Read Tedim Chin 1 KORIN MASA 11 Bible Online

1 KORIN MASA 11 - Tedim Chin bible

1 KORIN MASA 11

¹Keimah in Khrih gamtatzia ka zuih mah bangin note in zong keima gamtatzia hong zui ta un.

²Note in kei hong phawk tawntungin ka hong hilh thu khempeuh zui na hih manun ka hong phat mahmah hi.

³Ahi zongin na theih ding uh ka deih thu in: Mi khempeuh’ lutang pen Khrih hi a, numei’ lutang pen pasal hi a, Khrih’ lutang pen Pasian ahihna thu ahi hi.

⁴Pasal khatpeuh in mihon biakna sungah a lukhu lakhia lopi-in thungen ahi a, Pasian’ thugen ahi zongin a om leh Khrih’ min a daisak ahi hi.

⁵Tua mah bangin mihon biakna sungah numei khatpeuh in a lu khuh lopi-in thungen ahi a, Pasian’ thugen ahi zongin a om leh a pasal’ min a daisak hi a, a lu a met numei mah tawh a kilamdanna a om lo ahi hi.

⁶Numeite in a lu a khuh kei ding uhleh a sam uh met vet uh hen. Tua ahih manin numeite in a sam uh a met ding a zumhuai mahmah khat ahih mah bangin a lu uh khuh ta uh hen.

⁷Pasalte pen Pasian’ lim le a minthanna a kilangsak ahih manin a lu uh a khuh ding uh kilawm lo hi. Ahi zongin numeite pen pasalte’ minthanna a kilangsak ahi hi.

⁸Bang hang hiam cih leh numei tung panin pasal kipiangsak lo a, pasal tung panin numei kipiangsak zaw hi.

⁹Numei hangin pasal a kipiangsak hi lo a, pasal hangin numei a kipiangsak hizaw hi.

¹⁰Tua ahih ciangin a pasalte uh ukna nuai-ah a om ahihna a lah nadingun vantung mite’ muhna-ah numeite in a lu uh a khuh ding uh kilawm hi.

¹¹Ahi zongin Topa thu sunga i nuntakna-ah numeite pen pasal tawh loin a tangdinzo hi lo a, pasalte zong numei tawh kop loin a tangdinzo hi tuan lo hi.

¹²Bang hang hiam cih leh numei pen pasal tung panin a kipiangsak hi a, pasal pen numei sung panin a suak ahi hi. Tua hi a, na khempeuh, Pasian kiang panin a hong pai ahi hi.

¹³Hih thu nomau mah in ngaihsun tawm un. Numeite in a lu uh khuh lopi-in mihon biakna lakah Pasian kiangah thu a nget ding uh kilawm ahi hiam?

¹⁴I pianpih ngeina mahmahah zong pasalte in sam sau a khawi pen amau a dingin a zumhuai thu ahihna,

¹⁵le numeite in samsau a neih pen a minthanna uh ahihna thu hong kilangsak hi lo ahi hiam? Numeite’ samsau pen a lu uh a tuam nadingin a kipia ahi hi.

¹⁶Hih thu a nialnuam a omkhak zenzen leh eite a kipan Pasian pawlpi mi a kuamah peuh in tu-a ka hong gen ngeina lobuang adang a thei om lo hi, ci-in gen ding lobuang bangmah dang om lo hi.

¹⁷Ahi zongin a nuai-a thu tawh kisai-in note ka hong pakta kei hi. Bang hang hiam cih leh pawlpi kikhopna na neih uh ciangin phatna sangin siatna na piangsakzaw uh hi.

¹⁸A masa penin, pawlpi na kikhop uh ciangin note lakah pawl kikhenna om hi, ci-in ka za hi. Hih ka zak thu a manna omkha dingin ka um hi.

¹⁹Bang hang hiam cih leh kuateng pawlpi mi citak ahi hiam, ci-in a kilat nadingin kikhenna a ommah ding ahi hi.

²⁰Nekkhawmna a bawl dingin note na kikhop uh ciangin Topa’ Nekkhawmna a ne dingin na pai kei uh hi.

²¹Bang hang hiam cih leh nekkhawmna ne dingin na pai uh ciangin pawlkhatte amau’ an tawh na tung masa-in ne pah uh ahih manin, pawlkhatte a kham mahmahin na om uh hangin pawlkhatte gilkialin a om uh hi.

²²Hih bangin na gamtat uh, anletui na nek nading uh inn nei lo na hi uh hiam? Tua ahih kei leh Pasian’ pawlpi simmawh bawlin pawlpi mizawngte na maizumsak nopna uh ahi hiam? Hih thu tawh kisai-ah hong pakta ding nong sak uhleh note ka hong pakta het kei hi.

²³Bang hang hiam cih leh note kiangah ka hong gen thu pen Topa kiang panin ka ngah thu hi a, tua thu in: Topa Jesuh a kilehhek ding nitakin anlum la-in,

²⁴Pasian tungah lungdam a kohkhit ciangin balnen a, “Hih pen note a dingin a hong kipia keima pumpi ahi hi. Kei na hong phawk nadingun na ne un,” ci hi.

²⁵Tua mah bangin nitak an a nekkhit uh ciangin hai la a, “Hih hai sunga om leenggahzu pen keima sisan tawh a kikipsak Pasian’ thuciamna thak ahi hi. Hih bangin na dawn simun, kei na hong phawk nadingun na dawn un,” ci hi.

²⁶Bang hang hiam cih leh hih bangin anlum ne-in hai sung panin leenggahzu na dawn simun, Topa a hong paikik matengin ama sihna thu a gengen na hi uh hi.

²⁷Tua ahih manin a kilawm lopi-in Topa’ anlum ne-in, a hai panin leenggahzu a dawn mi peuhmah pen Topa’ pumpi le a sisan a mindaisak hi-in a mawh ahi uh hi.

²⁸Tua ahih manin a kuamah peuh ki-entel masa phot uh hen la, tua khit ciangin Topa’ anlum ne-in a hai panin leenggahzu dawn pan tahen.

²⁹Bang hang hiam cih leh Topa’ pumpi a khiatna thei lopi-in anlum ne-in hai panin leenggahzu a dawn mi pen amahmah mawhsak thukhenna a kipiatawm ahi hi.

³⁰Tua bang mawhna hangin note tampi tak cina-in na zawngkhal uh a, pawlkhat zong na si uh hi.

³¹Eite hoihtakin ki-entel masa peuh lehang Pasian’ mawhsak thukhenna i thuak kei ding hi.

³²Ahi zongin eite in hih leitung mite tawh mawhsakna i thuakkhawm loh nadingin Topa in eite hong thuhilhin gim hong pia hi.

³³Tua ahih ciangin sanggamte aw, nekkhawm ne dingin na kikhop uh ciangin kingakkim dimdiam un.

³⁴Tua bangin na kikhop uh ciangin Pasian’ thukhenna na thuakkhak loh nadingun a gilkial na om uhleh zong na inn uhah an ne masa un. Thu dangdangte ahihleh ka hong pai ciangin ka hong gen ding hi.