Read Tedim Chin 1 KORIN MASA 6 Bible Online

1 KORIN MASA 6 - Tedim Chin bible

1 KORIN MASA 6

¹Note khatlekhat thu na kineih uh ciangin Pasian’ mi siangthote khensakzaw loin lawki thukhente’ mai na kitun ngam uh hi.

²Pasian’ mite in leitung mite’ thu a khensakzaw ding ahihlam thei lo na hi uh hiam? Note pen leitung mite’ thu a khensak ding na hih uh ciangin tua bang thu neute khen thei lo lawmlawm na hi uh hiam?

³Eite pen vantung mite’ thu nangawn a khensak ding ihih lamtak thei lo na hi uh hiam? Tua ahih manin hih leitung a no’ thu neuneute leltak na khentheih zawk kan ding uh ahi hi.

⁴Tua bang hinapi-in hih bang thu themthem hong pian ciangin pawlpi sungah bangmahin a kisim lo mite’ mai kitun ding na hi uh hiam?

⁵Note a dingin zumhuai mahmah hi. Note khatlekhat na kithuneihnate uh a khenthei ding note lakah mipil khat beek om buang ding hi.

⁶Tua hinapi, khatlekhat thu kineihin zum na kitun uh a, lawki thukhente na khensak tazen uh hi.

⁷Note khatlekhat zum na kitut mahmah uh zong a gina het lo na hihna uh hong kilangsak hi. Bang hangin thuakzaw mai lo a, sum ngamzaw mai lo na hi uh hiam?

⁸Note khatlekhat kisu-in, khatlekhat na kisut zawsop uh a, na sanggamte teekteek nangawn uh tawh thu na nei uh hi.

⁹Migilote, Pasian’ Ukna sungah a lut hetloh nading thu na thei uh hi. Note kihaibawl kei un. Numei tawh a paktatte, milim biate, mi zi ahih kei leh mi pasal tawh a mawhte, pasal le pasal a khialte,

¹⁰a gutate, a huaihamte, zukhamte, mi gensiate, ahih kei leh mi’ na a sutte khat beek, Pasian’ Ukna sungah lutthei het lo ding hi.

¹¹Note pawlkhat, tua bangin na gamta uh hi. Ahi zongin note pen i Topa Jesuh Khrih le i Pasian’ Kha Siangtho hangin mawhna panin a hong kisiangsak khinsa, Pasian’ tungah a kipiasa, Pasian tawh a kipawlsa mite na hi uh hi.

¹²“Ka ut peuhpeuh ka hihtheih nading thu om hi,” a ci omkha ding hi. Ahi zongin na khempeuh hih ding kilawm lo hi. Kei zong ka ut khempeuh ka hih theih hangin tua bang gamtatna khat peuhpeuh’ sila ka suak nuam kei hi.

¹³“An pen i gilpi a’ ding hi a, gilpi zong an a’ ding mah hi lo ahi hiam?” a ci zong omkha ding hi. Ahi zongin Pasian in tua tegel a beisak hun hong tung ding hi. Pumpi pen paktatna-in zat ding hi lo a, Topa’ na sepna-in zat ding hizaw hi. Topa in pumpi a’ ding na hong sem hi.

¹⁴Pasian in sihna panin Topa thokiksak hi. Tua mah bangin eite zong ama vangliatna tawh hong thokiksak ding hi.

¹⁵Na pumpi uh, Khrih pumpi nate khat ahih lamtak thei lo na hi uh hiam? Khrih pumpi nate khat la-in numei tawh paktatte’ pumpi nate khat suaksak ding ihi hiam? Tua cih ngei ding hi peuhmah lo hi.

¹⁶Numei paktat tawh a pumpi a kizomsak pa pen tua numei tawh pumkhat sakhat a suak ahih lamtak thei lo na hi uh hiam? Bang hang hiam cih leh Lai Siangtho in, “Tua mi nihte pumkhat a suak ding uh hi,” na ci hi.

¹⁷Ahi zongin Topa tawh a kizomte pen kha thu tawh kisai-in amah tawh pumkhat ahi uh hi.

¹⁸Numei tawh mawhna na pelh un. Mi khat in a bawl mawhna tuamtuamte in ama pumpi sukha lo hi, a ci om hi. Ahi zongin numei tawh a mawhte, ama pumpi tungah a khial ahi hi.

¹⁹Na pumpi uh, Pasian in a hong piak, note’ sungah a teng Kha Siangtho’ biakinn ahih lamtak thei lo na hi uh hiam? Note’ pumpi, nomau’ neihsa hi lo a, Pasian a’ ahi hi.

²⁰Note pen Pasian in a hong leisa na hih manun na pumpi uh Pasian’ minthan nadingin na zang un.