Read Tedim Chin ROM 7 Bible Online

ROM 7 - Tedim Chin bible

ROM 7

¹Lawmte aw, note khempeuh in thukham thei na hih manun tu-a kong gen dingte na tel mahmah ding uh hi. Mi khat a nuntak sungteng bek thukham in uk thei hi.

²Gentehna-in, pasal nei numei khat pen a pasal a nuntak sungteng bek, tua thukham in a pasal tawh lencip hi. Ahi zongin a pasal a sih ciangin tua a pasal tawh a lencip thukham panin a suakta hi.

³Tua ahih manin a pasal a nuntak hun sungin pasal dang tawh a lupkhop leh mi tawh a mawh kici hi. Ahi zongin a pasal a si hileh thukham tawh kisai-in a suakta hi a, pasal dang a tenpih hangin mi tawh a mawh hi lo hi.

⁴Sanggamte aw, note zong tua mah tawh a kibang na hi uh hi. Khrih tawh pumkhat na hihna uh hangin thukham tawh kisai thu-ah a sikhin na hi uh a, Pasian’ nasepna-ah eite a man nei i suahtheih nadingin sihna panin a kithokiksak Khrih tawh nupa na hi uh hi.

⁵I leitung lungsim tawh i nuntak laiteng, thukham hangin i hihnop semsem mawhnopnate i gamta a, tuate khempeuh sihna tawh a kizom ahi hi.

⁶Ahi zongin nidangin a hong lencip thukham panin Pasian in eite hong suaktasak khin ahih manin tua thukham tawh kisai-ah eite a sikhin ihi hi. Lai sungah a kigelh thukham lui sungah nungta nawn loin, Kha Siangtho’ hong piak nuntakna thakah a nungta ihi hi.

⁷Tua ahihleh Thukham mahmah pen a siahuai ahi hiam? A sia hi lo hi. Mawhna bang hiam cih Thukham in hong theitel sak hi. Thukham in, “Hazatna lungsim nei kei in,” ci-in gen lo hileh, haza i cih bang ahi hiam, ci-in ka thei kei ding hi.

⁸Thukham a omna hangin mawhna in nuamtak sa-in hazatna a tuamtuam ka neihtheih nading hong piangsak hi. Thukham om kei leh mawhna in bangmah sem thei lo hi.

⁹Thukham ka theih ma-in mi nungta ka hi ngei a, thukham ka theih ciangin mawhnopna lungsim hong khangin kei ka si hi.

¹⁰Nuntak ngah nadingin a kibawl thukham pen keima a dingin sihna hong hi zawsop hi.

¹¹Bang hang hiam cih leh thukham a om manin mawhna in nuamtaksa a, kei hong khemin tua thukham tawh a hong that hi.

¹²Tua ahih ciangin Thukham mahmah hitaleh thupiaknate hitaleh hoihin man a, siangtho hi.

¹³Tua ahihleh a hoih na khat in kei’ sih nading hong piangsak ahi hiam? Hi lo hi. Tua sihna pen mawhna’ nasepna hi a, mawhna pianzia bangci bang taktak hiam, cih a kitheih nadingin a hoih na khat zangin kei tungah sihna a hong piangsak ahi hi. Tua ahih manin thukham a om manin mawhna a siahuai mahmah ahihna hong kilangzaw kan lai hi.

¹⁴Thukham pen i kha thu tawh kisai hi, ci-in i thei hi. Ahi zongin kei pen leitung pumpi tawh a nungta mi ka hi a, mawhna thu mangin a sal a suak ka hi hi.

¹⁵Ka hihnopteng hihkha loin ka hih nop loh tengkeek mah hih zawsop ka hih manin keima gamtatna mahmah zong ka tel thei kei hi.

¹⁶Ka hih nop lohteng ka hih veve ciangin Thukham a deihhuai khat hi, ci-in ka ngaihsutna hong langsak hi.

¹⁷Tua ahih manin tua bangin a gamta taktak pen kei hi loin ka sunga om mawhna hizaw hi.

¹⁸Ka leitung pumpi sungah a hoih na khat beek om lo hi, ci-in ka thei hi. Ka sungah a hoih gamtatnopna lungsim a om hangin ka hihzo kei hi.

¹⁹A hoih ka gamtatnop teng gamta loin, ka hihnop loh siatnate ka gamta zawsop hi.

²⁰Ka gamtat nop lohteng ka gamtat veve ciangin tua a gamta pen kei hi nawn loin ka sunga om mawhna a gamta ahihna a hong kilang hi.

²¹Tua ahih ciangin a hoih gamta nuam hinapi-in a sia bekbek a gamtakha ka hihna ka thei hi.

²²Ka lungsim tawng taktakah Pasian’ thukham hoih ka sa hi.

²³Ahi zongin kei’ deih loh thudang khat in ka lungsimah na hong sem hi. Tua ka sunga na hong sem pen in mawhna thu-ah kei hong mancip hi.

²⁴Kei pen a lungkham mi ka hita hi. Kei a hong sisak ding hih lungsim lui panin kua in kei hong honkhiazo ding ahi hiam?

²⁵I Topa Jesuh Khrih in hong honkhiazo ding ahih manin Pasian tungah ka lung a dam hi. Kei’ omzia taktak ahihleh: Ka lungsim tawh Pasian’ thu ka zui a, ka pumpi in mawhna a piangsak thu a zui hi.