tua thukham’ deihna a zui uh hi a, thukham a neih loh uh hangin a gamtat dingun a kilawm amau mahmah in a thei tawm uh ahi hi.

¹⁵Amau’ lungsim sungah thukham’ deihnate omkhin ahihna thu a gamtatna un hong kilangsak hi. Amau mahmah zong khat veivei hoih kisa, khat veivei sia kisa uh ahih manin, amau’ lungsim sungah thukham’ deihnate theihna omkhin ahihna thu, hih amau’ kiphawk tawmna lungsim in nakpitakin hong kitelsak hi.

¹⁶Tua ahih ciangin Pasian in mihingte lungsim sunga a ngaihsutnate uh, Jesuh Khrih thu a khensak Ni ciangin, tu-a ka hong gen bang teekteekin a hong piang ding ahi hi.

¹⁷Tu-in Jew mi ka hi uh, a ci note in thukham suan belin nei-in Pasian na theihna uh na kisialhpih uh hi.

¹⁸Thukham thei na hih manun Pasian’ deihnate na thei uh a, a man le a man lo na khenthei uh hi.

¹⁹Mittawte lam a lak ding, khuamial sunga om mite khuavak a musak ding,

²⁰mihaite a hilh ding, naupangte a hilh dingte ihi a, thukham sunga om thu khempeuh thei-in i gen khempeuh man mahmah hi, ci-in na kimuang uh hi.

²¹Midangte a hilh note in, nomau mah kihilh lo ding na hi uh hiam? “Guta kei un,” ci-in mi hilh napi-in nomau mahmah guta hi lo na hi uh hiam?

²²“Numei tawh mawh kei un,” ci-in mi hilh napi-in nomau mahmah mawh hi lo na hi uh hiam? Milimte mudah napi-in milim biakna inn sunga nate gu hi lo na hi uh hiam?

²³Note in thukham kisaktheihpih napi-in thukham palsatin Pasian’ min na daisak uh hi.

²⁴Tua ahih manin Lai Siangtho sungah, “No Jew mite’ hangin Gentail mite lakah Pasian kigensia hi,” ci-in kigelh hi.

²⁵Thukham zui le-uhcin na vun atna uh man nei takpi mah hi. Ahi zongin thukham na zuih kei uhleh na vun atna uh a mawkna a suak ahi hi.

²⁶Tua ahih manin vun ki-at lo Gentail mite in thukham a zuih nak-uhleh Pasian in vun at mah bangin ngaihsun ding hi lo ahi hiam?

²⁷Tua ahih manin thukham nei-in vun ki-at napi-in tua thukham a zui lo no Jew mite pen vun ki-at lo thukham a zui Gentail mite in thu hong khen ding hi lo ahi uh hiam?

²⁸Bang hang hiam cih leh a pualam beka Jew mi hihna le a pualam vun ki-atna lel bek in Jew mi taktak suaksak zo lo hi.

²⁹Jew mi taktak i cihte pen, a sunglamah Jew mi ahite ahi hi. A vun ki-atna uh lungsim vun atna hi a, kha thu tawh a kisai ahi hi. Thukham zui-in pumpi tung vun atna pawl hi lo hi. Hih bang mite pen mihingte in phat loin Pasian in phatin a pakta hi.