Read Tedim Chin 1 KORIN MASA 10 Bible Online

1 KORIN MASA 10 - Tedim Chin bible

1 KORIN MASA 10

¹Sanggamte aw, Moses a zui i pu i pate tungah a piang thu na phawk ding uh ka deih hi. Meiipi in amaute khempeuh na hu a, a vekpi-un nuamtakin San Tuipi na kantanzo uh hi.

²Meiipi sung le tuipi sungah ama nungzui a suak dingin Moses sungah amaute na kiphum uh hi.

³A vekpi-un kha tawh kisai an ne uh a,

⁴a vekpi mahun kha tawh kisai tui na dawn uh hi. Bang hang hiam cih leh amaute a tonpih, kha tawh kisai suangpi panin tui na dawn uh a, tua suangpi pen Khrih ahi hi.

⁵Ahi zongin amaute a tamzaw tungah Pasian lungkim lo ahih manin gam sung tengah amaute’ luanghawm kithehzak hi.

⁶Amaute tungah a piangte khempeuh, eite a dingin hilhkholhna ahi hi. Amaute bangin a sia nate i deih kei ding a,

⁷amaute pawlkhat in a biak bangin milim i bia kei ding hi. Lai Siangtho in, “Anne zune dingin mite tu uh a, tua khit ciangin a lam dingin a ding uh hi,” na ci hi.

⁸Amaute pawlkhat bangin numei tawh paktatna i gamta kei ding hi. Nikhat thu-in mi tul sawmnih le tulthum a si uh hi.

⁹Amaute pawlkhat bangin Topa i ze-et kei ding hi. Gul in amaute na tulum hi.

¹⁰Amaute pawlkhat bangin Pasian i phunsan kei ding hi. Vantung mite in amaute na sulum hi.

¹¹Leitung beikuan hun sungah a om eite a dingin hih thupiangte i etteh ding thu hi a, eite hilhkholh nadingin lai sungah a kiciamteh ahi hi.

¹²Lungkip takin ka omzo hi, ci-in a kingaihsun mite a pukkhak loh nadingun kikem uh hen.

¹³Na tuah uh ze-etnate khempeuh pen mite’ tuah ngeingeite mah ahi hi. Pasian in citakin a thuciamna lenkip ahih manin note’ thuak zawh loh ding ze-etna hong tuaksak lo ding hi. Ze-etna na tuah hun uh ciangin zong na thuakzawh nading uh thahatna hong guan ding ahih manin na suahtak zawh nading uh lampi hong honsak ding hi.

¹⁴Tua ahih manin lawm itte aw, milim biakna pelh un.

¹⁵Thu ngaihsun thei mite tungah thugen bangin a hong gen ka hi hi. Ka thugente nomau mah in na ngaihsun tawm un.

¹⁶Nekkhawm bawlna-ah leenggahzu hangin Pasian tungah lungdamna ko-in i dawn ciangin Khrih sisan hangin thuphate eite in zong a ngahkhawm cihna hi lo ahi hiam? I balnen anlum i nek ciangin zong Khrih pumpi hangin thuphate mah a ngahkhawm cihna hi lo ahi hiam?

¹⁷Anlum khat bek hi a, eite mi tampi hinapi-in tua lum khat bek mah nekhawm ihih manin eite pumkhat bek mah ihi hi.

¹⁸Israel mite’ thu ngaihsun dih un. Biakna sa a ne khempeuh pen biakna tau tungah Pasian biakna thu-ah a kipawl hi lo ahi uh hiam?

¹⁹Hih bang ka cih ciangin bang ka cihnopna ahi hiam? Milim ahi a, milim biakna sa ahi zongin thupi hi, a cinuam ka hi kei hi.

²⁰Ka cihnopna pen, lawkite in gan a gawh uh ciangin dawi a biakna uh hi a, Pasian a biakna uh hi lo hi. Dawi biakna-ah note na kihel ding uh ka hong deih kei hi.

²¹Note in Topa tawh nekkhawmna hai sung pan le dawi tawh nekkhawmna hai sung panin na dawnkhawm thei kei ding uh hi. Topa tawh nekkhawmna an leh dawi tawh nekkhawmna an zong na nekhawm thei kei ding uh hi.

²²A nih tuakah kihelkhawm lehang Topa a heh nadingin a gamta ihi ding a, eite pen Topa sangin i hatzaw het kei hi.

²³“Ka ut peuhpeuh ka hihtheihna ding thu om hi,” a ci omkha ding hi. Ahi zongin na khempeuh ka hih ding kilawm lo hi. Na khempeuh hihtheih nading thu a om hangin a kihihthei khempeuh hihna in midangte’ hoih nading piangsak lo hi.

²⁴A kuamah peuh in note’ angsung ding bek zong kei unla, midangte’ phattuam nading zongzaw un.

²⁵Na lungsim uhah kisuanna a om loh nadingin sa zuakna-ah a kizuak sa peuhpeuh bang sa ahi hiam, ci-in dong se loin na ututun na nethei ding uh hi.

²⁶Bang hang hiam cih leh Lai Siangtho in, “Leitung le a sungah a om khempeuh pen Topa a’ ahi hi,” na ci hi.

²⁷Thu um lo mi khat in an nekpih dingin hong samin tua an ne dingin na pai leh, na lungsimah kisuanna a om loh nadingin bang sa ahi hiam, ci-in dong se loin ne lel in.

²⁸Ahi zongin mi khatpeuh in, “Milim biakna sa hi,” hong cih leh, tua a hong gen mipa na khualna le nangma lungsim nopmawhna a om loh nadingin ne kei pah in.

²⁹Nangma lungsim nuam lo ding cihna hi loin a hong gen pa’ lungsim nuam lo ding ahih manin ne kei in, a ci ka hi hi. Mi pawlkhat in, “Bang hangin kei’ gamtat nading mite’ ngaihsutna in hong khaktan thei ding ahi hiam?

³⁰Keimah in Topa tungah lungdamna ko-in ne ka hih manin tua ka lungdamkohna thu-ah bang hangin hong kimawhsak thei ding ahi hiam?” cithei kha ding hi.

³¹Tua ahih manin keimah in ka hong gennop thu in: Na hihna khempeuh uh, nekna dawnna-ah ahi zongin Pasian’ minthan nadingin na hih un.

³²Jew mi ahi a, Gentail mi ahi a, Pasian’ pawlpi mi ahi zongin na lungnopmawhsak loh nadingun na gamta un.

³³Mite in hotkhiatna a ngahtheih nadingin ka sepna khempeuhah keima angsung ngaihsun loin mi khempeuh phattuam nading hanciamin, a kuamah peuh a lungkim nadingin ka gamtat mah bangin note zong na gamta un.