Read Tedim Chin 1 KORIN MASA 16 Bible Online

1 KORIN MASA 16 - Tedim Chin bible

1 KORIN MASA 16

¹Tu-in Judea gam a om Pasian mite huh nading sum kaihkhop nading thu tawh kisai-in: Galatia gam a pawlpite in a hih ding zia uh ka gen bangin note in zong na hih un.

²Kei ka hong pai ciangin sumpi kaihkhop tawm a om loh nadingin na ngahna uh tawh kizui-in Nipi simin na tuamkoih unla, na na khol un.

³Kei ka hong tun ciangin Jerusalem khua-ah na huhna uh sumte a puak dingin hoih na sak uh mite sawlin, lai tawh i paisak ding hi.

⁴Kei mahmah zong ka va pai ding hoih i sak leh amaute tawh ka va paikhawm ding hi.

⁵Masedonia gam nawkin khualzin sawm ka hih manin tua gam sung ka zin khit ciangin no kiangah ka hong pai ding hi.

⁶Note kiang panin mundang ka zin nading peuhpeuhah kei na hong huh theih nadingun note kiangah tomno sung bek hi loin phalbi hun sung tawntung bang ka hong taamthei kha ding hi.

⁷Bang hang hiam cih leh Topa in hong thukimpih nakleh khualzin kawmin a hong nawk bek hi loin, note kiangah hun hoihkhop khat ka om nuam hi.

⁸Ahi zongin hih Efesa khua mahah Pentekos Pawi hun ciang dong ka om ding hi.

⁹Hong langpang tampi a om tei hangin limtakin na septheih nading lam tampi tak a om hi.

¹⁰Note kiangah Timoti hong pai zenzen khak leh, amah pen keimah bangin Topa’ na a sem ahih manin nuam a sak theihtheih nadingin na bawl un.

¹¹Kuamah in na simmawhbawl kha kei unla, kei kiang a hong tunkik theih nadingin nuamtakin a khualzin a hong zoptheih nadingin na huh un. Thu uppih i sanggam dangte tawh kei kiangah a hong pai dingin ka lamet ahi hi.

¹²I sanggam Apollos ahihleh, thu uppih sanggam dangte tawh no kiangah hong hawh nadingin ka hanthot zel hangin tu tadihin hong hawhpah ding lungtungzo nai lo hi. Ahi zongin hunhoih a ngah peuhpeuh ciangin hong pai ding hi.

¹³Kiging tawntungin na upna uhah kip unla, thahatin hang un.

¹⁴Na sepna khempeuh uhah ki-itna tawh na gamta un.

¹⁵Sanggamte aw, Stefanas-te innkuan pen Akhaia gam sunga thu um masa pente ahihna le Pasian’ mite a dingin nasem dingin a kipia mite ahihna thu na thei uh hi.

¹⁶Tua bang mite le amaute tawh tua bangmahin na a semkhawm mite’ thu na man nadingun ka hong thum hi.

¹⁷Stefanas, Fortunatas le Akhaikas-te hong paina hangin ka nuam mahmah hi. Note tawh ka kimuh mah tawh hong kibangsak a,

¹⁸note hong lungnopsak mah bangin kei zong ka lung hong nuamsak hi. Hih bang mite, limtakin na phawk ding uh ahi hi.

¹⁹Asia gam a om pawlpi a tuamtuamte in note hopihna kam hong khak uh hi. Aquila le Prisilla-te in zong amau’ inn-a kikhawm pawlpite tawh Topa’ hangin lungsim taktak tawh hopihna kam hong khak uh hi.

²⁰Hih lai-ah a om thu upna sungah i sanggamte khempeuh in zong hopihna kam hong khak uh hi. A siangtho kinapna tawh note khatlekhat na kihopih un.

²¹Keimah Paul in ka hong hopih hi, cihna kamte ka khut mahmah tawh ka gelh ahi hi.

²²Topa a it lo mi peuhmah in samsiatna ngah tahen. I Topa hong pai tahen.

²³Topa Jesuh hong hehpihna thupha, note tungah hong tung tahen.

²⁴Jesuh Khrih sungah note ka hong itna, note tungah hong kip ta hen. Amen.