Read Tedim Chin 1 KORIN MASA 13 Bible Online

1 KORIN MASA 13 - Tedim Chin bible

1 KORIN MASA 13

¹Keimah in mihingte pau a tuamtuamte le vantung mite’ pau nangawn ka pautheih hangin itna ka neih kei leh a bil-aphuai zam le daltuah kitum tawh a kibang lel ka hi hi.

²Thuhilh siamna nei-in, thusim khempeuh thei-in, na khempeuh thei-in, mualte kinsak zawh nading upna ka neih hangin itna ka neih kei leh ka kimanna bangmah om lo hi.

³Ka neih khempeuh midangte tungah pia-in, Pasian’ nasepna hangin kihaltumna ka thuak ahi zongin itna ka neih kei leh ka phattuamna bangmah om lo hi.

⁴Itna neite a lungduai-in migi hi. Itna neite in hazatna lungsim nei loin, zong kisathei lo hi.

⁵Itna neite a kilawm loin gamta lo, heh pakpak lo, mite’ mawhna ciamteh lo hi.

⁶Thuman lote-ah lungdam ngei lo uh a, thumante bekah lungdam uh hi.

⁷Itna neite lungkia cih om ngei lo hi; a upna, a lametna, lungduai takin a ngaknate uh a mawkna cih om ngei lo hi.

⁸Itna pen a tawntungin a kip ahi hi. Thuhilh siamna a om tei hangin tawlkhat sung bek kimangin, pau lamdang pautheih siamnate a om hangin bei ding a, thutheih siamna a om hangin maimang ding hi.

⁹Bang hang hiam cih leh eite’ neih thutheih siamnate le i thuhilh siamnate a kicing hi lo hi.

¹⁰Ahi zongin a kicing thu hong tun ciangin a kicingtaak lo thuteng maimang ding hi.

¹¹Naupang ka hih hun lai-in naupang mah bangin kampau-in, thu ngaihsunin, ka gamta hi. Ahi zongin tu-in khangham ka hih manin naupang vaite ka zang nawn kei hi.

¹²Dal limlang sunga et bangin tu laitakin a kitel pha loin i mu milmial a, ahi zongin mai lamah maitang kituahin i mu ding hi. Tu laitakin i theihnate kicing lo a, ahi zongin mai lamah Pasian in eite hong theih mah bangin a kicing takin amah i thei ding hi.

¹³Tu laitakin a omlai thu thumte pen upna, lametna, le itna hi a, tua thumte sung panin itna mah a thu lianpen ahi hi.