Read Tedim Chin 1 KORIN MASA 7 Bible Online

1 KORIN MASA 7 - Tedim Chin bible

1 KORIN MASA 7

¹Tu-in nong laigelhna uh thu tawh kisai-in: Pasal in zi nei kei leh hoihzaw lo ding ahi hiam, na ci uh hi.

²Ahi zongin numei tawh paktatna tamlua ahih manin pasal in ama zi tuam nei hen la, numei in ama pasal tuam nei leh hoih hi.

³Pasal in a zi a luppih dingin a kilawm zahin luppih ding a, a zi in zong a pasal a luppih dingin a kilawm zahin a luppih ding ahi hi.

⁴Zi in ama pumpi a ut bangin zangthei nawn loin a pasal’ zat ding hi a, tua mah bangin a pasal in zong ama pumpi a ut bangin zangthei nawn loin a zi’ zat ding ahi hi.

⁵Thungetna-in hun na zattheih nadingun tawlkhat sung tuam om ding thukim khawm masa lopi-in lupkhop ding kinialkha kei un. Tua bangin tawlkhat sung na tuam om khit uh ciangin note’ pumpi’ deihna hangin Satan’ ze-etna sungah na pukkhak loh nadingun a ngeina bangin lupkhop ding kipan kik un.

⁶Hih bangin kong gen ciangin a hoihpen hi, ci-in thugenna hi lo a, note’ pianzia tawh kizui-in hithei tei hi, cihna lel ahi hi.

⁷Mi khempeuh keimah bangin om ciat le-uh hoih ka sa hi. Ahi zongin mi khempeuh in Pasian’ piak hihzawhna a tuamtuam nei a, khatlekhat kibang lo hi.

⁸Pasal nei nai lote le meigongte pen keimah bangin tanggawl om paisuak le-uh hoih ka sa hi.

⁹Ahi zongin a pumpi uh a ki-ukzawh kei ding uhleh pasal nei le-uh hoihzaw hi. Nei nuampipi a neih loh tentan sangin pasal neih hoihzaw hi.

¹⁰A neisate tungah, kei’ ngaihsutna hi lo, Topa’ ngaihsutna ka gennop thu in: Zi in a pasal ciahsan kei tahen.

¹¹A ciahsan leh zong pasal nei loin om paisuak hen. A om paisuakzawh kei leh a pasal ngei mah zuankik hen. Pasal in a zi ma kei tahen.

¹²Adangte tungah, Topa’ cih hi lo, keima ngaihsutna ka gennop thu in: Mi khatpeuh in thu um lo mi khat zi-in a neih leh, pasal mahin neih ding a zi a lungkim ahih nakleh ma kei tahen.

¹³Numei khat in thu um lo mi khat pasalin a neih leh, zi mahin neih ding a pasal a lungkim ahih nakleh ma tuan kei tahen.

¹⁴Bang hang hiam cih leh thu um lo pasal pen a zi’ hangin thu um mi suakthei ding a, thu um lo zi pen a pasal’ hangin thu um mi suakthei ding hi. Tua bang hileh a tate uh thu um mi suakthei ding uh hi. Ahi zongin tua bang hi kei le-uh a tate uh thu um mi suakthei lo ding uh hi.

¹⁵Ahi zongin thu um lo zi in ahi a, thu um lo pasal in ahi zongin kikhen ding a ut leh kikhen ta uh hen. Tua bang thute-ah thu um zi ahi a, thu um pasal ahi zongin a awk nading thu om lo hi. Pasian in nuamtakin a nungta dingin a hong sap ahi hi.

¹⁶Thu um zi in, “Ka pasal honkhiazo kei ning,” bangci-in cithei ding a, thu um pasal in, “Ka zi honkhiazo kei ning,” bangci-in cithei zenzen ding ahi hiam?

¹⁷Mi khempeuh, Pasian in amau’ nuntak nadingin a sehna, le Pasian in a sap laitakin a omzia bangbangun nungta uh hen. Hih bangzia-in om ding pen pawlpi khempeuhah hilhin ka neih ngeina khat ahi hi.

¹⁸Vun ki-atsa mi khat Pasian in a sap leh, a vun ki-atna lim phiat tuan kei tahen.

¹⁹Bang hang hiam cih leh vun atna le vun at lohna a thupi hi lo a, Pasian’ thupiakte zuih ding a thupi ahi hi.

²⁰Tua ahih manin a kuamah peuh, Pasian in a sap laitakun a omzia bangbangun a om paisuak ding uh ahi hi.

²¹Sila ahi mi khat Pasian in a sap leh phamawh lo hi; sila mahin ki-om thei veve hi. Ahi zongin suahtak theih nading lampi a om leh tua hunhoih hamphatna zang tahen.

²²Bang hang hiam cih leh Topa in a sap sila ahi mi pen Topa a dingin mi suakta hi a, tua mah bangin Khrih in a sap a suakta mi pen Khrih a dingin sila ahi hi.

²³Note pen Pasian’ hong leisa na hih manun mite’ sila suak kei un.

²⁴Tua ahih manin sanggamte aw, hong kisap laitakin na omzia uh mah bangin Pasian’ sungah na om paisuak un.

²⁵Tu-in a nungak lai a tangval laite thu tawh kisai-in: Topa kiang panin thu ngahna ka neih loh hangin Topa’ hehpihna tawh a muantaak ahi keima ngaihsutna ka hong gen ding hi.

²⁶Tu laitakin a om bangun om paisuak leh hoihzaw ding hi, cihna thu tawh kisai-in, tu laitak a lungkhamhuai thu ka ngaihsut ciangin tu laitakin a om bangun om paisuak leh hoihzaw mah dingin ka ngaihsun hi.

²⁷Ahi zongin zineite in kikhen ding ngaihsutin nei kei tahen. Nungak lai tangval laite in lawm zong kei tahen.

²⁸Ahi zongin pasal in zi a neih hangin a khial hi lo a, numei in zong pasal a neih hangin a khial hi lo hi. Ahi zongin zi nei, pasal neite in leitung lungkhamna tampi thuak uh ahih manin tuate tawh kipelhzaw le-uh hoih ka sa hi.

²⁹Sanggamte aw, tua bang ka cih ciangin a kiseh hun hong nai mahmah ta hi, ka cihnopna ahi hi. Tua ahih manin zi neite pen zi nei lo mah bangin kingaihsun uh hen la,

³⁰a dahte pen a dah lo mah bangin kingaihsun uh hen la, a lungdamte pen a lungdam lo mah bangin kingaihsun uh hen la, na a leite pen bangmah a nei lo mah bangin kingaihsun uh hen la,

³¹leitung na nuamtakin a zangte pen a zang lo mah bangin kingaihsun ta uh hen. Bang hang hiam cih leh hih leitung pen sauveipi kip nawn lo ding hi.

³²Note, lunghihmawhna tawh na kipelh ding uh ka hong deihsak hi. Zi a nei lote in Topa a lungdamsak theih nadingun Topa’ thu bek kinin nei uh hi.

³³Ahi zongin zi neite in a zi a lungdamsak theih nadingun hih leitung vai kinin nei uh a,

³⁴a ngaihsutna uh khen nih pha hi. Pasal a nei lo numeite in a lungsim le a pumpi uh Topa a dingin zangnuam uh ahih manin Topa’ nasep bek kinin nei uh hi. Ahi zongin pasal a nei numeite in a pasal uh a lungdamsak theih nadingun hih leitung vai kinin nei uh hi.

³⁵Hih bangin ka hong gen ciangin note’ haksat nading deihna hi loin note’ hoih nading ka deihna ahi hi. Note a kilawm a kituakin gamta-in, lungsim le thatang siit nei loin Topa’ na na septheih nading uh ka hong deihsakna ahi hi.

³⁶Tenpih dingin lawm dongkhin napi-in kiten nawn loh ding a ngaihsunte’ thu panin: Tenpih kei leng a numei tungah a thuman lo hi ding cihna ahi a, zi a deihna lungsim a lianlua ahi a, tenpih ding mah hoih hi, ci-in ngaihsutna ahi zongin a neih leh a lungkimna bangun gamta-in tenpih uh hen. Tua thu-ah bangmah khialhna om lo hi.

³⁷Ahi zongin kuama sawl hi loin zi nei lo dingin a lungsimah khauhtakin khentatin, a lungsim ki-ukzo taktakin a ngaihsutsa ahih nakleh a neih loh hangin phamawh lo hi.

³⁸Tua ahih manin a neite zong hoih a, a nei loin a kikem zote hoihzaw lai hi.

³⁹Pasal a nei numei pen a pasal a nuntak laiteng suakta lo hi. A pasal a sih leh a deih peuhpeuh tawh kitengthei ding a, ahi zongin thu um mi bek tenpih ding hi.

⁴⁰Ahi zongin keima ngaihsutna-ah pasal a neihse sangin tuaci om leh lungdamzaw dingin ka um a, Pasian’ Kha Siangtho’ ngaihsutna mah zong hi-in ka um hi.