Read Tedim Chin ROM 3 Bible Online

ROM 3 - Tedim Chin bible

ROM 3

¹Tua ahihleh Jew mite in Gentail mite sangin bang hamphatna neizaw a, vun ki-atna in bang phattuamna nei ahi hiam?

²Lam tampi-ah a phattuamna a om hi. A masa penin, Pasian in Jew mite tungah ama thute a gen hi.

³Ahi zongin Jew mi pawlkhatte in Pasian’ thuciamna zui lo uh hi. Hih mi pawlkhatte’ thu palsatna hangin Pasian in a thuciamna maimangsak dingin ngaihsun na hi uh hiam?

⁴Tua bang hi het lo hi. Lai Siangtho sungah, “Thu na gen peuhmah ciangin a man na genna thu mite in hong thei ding uh a, mite in nang hong mawhsakna na genkik ciangin na kiphellah ding khat beek om lo ding hi,” ci-in a kigelh mah bangin mi khempeuh in zuau a gen zongin Pasian in thuman gen veve ding hi.

⁵Pasian a manin gamta ahihna eite’ gamtat khialhna in kilangsak semsem ahih ciangin eite in bang gen ding nei nawn ihi hiam? Pasian in eite gim a hong piak ciangin a thuman lo ahi hiam? (Hih bangin thu ka gen ciangin leitung mihingte’ kammal zat ngeite a zang ka hi hi.)

⁶Gim hong piakna-ah a thuman lo hi het lo hi. A thuman lo hi zenzen leh bangci-in leitung mi khempeuh’ thu khenthei ding ahi hiam?

⁷Keima zuautatna in Pasian a thumanna kilangsakin a min thangsak semsem ahihleh bang hangin mawhnei-in kei hong kiseh lailai ahi hiam?

⁸Thupha a pian nadingin gamtat sia gamta ni, ci ding ihi hiam? Mi pawlkhatte in tu-a bang teek mahin gen hi, ci-in hong mawhsak uh a, ka heh theihtheih nadingin kam a pau se uh hi. Tua bang mite in amau thuak dingin a kilawm gimna a thuak ding uh hi.

⁹Tua ahihleh Gentail mite sangin ko Jew mite hamphazaw ka hi uh hiam? Bangmah hamphatna nei tuan lo hi ung. Jew mite le Gentail mite a kibangin mawhna khut sungah om uh hi, ci-in ka gen khinzo hi.

¹⁰Lai Siangtho sungah zong, “Pasian’ muhna-ah mi man kuamah om lo a,

¹¹a man a thei kuamah om lo a, Pasian tawh kipawl ding a hanciam kuamah om lo hi.

¹²Kuamah in Pasian ngaihsutna nei lo uh a, na-a kimang kuamah om lo a, a hoih gamtat kuamah om lo hi.

¹³A kam uh tawh mi that uh a, a kam uh tawh zuauthu gen uh a, a kampaute uh gulgu tawh kibang hi.

¹⁴A kam uh tawh mi samsia uh a, gitlohna bek tawh a kidim uh hi.

¹⁵Mi that pakpak uh a,

¹⁶a paina khempeuh uhah lungkhamna a piangsak uh hi.

¹⁷Nopna a pian nadingin gamta ngei lo uh a,

¹⁸Pasian zahtak ding ngaihsutin nei lo uh hi,” ci-in a kigelh hi.

¹⁹Tua ahih manin kuamah in paulap a zon theih loh nading le mi khempeuh in Pasian’ thukhenna a thuak theih nadingin Thukham a nei mite khempeuh in tua Thukham a zuih ding uh ahihna thu i thei hi.

²⁰Thukham in mihingte a mawhna kilangsak thei bek ahih manin thukham zuihna hangin kuamah in Pasian tawh kipawl theihna ngah zo lo hi.

²¹Ahi zongin tu-in thukham zuihna hang hi loin thudang khat hangin Pasian tawh kipawl theih nading lampi hong kilangzo a, Thukham le kamsangte in zong hih thu-ah teci a pang uh hi.

²²Tua thu in: Jew mi le Gentail mi kuamah a kilamdanna om loin Jesuh Khrih upna hangin mi khempeuh in Pasian tawh kipawl theihna a ngah hi.

²³Mi khempeuh mawh ciat uh a, a hong honkhia Pasian tawh kigamla uh hi.

²⁴Ahi zongin Pasian in a hong hehpihna hangin Khrih Jesuh tawh hong tatkhiat manin amah tawh i kipawlthei kik hi.

²⁵Ama hong sihna hangin mawhna a kimaisak theih nadingin Pasian in Jesuh hong pia a, amah a umte in mawhmaisakna a ngah uh hi. Amah tawh i kipawl theih nading zia hong lahna-in hih bangin Pasian a hong gamta ahi hi. Pasian a lungduaina hangin a beisa hunah i mawhnate hong en khong phot hi.

²⁶Ahi zongin tuhun ciangin Jesuh a um mi khempeuh Pasian tawh a kipawl theih nading le amah thuman ahihna a kilatsak nadingin mihingte’ mawhna tawh kisai-in na hong sem hi.

²⁷Tua ahihleh mihingte in i kisialhpih ding bang om ahi hiam? Bangmah om lo hi. Bang bulphuh ding ihi hiam? Thukham zuihna bulphuh ding ihi hiam? Hi lo hi. I upna a bulphuh ding ihi hi.

²⁸Bang hang hiam cih leh mi khatpeuh Pasian tawh a kipawl theihna pen Thukham zuihzawhna hang hi loin upna hang hi, ci-in i genzo hi.

²⁹Pasian, Jew mite’ Pasian bek hi a, Gentail mite’ Pasian hi lo ahi hiam? Gentail mite’ Pasian zong hi veve hi.

³⁰Pasian khat bek hi a, a upna uh hangin Jew mite amah tawh a kipawl thei-in a bawl mah bangin Gentail mite zong a upna uh hang mah tawh amah tawh a kipawl thei-in a bawl hi.

³¹Tua ahihleh hih upna thu i gen ciangin Thukham a phiat ihi hiam? Hi lo hi; a kipsak semsem ihi hi.