Read Tedim Chin 1 KORIN MASA 9 Bible Online

1 KORIN MASA 9 - Tedim Chin bible

1 KORIN MASA 9

¹Kei pen sawltak ka hi a, mihingte’ khutnuai-a nasem ka hi kei hi. I Topa Jesuh tawh a kimu mi ka hi a, Topa a dingin na ka sepna hangin note pen thu um a suak na hi uh hi.

²Midangte in sawltakin hong ngaihsun ta kei le-uh, note in sawltakin na hong ngaihsut uh a kul ahi hi. Bang hang hiam cih leh Topa sungah na omna uh pen sawltak ka hihlam a kilatna ahi hi.

³Mite in kei hong mawhsak uh ciangin ka gen thu in:

⁴Ka nasepna hangin annek tuidawn hong kipiak ding mah ahi hi.

⁵Sawltak dangte, Topa’ naute, le Peter mah bangin ka khualzinna-ah thu um mi ka zi a tonpih thei ding ka hi hi.

⁶Kei le Barnabas bek, nektawmzon tawh a thuah ding ka hi zenzen kei uh hi.

⁷Kuamah in ama sum bei-in galkap na sem lo uh hi. Leenggui suan napi-in a leenggah a ne lo kuamah om lo hi. Tuu cing napi-in a tuunawi a ne lo kuamah om lo hi.

⁸Hih ka hong gente pen mihingte’ zat ngeina hi a, Thukham in zong a tuaci ding mahin a gen thu ahi hi.

⁹Bang hang hiam cih leh Moses Thukham sungah, “Buh a cil bawngtal a muk na tuam kei in,” ci hi. Hih bang a gen ciangin Pasian’ lunghihmawh pen bawngtalte hi zenzen lo hi.

¹⁰Hih bang a gen ciangin ei mihingte hong cihnopna hi a, eite a dingin a kigelh thu ahi hi. Lo a khopa le an a lapa in amau’ ngah dingin a kilawm an a ngah dingin lametna tawh nasem ahi uh hi.

¹¹Note lakah kha thu tawh kisai khaici hong vawh ka hih manun, note tung panin leitung nate ka ngah uh hangin a lianlua hi lo hi.

¹²Midangte in note tung panin ngahtheih nading thu nei uh ahihleh ko ka nei phazaw lai uh hi. Ahi zongin note tung panin ngahtheih nading thu a om hangin bangmah ka hong la kei uh a, Khrih hangin Lungdamna Thu a dongtangsak ka suahkhak loh nadingun na khempeuhah ka thuak tentan uh hi.

¹³Biakinn-ah nasem dingin a kicial mite in biakinn mah panin an ngah uh a, biakna tau-ah na a semte in biakna sa mah a ngahna uh thei lo na hi uh hiam?

¹⁴Tua mah bangin lungdamna thu a hilhte in tua nasepna mah panin nuntakna a ngah nading uh Topa’ thupiak ahi hi.

¹⁵Ahi zongin hih ngahtheih ding hamphatnate khempeuh ka la kei a, tu-in zong ka ngahtheih nadingin hih lai a hong gelh ka hi kei hi. Hih ka kisialhna teng a mawkna a suah ding sangin ka si nuamzaw hi.

¹⁶Lungdamna thu ka hilh hangin kisialh nading thu bangmah om lo hi. Bang hang hiam cih leh tua thu a hilh ding mahin a hong kisawl ahi hi. Tua ahih manin lungdamna thu hilh kei leng kei a dingin a dahhuai mahmah ahi hi.

¹⁷Keima utthu tawh a sem hi leng sep thaman ka lamen ding hi. Ahi zongin Pasian in a sem dingin hong sawl ahih manin ka sep ding nasep a sem ka hi hi.

¹⁸Tua ahihleh ka sep thaman bang ahi hiam? Ka thaman pen, lungdamna thu tawh kisai ka sepna-ah thaman ngen loin, a khongin Lungdamna Thu hilh ding hamphatna ka neihna ahi hi.

¹⁹Kei pen kuama khutnuai mi hi loin a suakta mi hinapi-in, mi a tam theithei ka ngahzawh nadingin mi khempeuh’ khutnuai mi-in ka kibawl hi.

²⁰Jew mite lakah na ka sep ciangin amaute ka ngahzawh nadingin Jew mite khat mah bangin ka gamta a, Moses Thukham ka zuih ding a kisap loh hangin a zuite ka ngahzawh nadingin amaute lakah na ka sep ciangin amaute mah bangin ka gamta hi.

²¹Tua mah bangin Jew mite’ Thukham in a huam loh Gentail mite lakah na ka sep ciangin amaute ka ngahzawh nadingin Gentail mite bangmahin ka gamta hi. Hih bangin ka gen ciangin Pasian’ thukham a zui lo, cihna hi loin Khrih’ thukham zui-in a gamta ka hi hi.

²²Upna neu mite lakah na ka sep ciangin amaute ka ngahzawh nadingin amaute mah bangin ka gamta hi. Tua ahih manin ahih theihna lam peuhpeuhah mite ka ngahzawh nadingin mi khempeuh’ ngeina ka zui hi.

²³Hih bangin ka gamtatna pen amaute tungah Lungdamna Thu ka tuttheih nading le keima nasep hoihtakin ka septheih nading ka deihna ahi hi.

²⁴Tai kidemna-ah mi khat bek in thaman a ngah ding hinapi-in a vekpi-un tai veve uh hi. Tua ahih manin thaman na ngahzawh nadingun na tai un.

²⁵Kimawlna sungah a kihel mi khempeuh in thu khempeuhah a pumpi uh uk ciat uh hi. Amaute pen a kisiathei pak a ngah nadingun a hanciam uh hi a, eite pen a kisia thei lo i ngah nadingin a hanciam ihi hi.

²⁶Tua ahih manin ngimna nei lopi-in a mawktai ka hi kei a, huihlak khawng a mawktuptup ka hi kei hi.

²⁷Kimawlna sungah midangte a kihel dingin a sam hinapi-in tua kimawlna-ah a kihel zo lo mi ka suahkhak loh nadingin ka pumpi seekin hoihtakin ka ki-uk hi.