Read Tedim Chin 1 KORIN MASA 12 Bible Online

1 KORIN MASA 12 - Tedim Chin bible

1 KORIN MASA 12

¹Sanggamte aw, Kha Siangtho’ hong piak siamna a tuamtuamte tawh kisai thu na theih loh khak ding uh ka deih kei hi.

²Lawki na hih lai-un a pau thei lo milimte’ thu-in na gamta uh a, na lungsim uh tua milimte in hong zo mahmah hi.

³Tua ahih manin Kha Siangtho in lam a lah mite in, “Jesuh in samsiatna ngah ta hen,” a cih lohna, le Kha Siangtho in lamlak kei leh kuamah in, “Jesuh pen Topa hi,” a cih theih loh nading thu na theih ding uh ahi hi.

⁴Tu-in siamna a nam tuamtuam om a, ahi zongin a hong pia Kha Siangtho a kibang ahi hi.

⁵Nasepna a nam tuamtuam om a, ahi zongin a na i sepsak Topa a kibang ahi hi.

⁶Nasep nading siamna a nam tuamtuam om a, ahi zongin septheih nading siamna a hong pia Pasian a kibang ahi hi.

⁷Mi khempeuh a dingin phattuamna a omtheih nadingin Kha Siangtho’ hong ompihna a nam tuamtuamin hong kilang hi.

⁸Kha Siangtho in mi khat tungah thuthuk pilna hong guan a, tua Kha Siangtho mah in adang khat tungah thugen siamna hong guan hi.

⁹Adang khat tungah upna hong guan a, adang khat tungah cina damsak theihna hong guan hi.

¹⁰Adang khat tungah nalamdang bawl theihna, adang khat tungah Pasian’ thu hilh ding siamna, adang khat tungah Kha Siangtho piak siamna ahi leh ahi lo khentheih nading siamna, adang khat tungah pau lamdang pau theihna, adang khat tungah tua pau lamdang tuamtuam paunate a khiatna gentheihna hong pia hi.

¹¹Hih siamna a tuamtuamte a hong pia pen Kha Siangtho a kibang khat bek mah hi a, mi a tuamtuamte tungah ama hoihsak bangin a hong piak ahi hi.

¹²Pumpi pen khat bek hinapi-in na a tuamtuam a nei hi. Pumpi in na a tuamtuam tampi a neih hangin pumpi khat bek mah ahih veve mah bangin Khrih zong pumpi na a tuamtuam a nei pumpi khat ahi hi.

¹³Jew mi ihi a, Gentail mi ihi zongin, sila ihi a, sila ahi lo ihi zongin, eite minam tuamtuam ihih hangin Kha Siangtho khat bek mah in Jesuh’ pumpi a suak dingin ama sungah hong phum a, eite khempeuh tungah a hong kipia pen tua a kibang Kha Siangtho khat bek mah ahi hi.

¹⁴Pumpi in na khat bek nei loin nam tampi tak a nei hi.

¹⁵Khe in, “Kei, khut hi lo ka hih manin pumpi tawh ka kizom kei hi,” a cihmawk hangin pumpi na khat ahihna a bei hi tuan lo hi.

¹⁶Bil in, “Kei, mit hi lo ka hih manin pumpi tawh ka kizom kei hi,” a cihmawk hangin pumpi na ahihna a bei hi tuan lo hi.

¹⁷Pumpi khempeuh mit suakkhin leh bang tawh khua za ding ahi hiam? Pumpi khempeuh bil suakkhin leh bang tawh a gimnam thei ding ahi hiam?

¹⁸Ahi zongin tu-a i neih bang tektekin, Pasian in ama deih bangin pumpi na a tuamtuam a hong bawlsak hi.

¹⁹A vekpi-in pumpi na nam khat bek hi khin leh a pumpi ding koi-ah om nawn ding ahi hiam?

²⁰Ahi zongin tu-a i neih bangin pumpi khat bek om a, na tampi a nei hi.

²¹Tua ahih manin mit in khut kiangah, “Nang ka hong kisam kei hi,” ci thei lo a, lutang in zong khe kiangah, “Nang ka hong kisapna om lo hi,” ci thei lo hi.

²²Pumpi na a ginalo tawh a kibangte a kimanna lian mahmah zawsop a,

²³pumpi na bangmah gentaak lo i sakte pawl limtakin kep kul zawsop hi. I pumpi na hoih i sak khollohte pen,

²⁴pumpi na hoih i sakte i lim et ding a kisap kholloh bang hi loin, limkep diak peuh kulzaw se hi. Ahi zongin i pumpi na thupi i sak khollohte limtakin i kepdiak ding a kisamin i pumpi a na bawl se hi.

²⁵Tua ahih manin i pumpi nate khatlekhat kithutuak lo cih om loin a vekpi-in a kilemkim uh hi.

²⁶Khat in natna ngah leh a vekpi-un thuakkhawm uh a, khat in pahtakna ngah leh a vekpi-un lungdam khawm uh hi.

²⁷Tu-in note khempeuh pen Khrih pumpi na hi uh a, na vekpi-un a pumpi na khat ciat na hi uh hi.

²⁸Tua ahih manin Pasian in pawlpi sungah mi khempeuh ama panmun ciat dingah a hong bulh hi. A masa-in sawltakte, a nihna-ah kamsangte, a thumna-ah laihilhte, tua ciangin nalamdang bawltheite, cina damsak theite, midang a huhtheite, thu vaihawm a siamte, le pau lamdang a pau theite ahi uh hi.

²⁹A vekpi-un sawltak hi lo a, a vekpi-un kamsang zong hi lo uh hi. A vekpi-un laihilh, thuhilh hi lo uh a, a vekpi-un nalamdang zong bawl lo uh hi.

³⁰A vekpi-un cina damsak nading siamna nei lo uh a, a vekpi-un pau lamdang pau thei lo uh a, a vekpi-un tua pau lamdangte a khiatna gen thei lo uh hi.

³¹Tua ahih manin Pasian’ hong piak siamna a hoihpente deih belin na nei ta un. Tu-in a hoihpen thu khat ka hong gen ding hi.