Read Tedim Chin 1 KORIN MASA 4 Bible Online

1 KORIN MASA 4 - Tedim Chin bible

1 KORIN MASA 4

¹Kote pen Khrih’ nasem, le Pasian’ thusim a zeekte-in nong ngaihsut ding uh ahi hi.

²Nasem i cih mite pen a topa uh tungah citakin a thuman ding uh kisam hi.

³Note na hi uh a, leitung mite in ahi zongin kei tungah mawhna hong zongin thu nong khen uh hangin bangmah phamawh ka sa kei hi. Kei mahmah zong kimawhsakin thu ka kikhen kei hi.

⁴Ka kisuan nading thu bangmah ka thei het kei hi. Ahi zongin tua pen ka dik hi, cihna hi pah lo hi. Keima thu a hong khen ding pa pen Topa ahi hi.

⁵Tua ahih manin a hun a tunma-in kuamah mawhsakin thu khen kei un. Topa hong pai ciangin a tawpna thukhenna hong om ding a, amah in thusimte hong pholakin, mihingte in a lungsim sung uhah a ipcip uh thute hong telkheh ding hi. Tua ciangin mi khempeuh in amau’ ngah dingin a kilawm phatna, Pasian’ kiang panin a ngah ciat ding uh hi.

⁶Sanggamte aw, note a’ ding ka ngaihsutna-in hih thu khempeuh Apollos le keima pumpi tungah ka zat uh thu ahi hi. “A khengvalin gamta kei un,” cihna thu na theih nadingun ko tegel, etteh dingin ka hong zang hi. Note in mi khatpeuh kisaktheihpihin mi khatpeuh na simmawhbawl kei ding uh hi.

⁷Note in bang kisaktheihpih na hi uh hiam? Tu-a na neih khempeuh uh Pasian’ hong piak hi lo ahi hiam? Tua ahihleh hong kipiasa bek ahih manin a bang kisaktheihpih na hi uh hiam?

⁸Na deih khempeuh uh neikhin na kisa uh a, haukhin na kisa uh hi. Kote’ om loh kalin kumpi a suak khinin na kingaihsun uh hi. Note tawh kumpi hikhawm ding ihih manin kumpi taktak a suak takpi na hi le-uhcin ka ut mahmah hi.

⁹Ko sawltakte pen vantungmi le leitung mi khempeuh in a et dingin mipi’ mai-ah thahna a thuak dingin thukhenna a kipia mi bangin Pasian in a zaneu penin hong koih tawntung tawh kibang ka sa hi.

¹⁰Khrih hangin mite mai-ah kote mihai ka suak uh a, ahi zongin note pen Khrih sungah mipil na kisa uh hi. Kote ka thaneem uh a, ahi zongin note a hat na kisa uh hi. Kote hong kisimmawhbawl a, ahi zongin note hong kizahtakbawl na kisa uh hi.

¹¹Tuni ciang dong gilkial dangtakin puansilh ding nangawn nei loin ka om uh hi. Inn le lo zong nei loin hong kinotsuk hong kinotto kawikawi hi.

¹²Kote’ nektawm ding ka thatang mahmah uh tawh nakpitakin ka sem uh hi. Hong kisamsiat ciangin thupha ka lehpiak uh a, hong kibawlsiat ciangin ka gumthuak uh hi.

¹³Zahpihna kam tawh hong kihopih ciangin kamkhum tawh ka dawng uh hi. Mite’ muhna-ah tuni ciang dong ninbulom le leivuithem bang bek ka hi uh hi.

¹⁴Hih bangin lai ka hong gelh ciangin na maizum nading uh ka deihna hi lo a, ta itte thuhilh bangin a hong thuhilh ka hi hi.

¹⁵Khrih thu hong hilh ding mi a tul a za-in na nei uh ahi zongin pa-a na neih ding uh kei bek a om ka hihna thu na phawk un. Bang hang hiam cih leh note kiangah lungdamna thu ka hong hilhna hangin Jesuh Khrih sungah nomau’ pa ka suak hi.

¹⁶Tua ahih manin keima gamtatzia na hong zuih nadingun ka hong thum hi.

¹⁷Tua thu hangin note kiangah, ka it mahmah, Topa thu sungah a citak mahmah, ka tapa Timoti ka hong paisak hi. Amah in, Jesuh Khrih thu sungah ka nuntakna ziate le pawlpi a tuamtuamte kiangah ka thuhilhte khempeuh, note tungah hong hilh ding hi.

¹⁸Note kiangah kei hong hawh lo ding, ci-in ngaihsun kha uh ahih manin mi pawlkhat a kiphasak uh hi.

¹⁹Ahi zongin Topa in hong thukimpih nakleh kei ka hong hawhbaih ding a, tua a kiphatsak pau mawkmawkte in bang ciang taktak a hihzo ngap uh hiam, cih thu keima pumpi tawh ka mu ding hi.

²⁰Bang hang hiam cih leh Pasian’ Ukna thu i cih pen kampi bek tawh genna hi lo a, Pasian’ vang tawh nungta-in gamtatna ahi hi.

²¹Tua ahih manin note taii-in gim a hong pia dingin ka hong pai ding le itna le lungnemna lungsim tawh ka hong pai ding koi deihzaw na hi uh hiam?