Read Tedim Chin 1 KORIN MASA 14 Bible Online

1 KORIN MASA 14 - Tedim Chin bible

1 KORIN MASA 14

¹Na deih lianpen uh ki-itna na hisak un. Kha Siangtho’ hong piak siamna a tuamtuamte sung panin thuhilh siamna neih ding na hanciam phapen un.

²Bang hang hiam cih leh pau lamdang a paute pen mite’ tungah thugen hi loin Pasian’ tungah thugen ahi hi. Amaute’ pau kuamah in thei lo a, Kha Siangtho’ vangliatna tawh Pasian’ thusimte a gengen ahi uh hi.

³Ahi zongin Pasian’ thu a hilhte pen mite tungah thugen hi a, mite tungah huhna, hanthotna, le hehnepna a pia ahi hi.

⁴Pau lamdang a paute pen amau mahmah a phattuam nadingin a pau hi a, Pasian’ thu a hilhte ahihleh pawlpi’ phattuam nadingin nasem ahi hi.

⁵Note khempeuh pau lamdang na pautheih ding uh kong deihsak hangin Pasian’ thu hilh ding siamna na neih ding uh ka hong deihsakzaw hi. Pawlpi in phattuamna a ngahtheih nadingin note lakah a khiatna a genthei pah ding om ahih kei buang leh, pau lamdang a paute sangin Pasian’ thu a hilhte a lianzaw ahi hi.

⁶Sanggamte aw, note kiangah hong pai-in pau lamdang tawh thu hong gen leng, bangin kimang ding ahi hiam? Note-a’ in Pasian’ thu theihna, pilna le siamna a hong piansak kei leh a kimanna themkhat zong om het lo hi.

⁷Nuntakna a nei lo tamngai le harp lasaknate nangawn, a aw a kitelin ging sensen kei leh bang la kisa ahi hiam, ci-in kua in theithei ding ahi hiam?

⁸Galdo nading peengkul a tum pa in a aw a kitelin tum kei leh galdo dingin kua kithawi thei ding ahi hiam?

⁹Tua mah bangin na thugenna uh kammal kitel sinsen kei leh kua in note’ thugen theithei ding ahi hiam? Na thugen uh huihlakah a maimang suak lel ding hi.

¹⁰Leitungah pau nam tampi om a, ahi zongin khiatna a nei lo khat beek om lo hi.

¹¹Ahi zongin a kipau paunam thei kei leng, kei pen a pau pa a dingin mi namdangpi ka hi ding a, a pau pa zong kei a dingin mi namdangpi khat hi ding hi.

¹²Note in zong Kha Siangtho’ hong piak siamnate deih belin nei na hih manun pawlpi a dingin phattuamna taktak a piangsak ding siamnate mah nget belin na nei ta un.

¹³Tua ahih manin pau lamdang a paute in, amau paute a khiatna a gen theih nading uh siamna a neih nadingun thu ngen ta uh hen.

¹⁴Bang hang hiam cih leh pau lamdang tawh thu ka nget ciangin lungsim takpi tawh thungen ka hih tei hangin bang ngen ka hi hiam cih ka ngaihsun thei kei hi.

¹⁵Tua ahihleh bangci gamtat ding ka hi hiam? Ka lungsim tawh thu ka ngen ding a, ka ngette ka theih nading tawh zong ka ngen ding hi. Ka lungsim tawh la ka sa ding a, ka sakte ka theih nading tawh zong ka sa ding hi.

¹⁶Na lungsim bek tawh Pasian tungah lungdamna na koh ciangin kikhopna sungah a om midangte in bangci-in nang’ thungetna, “Amen,” hong cihpih thei ding ahi hiam? Nangma thungette a theihtheih nading uh bangmah om lo hi.

¹⁷Pasian tungah lungdam ko-in na thungetna a hoih mahmah hangin midangte in bangmah phattuamna ngah het lo hi.

¹⁸Note khempeuh sangin pau lamdang pau theizaw ka hih manin Pasian tungah ka lungdam hi.

¹⁹Ahi ta zongin pawlpite’ biak kikhopna sungah pau lamdang kam tul sawm bang ka pau sangin midangte’ phattuam nadingin a theih ding uh kammal nga bek ka pauzaw ding hi.

²⁰Sanggamte aw, na thu ngaihsutnate uhah naupang bang kei un. Gitlohna lamah naupang bang unla, ahi zongin thu ngaihsutna-ah a khangham hi ta un.

²¹Lai Siangtho sungah, “A lamdang kampau tawh amaute hopihin, minam dangte’ pau tawh thu ka gen ding a, tua bang nangawnin hih mite in keima thugen hong ngai lo ding uh hi, ci-in Topa in a gen hi,” ci-in na kigelh hi.

²²Tua ahih manin pau lamdang pen thu um mite a’ ding hi loin, thu um lo mite in a uptheih nading uh lim ahi hi. Tua mah bangin Pasian’ thuhilhna pen thu um mite a’ ding hi a, thu um lo mite a’ ding hi lo hi.

²³Tua ahih manin pawlpi mi khempeuh na kikhopna uhah na vekpi-un pau lamdangin pau-in, mi mawkmawkte ahih kei leh thu um lo mite in hong mu zenzen leh, note pen mihai hontang hi, hong ci ding hi lo ahi uh hiam?

²⁴Ahi zongin na vekpi-un hoihtakin Pasian’ thu na gen laitakun mi mawkmawkte ahih kei leh thu um lote hong pai leh, a zak uh thute hangin a mawhna uh kiphawkin a hoih lohna uh kithei ding uh hi.

²⁵A lungsim sung uhah a ipcipte uh kipholak ding a, khukdinin Pasian bia-in, “Hih mite lakah Pasian om taktak hi,” ci ding uh hi.

²⁶Tua ahih ciangin sanggamte aw, ka hong gennop thu a tomin: Pasian bia dingin note na kikhop uh ciangin khat in la sak ding nei, khat in Pasian’ thu a gen ding nei, khat in pau lamdang tawh thugen ding nei, khat in tua a kigente a khiatna gentheih nading nei cih bangin na om ding uh hi. Hih a tuamtuamte khempeuh, pawlpi’ phattuam nading ahih ding kisam hi.

²⁷Pau lamdang tawh thugen nuam a om leh zong, nih bang, ahih kei leh a tam penin thum bang in gen bek ding a, tua bangin a gen uh ciangin zong khat a man khit ciangin khat in a banbanin gen ding uh hi.

²⁸Ahi zongin a khiatna a genthei ding a om kei leh zong, kikhopna sungah pau lamdangin a pau nuam pa gamdai takin om ding a, amah le Pasian tawh kikal bekah kigen ding uh hi.

²⁹Pasian thu gen ding a neite sung panin nih le thum bang bek in a banbanin gen ding uh a, adangte in limtakin na tel ngaih ding uh hi.

³⁰A kikhawm mite sung panin mi khatpeuh in Pasian thu gen ding hong neih leh tua a thugen lai pa khawl phot ding hi.

³¹Na vekpi-un a thu thei-in thahatna na ngahtheih nadingun no thugen ding a neite khempeuh in khatkhatin thu na ban gen ding uh hi.

³²Pasian in eite ahi zelzul dingin a hong sam hi lo a, hoihtak nuamtakin a om dingin a hong sam ahih manin Pasian’ thu gen ding lawpna lungsim pen a gen ding pa a ki-ukzawh ding a kisam ahi hi. Pasian’ pawlpi mite khempeuh lakah a kizang ngeina ahih mah bangin,

³⁴mihon biak kikhopna sungah numeite pau loin om uh hen. Numeite a kiniamkhiat nading thu Jew Thukham in a gen mah bangin amaute in mihon lakah thu a gen ding uh kiphal lo hi.

³⁵Amaute in a theihnop uh thu a om leh, inn panin a pasalte uh dong ta uh hen. Bang hang hiam cih leh mihon lakah numeite kam a pau ding zumhuai hi.

³⁶Note kiang bek panin Pasian’ thu hong kipan a, note tung bekah a hong tung sa zenzen na hi uh hiam?

³⁷Mi khatpeuh in Kha Siangtho hong piak siamna a nei, Pasian thugen ka hi hi, ci-in a kingaihsut leh hih lai ka hong gelhte pen Topa’ thupiakna tawh a gelh ka hihlamtak a phawk ding kisam hi.

³⁸Hih ka thugente a don kei leh amah zong don kei pah un.

³⁹Tua ahih ciangin sanggamte aw, Pasian’ thu hilh ding ngaihsut lian penin na nei unla, ahi zongin pau lamdang a paute na kho dah hoh un.

⁴⁰Na khempeuh a kilawm a kituakin na hih un.