Read Tedim Chin 1 KORIN MASA 15 Bible Online

1 KORIN MASA 15 - Tedim Chin bible

1 KORIN MASA 15

¹Sanggamte aw, note kiangah ka hong hilh, note in hong sangin kiptakin na let uh thu, na phawkkik ding uh ka deih hi.

²Kei’ hong hilh thu pen lungdamna thu ahi hi. Note in kiptakin tua lungdamna thu na let nak-uhleh hotkhiatna a ngah na hi uh hi. Tua hikeileh na upna uh a mawkna ahi hi.

³Kei tungah a hong kihilh a thupi pen note tungah ka hong gensawn a, tua in: Lai Siangtho sungah a kigelh mah bangin eite’ mawhna tang dingin Khrih hong si-in

⁴kivui a, Lai Siangtho sungah a kigelh mah bangin a ni thum ni-in Pasian in hingkiksak hi.

⁵Tua ciangin Peter kiangah kilang a, a zomah sawltak sawm le nihte kiangah kilang hi.

⁶Tua ciangin thu um mi zanga val tungah thakhatin kilang hi. Tua mi zanga valte, pawlkhat a sih khit tei hangin a tamzaw nungta lai uh hi.

⁷Tua ciangin James tungah kilang a, tua banah sawltak sawm le nihte tungah kilang leuleu hi.

⁸A tawpna penah, kei pen a ngeina bangin a suak lo naungek tawh a kibang hinapi-in kei tungah zong hong kilang hi.

⁹Bang hang hiam cih leh kei pen Pasian’ pawlpi a bawlsia mipa ka hih manin sawltak cih dingin zong a kilawm lo zah dongin sawltakte lakah a neupen ka hi hi.

¹⁰Tua bang hitaseleh Pasian’ hehpihna tawh tu-a ciangah ka om a, kei tungah a hong piak ama hehpihna a mawkna suak lo hi. Sawltak dangte khempeuh sangin na nakpitakin ka sem zawsop hi. Tua ka sepzawhna pen keima hatna hang hi loin Pasian’ hong hehpihna hang ahi hi.

¹¹Tua ahih ciangin kei ka hi a, sawltak dangte in ahi zongin hong hilh thu pen Khrih’ thawhkikna thu mah hi a, note’ up zong tua thu mah ahi hi.

¹²Tu-in gen penin a kinei thu in: Sihna panin Khrih kihingkiksak hi, cihna thu ahih manin, bang hangin note pawlkhat in, misite thokik lo ding hi, ci thei na hi uh hiam?

¹³Tua bangin misite a thokik lo hileh Khrih zong a kithokiksak lo hi ding hi.

¹⁴Khrih a kithokiksak lo hileh kote’ thuhilhna a mawkna hi ding a, note’ thu up zong a mawkna mah suak ding hi.

¹⁵Tua bek zong hi lo lai-in, misite a kihingkiksak lo ding hileh Pasian in Khrih hingkiksak hi, ci-in teci pang ka hih manun, mite kiangah Pasian’ thu a man lopi-in a gen ka suak ding uh hi.

¹⁶Bang hang hiam cih leh misite a kihingkiksak lo ding hileh Khrih zong kihingkiksak lo ding hi.

¹⁷Khrih a kihingkiksak lo hileh note’ upna a mawkna hi ding a, na mawhna sung mah uhah note a omlai na suak ding uh hi.

¹⁸Khrih thu a um, a sisa mite zong a mawkna mah hi lai ding hi.

¹⁹Khrih hangin i lamet thu pen hih i leitung nuntak sung thu ding bek hi takpi leh leitung midang khempeuhte sangin a hehpihhuai zaw ihi ding hi.

²⁰Ahi zongin a thuman taktak ci lehang, a sisa mite zong hingkik takpi ding hi cih a kitel theih nadingin sihna panin Khrih kihingkiksak khinzo hi.

²¹Bang hang hiam cih leh mi khat hangin sihna a om mah bangin mi khat hang mahin misite zong hinkikna om hi.

²²Bang hang hiam cih leh Adam tawh a kizop manin mi khempeuh si a, tua mah bangin Khrih tawh a kizom khempeuh zong kihingkiksak ding hi.

²³Ahi zongin tua hinkikna pen ama hun tawh kizui-in a banbanin hi ding hi. A masa penin Khrih hi a, Khrih hong paikik ciangin ama pawlte khempeuh hingkik ding hi.

²⁴Tua ciangin Khrih in ukna, vangliatna, aana a nei ama galte khempeuh a zawhgawp khit ciangin Pa Pasian tungah ukna aana ap ding a, tua ciangin hih leitung hun beina hong tung ding hi.

²⁵Bang hang hiam cih leh Pasian in a galte khempeuh zo-in a khenuai-ah a koihkhit hun dong mateng Khrih in uk ding hi.

²⁶A tawpna-ah suksiat ding a gal nunung pen in sihna ahi hi.

²⁷Bang hang hiam cih leh Lai Siangtho in, “Pasian in na khempeuh ama khenuai-ah koih hi,” na ci hi. “Na khempeuh,” a cih ciangin Khrih’ khutnuai-ah na khempeuh a koih Pasian mahmah simloh a vekpi-in a huamkhin ahihna kitel hi.

²⁸Khrih’ khutnuai-ah na khempeuh a kikoih ciangin ama khutnuai-ah na khempeuh a koihsak Pasian’ khutnuai-ah Tapa mahmah zong om ding a, Pasian pen na khempeuh le a kuamah peuh tungah a lianpen hi ding hi.

²⁹Tua ciangin thu khatah, a sisa mite’ tang dingin tui a kiphum mite in bang a deihna uh ahi hiam? Misite kihingkiksak het lo ding ahihleh bang hangin a sisate’ tang dingin tui kiphum ahi uh hiam?

³⁰A site hinkikna om lo ding hileh bang hangin kote in nisimin gimna le sihna zah dong dingin lauhuaina thuakin na sem nuam ding ka hi uh hiam?

³¹Sanggamte aw, i Topa Jesuh Khrih thu-ah note hangin ka kisaktheih zah mah bangin nisim mahin sihna a thuakthuak ka hi hi.

³²Hih leitung a phattuam nading bekin ngaihsun ni ci lehang, sahang tawh kilai bang keekin Efesa khuamite tawh ka kihihna uhah gim thaman bang ngah ka ahi hiam? Misite hinkikna om lo ding hileh, “Zing ciangin si kha ding ihih manin i duhduhin an ne zu ne-in nuamtakin om ni,” ci-in paunak a om bangin gamtat lel ding ahi hi.

³³Sanggamte aw, mi’ khemsa-in ta kei un. Kikholhpih hoih lote in mi siasak thei hi.

³⁴Hoihtakin thu ngaihsun phakik unla, mawhna gamta nawn kei un. Note pawlkhat in Pasian thei het lo na hih manun maizumhuai mahmah hi.

³⁵Mi pawlkhatte in, “A sisa mite bangci thawhkik ding a, bang pumpi tawh thokik ding ahi hiam?” cikha thei hi.

³⁶Tua bang ngaihsutna haihuai mahmah hi. Khaici na tuh uh ciangin a muat lopi-in hong po thei lo hi.

³⁷Mangbuhci ahi a, khaici dang khat peuhpeuh ahi zongin na tuh uh ciangin hong po-in a khankhit ciangin a kung omzia dingteng tawh a tuh na hi kei uh a, a khaici bek a tuh na hi uh hi.

³⁸Ahi zongin Pasian in ama hoihsak bangin a kung ding na pia a, khaici nam tuamtuamte a’ ding kung nam tuamtuam a guan hi.

³⁹Tua mah bangin sa a nei nuntakna nam khempeuh zong a sa kibang kim lo hi. Mihing sa, ganhing sa, vasa sa, ngasa sa, cih bangin a nam tuamtuam a om hi.

⁴⁰Vantung pumpi om a, leitung pumpi zong om hi. Vantung pumpi a hoihna a tuam khat hi a, leitung pumpi a hoihna zong a tuam khat mah ahi hi.

⁴¹Ni a hoihna a tuam khat hi a, kha a hoihna a tuam khat hi a, aksite a hoihna a tuam khat mah ahi hi. Aksite nangawn a hoihna a tuamtuamin omlai hi.

⁴²Misite a thawhkikna zong hihte mah tawh kibang hi. A kiphum pen a muat thei hi a, a thokik pen a muat thei lo ahi hi.

⁴³A kiphum laitakin hat loin melsia a, a kithawhkiksak ciangin thahatin a melhoih hi.

⁴⁴A kiphum laitakin leitung pumpi hi a, a kithawhkiksak ciangin kha pumpi ahi hi. Leitung pumpi a om mah bangin kha pumpi zong a om ding ahi hi.

⁴⁵Tua ahih manin Lai Siangtho in, “A masa Adam pen leitung nuntakna a nei mihing hong suak hi,” na ci hi. Ahi zongin a nunung Adam pen nuntakna a pia thei Kha ahi hi.

⁴⁶Ahi zongin kha pumpi a om masa hi loin leitung pumpi a om masa hi a, leitung pumpi a omkhit ciangin kha pumpi a omthei pan ahi hi.

⁴⁷A masa Adam pen leitung leivui tawh a kibawl hi a, a nunung Adam pen vantung panin a hong pai ahi hi.

⁴⁸Leitung tawh a kipawl mite pen lei tawh a kibawl mite tawh a kibang hi a, vantung tawh a kipawl mite pen vantung panin a hong pai mipa tawh a kibang ahi hi.

⁴⁹Eite in lei tawh a kibawl mite’ lim i puak mah bangin vantung panin a hong pai Mipa’ lim zong a pua ding ihi hi.

⁵⁰Sanggamte aw, note kiangah ka hong gennop thu in: Pasian’ Ukna sungah hih leitung silesa pumpi lut thei lo ding a, a siathei pumpi pen a siathei lo pumpi suak thei lo ding hi.

⁵¹Kuamah kim in a theih loh thusim khat na ngai un. Eite khempeuh a si khin ding ihi kei a, thakhatthu-in a kikhelvat ding ihi hi.

⁵²Peengkul nunung hong gin’ ciangin mitphiat kikal sungin i kikhelpak ding hi. Bang hang hiam cih leh peengkul hong gin’ ciangin misite a sithei nawn lo dingin hong tho ding a, i vekpi-in i kikheel ding hi.

⁵³A muatthei pumpi pen a muat thei lo pumpi-in hong kikheel ding a, a sithei pumpi pen a sithei lo pumpi-in hong kikheel ding hi.

⁵⁴A muatthei pen a muat thei lo hong suakin, a sithei pen a sithei lo hong suah ciangin Lai Siangtho thu hong tung taktak ding hi. Lai Siangtho in, “Sihna maimangin gualzawhna in khuplet hi.

⁵⁵Sihna aw, na gualzawhna koi-ah om a, midangte na suksiat zawh nading na thahatna koi-ah omta ahi hiam?” na ci hi.

⁵⁶Sihna a pianna mawhna hang hi a, mawhna a kitheihna Thukham hang ahi hi.

⁵⁷Ahi zongin i Topa Jesuh Khrih hangin gualzawhna a hong pia Pasian tungah i lung a dam hi.

⁵⁸Tua ahih ciangin ka hong it sanggamte aw, Topa’ hangin na nasepnate uh a mawkna hi ngei het lo hi, ci-in na theih uh mah bangin Topa a dingin a tawntungin na sem unla, ling hetloin lungsim kiptakin na om ta un.