Read Tedim Chin 2 KORIN NIHNA 1 Bible Online

2 KORIN NIHNA 1 - Tedim Chin bible

2 KORIN NIHNA 1

¹Jesuh Khrih’ sawltak ahi dingin Pasian in a hong seh keimah Paul le thu upna sungah i sanggam Timoti in, Korin khua-ah a om Pasian’ pawlpi mite le Akhaia gam sungah a om Pasian’ mite khempeuh tungah lai ka hong khak uh hi.

²I Pa Pasian le Topa Jesuh Khrih in note khempeuh tungah dikna le nopsakna thupha hong tungsak tahen.

³Eite’ Topa Jesuh Khrih’ Pa ahi, hehpihna a nei Pa, i kisapna khempeuhah a hong huh Pasian in thupha ngah tahen.

⁴Amah in kote’ haksatna khempeuhah hong huh ahih manin, kote in zong Pasian’ tung panin ka ngah uh tua huhna mah zangin haksatna a nam tuamtuam a thuakte ka huhsawn thei leuleu uh hi.

⁵Khrih hangin gimna tampi ka thuak uh mah bangin amah in zong kote tungah huhna tampi mah a hong pia hi.

⁶Kote in gimna ka thuak uhleh note’ phattuam nading le hotkhiatna na ngah nading uh ahi hi. Kote in huhna ka ngah uhleh zong, note zong a hong kihuh hi a, kote’ thuak bang gimnate na thuak uh ciangin lungduai takin na thuakzawh nading uh thahatna a hong kipia ahi hi.

⁷Note ka hong muanna uh kiam tuan lo hi. Kote’ thuak bangin na thuak uhleh Pasian in kote hong huh mah bangin note zong hong huh ding hi.

⁸Sanggamte aw, Asia gam sunga ka thuaknate uh na hong phawkpih ding uh ka deih uh hi. Ka thuakna uh lianlua mahmah ahih manin nuntak zawh nading lametna om lo hi.

⁹A si ding taktak hi ta hang, ci-in ka kingaihsun uh hi. Ahi zongin tua zahin ka thuakna uh pen kote’ thatang kimuang loin sihna panin misite a hingkiksak Pasian ka muantheih nadingun a piang ahi hi.

¹⁰Tua zahin a lauhuai sih nading panin hong honkhia khinzo a, zong hong honkhia lai ding hi. Mailam hunah zong hong honkhia kikkik ding hi, ci-in amah ka muang uh hi.

¹¹Kote a dingin thu hong ngetsak un. Tua hileh mi tampi in kote a dingin thu a hong ngetsaknate uh Pasian in a hong piakna hangin mi tampi mah in kote’ tang dingin Pasian tungah lungdamna ko thei ding uh hi.

¹²Kote’ kisialhpih thu in: hih leitung a ka gamtatnate uh le a diakdiakin note tungah kong gamtatnate uhah, mihingte’ pilna a zang hi loin Pasian hehpihna vang tawh, Pasian’ deihna bangin lungsim takpi tawh a gamta hi ung, ci-in ka kitheihna lungsim uh ahi hi.

¹³Bang hang hiam cih leh note in simthei-in a thu na theihtheih dingte bek uh a hong gelh ka hi uh hi. Tuhunin a cingin na theih lohte uh zong,

¹⁴Topa Jesuh hong paikik Ni ciangin a cingtakin thei ding na hih manun note hangin ka kisialh uh mah bangin note zong kote hangin na kisial ding uh hi.

¹⁵Tu-a bangin piang taktak ding ci-in teltheih ka hih manin note in hamphatna nihvei na ngah nadingun ka geel a,

¹⁶Masedonia gam ka pai ciangin hong nawk masa-in, Masedonia gam panin ka kilehkik ciangin zong Judea gam a ka paina dingah nong huh theih nadingun hong nawk leuleu dingin ka ngaihsun masa phot hi.

¹⁷Hih bangin ka ngaihsutna pen a mawkkheel themthum hong sa na hi uh hiam? Leitung mihingte bangin angsung phattuam nading a om kei leh a gensa thu a kheel themthumte bang hong sa na hi uh hiam?

¹⁸Pasian a thuman a citak ahih mah bangin note tungah ka hong gente uh zong a kheel themthum ka hi kei uh hi.

¹⁹Bang hang hiam cih leh Silvanas, Timoti, le keimah in note lakah a thu ka hong hilhhilh uh Pasian’ Tapa Jesuh Khrih pen hih ding a cihte hihlo ding ci-in a thu a kheel themthum pa hi lo a, hih ding a cihte hih ding mah hi pah hi.

²⁰Pasian’ thuciamte khempeuh a hih pa pen amah ahi hi. Tua ahih manin Jesuh Khrih hangin Pasian phatin, “Amen,” i cihna zong hih thu hang mah ahi hi.

²¹Khrih sungah kote le note a hong kipsak pa, le nasem dingin kote a hong sawl pa pen Pasian ahi hi.

²²Amah in eite pen ama a’ ihihna ciaptehna eite tungah hong bawl a, ama a’ ihihna le eite tungah a hong piak ding na khempeuh a hong pia takpi ding ahihna a kitel nadingin eite’ lungsim sungah Kha Siangtho a hong mapiak hi.

²³Note kiangah kong pai lohna pen note ka hong dopna hizaw hi. Hih thu hong theihpih ka teci pen Pasian ahi hi.

²⁴Hih bangin um un, ci-in thatanghat thu tawh a hong gen ding ka hi kei uh hi. Note na upna uhah kipkhin na hih manun note’ lungdam nadingin note tawh na a semkhawm ka hi uh hi.