Read Tedim Chin 2 KORIN NIHNA 11 Bible Online

2 KORIN NIHNA 11 - Tedim Chin bible

2 KORIN NIHNA 11

¹Ka hai ahi phial zongin ka haina mah hong thuakpih le-uhcin ka ut hi. Hong thuakpih taktak ta un.

²Pasian in hong aam mahmah bangin note ka hong aam mahmah hi. Nungak le tangval nupa dingin a kigawm mah bangin khat bek ahi Khrih tawh a kigawm dingin nungak siangtho bang na hi uh hi.

³Ahi zongin gulpi in ama zuau ngian tawh Eve a khemzawh bangin na lungsim uh kihei-in Khrih tungah na kipiaknate uh na nusiatkhak ding uh ka lunghimawh hi.

⁴Bang hang hiam cih leh kote’ hilh a hi lo adang Jesuh’ thu a hilh hong pai ciangin lungdam takin na sang pahpah uh a, kote’ hong hilh Kha Siangtho le lungdamna thu tawh a kibang lo kha thu le lungdamna thu hong hilh a om ciangin na sang pahpah uh hi.

⁵Note in sawltak thupi mahmahte hi, ci-in na ngaihsut uh mite sangin themkha zong a neuzaw-in ka kingaihsun het kei hi.

⁶Thugen siamna le pilna thuk ka nei kei kha mah ding hi. Hih thu tawh kisai-in ahihleh, a tawntungin na khempeuhah ka hong gensa uh ahi hi.

⁷Note kiangah Pasian hangin Lungdamna Thu ka hong hilh ciangin note tung panin thaman bangmah ka hong ngen het kei a, note a thupi na suah ding uh ka deihna-in kei ka kiniamkhiat hi. Hih thu tawh kisai-in a sialamin kei hong lehngaihsut zawsop na hi uh hiam?

⁸Note kiangah na ka sep laitakin pawlpi dangte in kei hong vak uh ahih manin, note huh nadingin midangte’ na a kisut ahi hi.

⁹Note lakah na ka sep laitakin Masedonia gam panin a hong pai pawlpi mite in ka sapna khempeuh hong puak uh ahih manin note khat beek ka hong gimsak kei hi. A beisa hunah note ka hong gimsakkhak loh mah bangin mailam hunah zong ka hong gimsakkha het kei ding hi.

¹⁰Khrih thuman keima sungah om ahih mah bangin no Akhaia gam sungah hih ka kisialhna thu mah kizom paisuak ding hi, ci-in ka kiciam hi.

¹¹Hih bangin kam ka pau ciangin note ka hong it loh man ahi hiam? Note ka hong itna hang hizaw hi. Hih thu Pasian in thei hi.

¹²Tua sawltak dangte in, “Kote in zong amau’ sepzia mah bangin ka sem uh hi,” ci-in a kisialh theih loh nadingun tuhunin nasep thaman bangmah ka hong lak loh mah bangin mai lamah zong ka hong la kei ding hi.

¹³Amaute pen sawltak taktak hi loin, sawltak a kineihkhemte hi uh a, a nasepna uhah zong zuau-in, Khrih’ sawltak taktak a battheih nadingun a mel kiseel ahi uh hi.

¹⁴Tua pen lamdangsak ding hi lo hi. Satan nangawn Pasian’ vantungmi tawh a kibangin kibawltawm thei hi.

¹⁵Tua ahih manin Satan’ sawltakte pen thuman nasem bangin a kibawl manin lamdangsak ding hi lo hi. Hun bei ni ciangin amau gamtatna bangun thuak ngawn ding uh hi.

¹⁶Kuamah in mihai-in hong ngaihsun kei hen, ka ci kikkik nuam hi. Ahi zongin a hai-in hong ngaihsun na om uhleh zong tawmkhat ka hong kisialh theih nadingin ka haisapi mahin hong sang veve un.

¹⁷Tu-in ka hong gen ding thute pen Topa’ hong sawl hi lo hi. Tu-a kisialhna kam ka hong pau ciangin mihai taktak mah bangin a pau ka hi hi.

¹⁸Mi tampi in hih leitung ngeinate kisialhpih thei uh ahih manin kei zong ka hong kisial ding hi.

¹⁹Note pil kisa mahmah na hih manun lungdam takin mihaite na sang pahpah uh hi.

²⁰Note, sila-in hong bawlin, note hong thangsiahin, na haina uh nuamtaksa-in hong hih thopthopin, note hong simmawh bawlin, na paang uh a hong bengbengte na sang uh hi.

²¹Tua bangin na om uh zumhuai mahmah hi. Kote ahihleh note tungah ka hong tuaci gamtat ngam kei uh hi. Ahi zongin a kisial ngam om ahihleh kei zong mihai bangin ka hong kisial ngam ding hi.

²²Amaute Hebru mi ahihleh kei zong Hebru mi mah ka hi hi. Amaute Abraham’ suan Israel mite ahihleh kei zong Abraham’ suan Israel mi mah ka hi hi.

²³Amaute Khrih nasem ahihleh kei zong hong hai pau mai ning. Khrih nasem a hoihzaw pekpek ka hi hi. Amaute sangin na ka nak sepzaw a, satna tamvei ka thuakzaw a, sih dektakna tamvei ka tuakzaw hi.

²⁴Jew mite’ khut sungah sawmthum le kua vei satna nga vei tak ka thuak hi.

²⁵Rom mite in thumvei hong sat a, khatvei suang tawh hong deng uh hi. Teembaw siatna thumvei ka tuak a, sun khat le zan khat tawntung tui tungah ka laam ngei hi.

²⁶Khual ka zinzinna lamin tuikhang lauhuaina, misuamte lauhuaina, ka mipihte’ suk ding lauhuaina, Gentail mite’ suk ding lauhuaina, khuapi sung le gamlakah lauhuaina, tuipi tungah lauhuaina, lawm man lote’ hih ding lauhuaina a tuamtuamte ka phukha hi.

²⁷Nasem silbawlin ki-om tawntung a, ihmu man lo liangin zong ka om zel hi. Gilkial dangtakin ka om zel a, annek ding nei lo, giah nading om lo, puansilh ding nei loin ka om hun tampi a om hi.

²⁸Tua bang haksatna a tuamtuam ka thuak banah nisimin pawlpi a tuamtuamte a dingin lunghimawhin ka lunggimpih lai hi.

²⁹A thaneem a om ciangin lungkhampihin kei zong ka thaneem a, mawhna-ah a pukkha a om ciangin dahin ka lunggimpih hi.

³⁰Ka kisialh leh zong ka ginat lohna hong kilangsak nate hangin ka kisial bek hi.

³¹Topa Jesuh’ Pa Pasian in thupha ngah tawntung tahen. Amah in ka zuau hetloh lamtak a hong thei hi.

³²Damaskas khuapi sungah ka om laitakin Kumpi Aretas khutnuai-a gam ukpa in kei hong mattheih nadingin Damaskas khuakulh kongpi cingsak a,

³³ahi zongin kulh tawlet vang panin hong kikhaikhia suk ahih manin ama khutsung panin ka suakta hi.