Read Tedim Chin 1 KORIN MASA 8 Bible Online

1 KORIN MASA 8 - Tedim Chin bible

1 KORIN MASA 8

¹Tu-in milim biakna sa tawh kisai thu panin: Amaute in, “Ka thei uh hi,” a cih mah bangin eite khempeuh in theihna i neih ciatna thu i thei hi. Tua bang theihna in mite kisatheisak a, ahi zongin itna in mite kipsak hi.

²Mi khat in thu a thei-in a kingaihsut leh a taktakin a theih dingin a kilawmzah a thei nai lo ahi hi.

³Mi khat in Pasian a it leh Pasian in tua mipa a na thei hi.

⁴Tua ahih manin biakna sa tawh kisai thu panin: Milim i cih pen bangmah a om lopi khat lim dingin a kibawl na hi a, Pasian khat bek a om ahihna thu i theih ciat ahi hi.

⁵Leitung le vantungah pasian le topa a kici tampi a om ahi zongin,

⁶eite a dingin Pasian khat bek, Pa khat bek a om hi. Ama a dingin i nuntakna pa, na khempeuh a piangsak pa ahi hi. Eite tungah nuntakna a hong pia, na khempeuh a piangsak Topa Jesuh Khrih khat bek a om hi.

⁷Ahi zongin mi khempeuh in hih thu theikim lo uh hi. Mi pawlkhatte, milim biakna thu-ah kingeinaseh lua khin uh ahih manin tuhun mahmahin zong biakna sate a nek uh ciangin tua milim tawh kisai sa mahin ngaihsunsun lai uh hi. Amaute lungsim thaneem uh ahih manin tua sate a nek uh ciangin a zehphi mahin kingaihsun uh hi.

⁸Ahi zongin tua i nek ante in Pasian tawh i kizopna hong hoihsak tuan lo hi. I nekloh hangin siatna om tuan lo a, i nek hangin zong phatna om tuan sam lo hi.

⁹Ahi zongin note’ utbangin gamtat theih nading thu na neihna uh hangin upna a neu laite a puksak na suahkhak loh nadingun hoihtakin kidawm un.

¹⁰No thuthei-a a kineite, milim biakna inn sungah milim biakna sa na neklam uh, hih thu tawh kisai-ah a lungsim hatzo nai lote in hong mukha zenzen leh milim biakna sa nek ding a hanthawn na suakkha ding uh hi.

¹¹Tua ahih manin note’ thutheihna hangin, Khrih in sihna a thuakpih, thu upna sungah i sanggamte a siasak na suak ding uh hi.

¹²Tua bangin lungsim thaneemte gimsakin, thu upna sungah na sanggamte uh tungah na khialh uh ciangin Khrih tung mahmahah a khial na hi uh hi.

¹³Tua ahih manin nekna in thu upna sungah ka sanggamte khat a khialsak ding ahihleh, amah a pukkhak loh nadingin milim biakna sa ka ne ngei het kei ding hi.