Read Tedim Chin ROM 5 Bible Online

ROM 5 - Tedim Chin bible

ROM 5

¹Tu-in upna hangin Pasian tawh kipawl khinta ihih manin i Topa Jesuh Khrih hangin Pasian tawh a kilemkik ta ihi hi.

²Ama hangin upna tawh tu-a i omna Pasian hehpihna sungah a tung ihi a, Pasian tawh minthanna ngahkhawm ding, ci-in lamen ihih manin i lung a dam hi.

³Haksatna i thuak laitak nangawnin i lungdam veve hi. Bang hang hiam cih leh haksatna in thuakzawh hatna piangsak a,

⁴thuakzawh hatna in Pasian’ pahtakna hong ngahsak a, ama hong pahtakna in lametna lianpi hong neisak ahihna thu i thei hi.

⁵Pasian in eite tungah a hong piak a Kha Siangtho tawh eite sungah ama itna hong guang ahih manin hih lametna in eite hong lungkiasak ngei lo hi.

⁶Eite cimawhin i om laitakin Pasian’ hoihsak hunin ei mi gilote a dingin Khrih hong si hi.

⁷Mihoih khat a dingin a si ngam a omkha ahi zongin thukham zuizo mipa a dingin sih ngam nading a thu haksa mahmah khat ahi hi.

⁸Ahi zongin eite mawhna nei ihih laitakin eite a dingin Khrih hong si ahih manin Pasian in eite hong it mahmahna thu hong lak khin hi.

⁹Ama sihna hangin tu-in Pasian tawh kipawlthei ihih manin Pasian’ hehna hangin gimna panin zong hong suaktasak zaw kan lai ding hi.

¹⁰Pasian tawh eite i kilangneih laitakin ama Tapa’ sihna hangin amah tawh hong kilemsak ahihleh tu-in Pasian tawh kipawl khinta ihih manin Khrih nuntakna in eite hong honkhiazo zaw kan ding hi lo ahi hiam?

¹¹Tuateng bek hi lo lai a, Pasian tawh hong kilemsak i Topa Jesuh Khrih hangin Pasian tungah i nuam mahmah hi.

¹²Mi khat hangin leitungah mawhna hong om a, tua mawhna hangin sihna hong piang hi. Mi khempeuh mawh uh ahih manin tu-a bangzia-in mi khempeuh tungah sihna hong tung hi.

¹³Thukham a om mapekin leitungah mawhna na omkhin a, thukham a om lohna munah Pasian in mawhna a ciaptehna laibu nei lo hi.

¹⁴Ahi zongin Adam hun a kipan Moses hun dongin sihna in mite uk a, Adam in Pasian’ thupiak a man loh manin a khialh bangin a khial nai lo mite nangawn sihna khutnuai mah hi veve uh hi. Adam pen a hong pai lai ding mipa’ lim ahi hi.

¹⁵Ahi zongin Pasian’ hong piak letsong pen Adam’ mawhna tawh kibang lo ahih manin tua tegel tehkak theih ding hi lo hi. Tua mi khat a khialhna hangin mi tampi a sihna pen a man mah ahi hi. Ahi zongin Pasian’ hong itna le hong hehpihna nakpitakin lianzaw lai a, mi khat ahi tua Jesuh Khrih’ hehpihna hangin mi tampi tak tungah hong kipia letsong lian mahmah hi.

¹⁶Pasian’ letsong le mi khat’ mawhna a hatna zia kilamdang hi. Khialhna khat a om khit ciangin, “Mawh hi,” ci-in thukhenna kipia a, ahi zongin khialhna tampi tak a om khit ciangin a kilawm lopi mahin, “Dik hi,” cihna piakkhong thupha a om hi.

¹⁷Mi khat bek’ mawhna hangin sihna in hong uk ahihleh mi khat mah ahi Jesuh Khrih hangin nakpitakin a lian Pasian’ hehpihna le mihoih-a sanna a ngah mite nungta-in thahatzaw kan ding uh hi.

¹⁸Tua hi a, khialhna khat in mi khempeuh tungah thukhenna tungsak ahih mah bangin gamtatna hoih khat mah in mi khempeuh khahin nungtasak hi.

¹⁹Mi khat in thu a man loh manin mi tampi mimawh a suahsak mah bangin mi khat in thu a manna hangin mi tampi in Pasian tawh kipawl theihna a ngah ding uh ahi hi.

²⁰Khialhna a tam semsem nadingin thukham hong kipia hi. Ahi zongin khialhna a tamna munah Pasian’ hehpihna hong lianzaw zel hi.

²¹Tua ahih manin mawhna thahatin hong sihsak mah bangin, i Topa Jesuh Khrih hangin Pasian’ hehpihna thahat zaw lai a, mihoihin hong sangin nuntak tawntungna sung a hong tunpih hi.