Read Tedim Chin 2 KORIN NIHNA 12 Bible Online

2 KORIN NIHNA 12 - Tedim Chin bible

2 KORIN NIHNA 12

¹Bangmah phattuamnapi a om khollo ahi zongin ka kisialsial lai ding hi. Tu-in Topa in maang hong muhsakna le ka muhte ka hong gen ding hi.

²Tuma kum sawm le li hun lai-in vantung a dawl tungnung penah Khristian khat kilato hi. A pumpi taktak hiam, maangmu ahi hiam ka thei kei hi. Pasian in thei hi.

³Tua mipa pen Paradais-ah a om ahi hi. A pumpi taktak tawh ahi hiam, maangmu ahi hiam ka thei kei a, Pasian in thei hi.

⁴Mite kiangah genkhiatsawn dingin a kiphal lo a lamdang mahmah thu a za hi.

⁵Tua bang thu pen a kisialh taak mahmah thu hinapi-in ka kisialhpih kei hi. Kei a ginalo hinapi ama minthan nadingin Pasian in hong zang ahih manin tua thu pen a kisialh taak mahmah thu hinapi-in ka kisialhpih kei hi. Kei a ginalo hinapi ama minthan nadingin Pasian in hong zang ahih manin tua thu ka kisialhpih bek hi.

⁶Hih ka muh thu pen thuman ahih manin a kisialhpih hita leng zong mihai ka hi kei hi. Ahi zongin mite in keima sepna le keima genna a muh a zak banah a valin hong thupi ngaihsutkhak ding uh ut lo ka hih manin hih thu ka kisialhpih nuam kei hi.

⁷Ahi zongin hih a lamdang na tampite ka muhna hangin kisialin ka kisaktheih khak loh nadingin Satan’ sawltak bangin na a sem, keima pumpi sungah natna khat hong kipia ahih manin ka kisaktheih luat loh nadingin a hong kham hi.

⁸Tua natna tawh ka kipelh theih nadingin Topa kiangah thumvei tak thu ka ngen hi.

⁹Ahi zongin Topa in kei kiangah, “Na tha a nem ciangin keima vangliatna hat mahmah ahih manin nangma kisapna pen keima hehpihna hi bek hi,” ci-in hong dawng hi. Tua ahih manin keima sungah Khrih vangliatna hong omtheih nadingin lungdam takin ka thaneemna ka kisialhpih semsem hi.

¹⁰Kei ka thaneem mahmah laitakin a thahat mahmah suak ka hih manin Khrih hangin ka thaneemna, simmawh ka thuakna, haksatna, bawlsiatna le lungkhamna ka thuaknate tawh ka lung a kim mahmah hi.

¹¹Note in kei a hong pakta ding hinapi-in hong pakta lo na hih manun note’ bawlin mihai bangin kisialin ka gamta hi. Bang hang hiam cih leh kei pen bangmahpi ka hihloh hangin sawltak thupi mahmahin na ngaihsutte uh sangin themkhat zong ka neuzaw tuan het kei hi.

¹²Sawltak man taktak ka hihna lim a kilangsak nate, note lakah lungduai takin hong kisem a, lim, nalamdang, le na a tuamtuamte note lakah hong kibawl hi.

¹³Note lakah na ka sepna hangin huhna bangmah kong nget loh cih simloh, pawlpi dangte sangin kong hamsiatsak zawkna bangmah om het lo hi. Tua bangin note kiang panin bangmah kong nget lohna hangin midang tawh hong kibangsak lo suak ka hih manin, tua khialhna hong maisak ta un.

¹⁴Tu-in kong hawh nading pen a thumvei nading hita a, note’ gim nadingin bangmah ka hong ngen het kei ding hi. Keima deih pen note’ sumlepaite hi loin note mahmah na hi uh hi. A taktakin ci lehang, tate in nu le pate a huh ding hi lo a, nu le pate in tate a huh ding hizaw hi.

¹⁵Note ka hong huhtheih nadingin lungdamtakin ka neih khempeuh kong piaknop banah keima pumpi mahmah zong ka hong kipia nuam hi. Tuazah takin ka hong itna pen it lohna tengin hong nei zawsop ding na hi uh hiam?

¹⁶Sumlepai vai-in note themkhat zong ka hong gimsak hetlohna na theihsa uh ahi hi. Ahi zongin mi pawlkhatte in, kei pen ngian zangin khemna tawh a lamdang khatah sum tamzaw ka ngah nading a vaihawmin hong gen uh hi.

¹⁷Note kiangah ka hong paisak mite tungtawnin note kiang panin keima hamphat nading bang la ka hi hiam?

¹⁸Note kiangah Titus a hong pai nading ka hahsawl a, amah tawh a kithuah dingin thu upna sungah ka sanggampa uh zong ka hong paisak hi. Titus in nuamtaksa-in note tungah bang hong ngen zenzen ahi hiam? Kote in lungsim kibangin na semin ka kalsuanna zia uh zong a kibang hi lo ahi hiam?

¹⁹Note mai-ah ka mawhna uh a kiphelphel bang khatin na hong ngaihsut khak uhleh tua bang hi lo hi. Lawmte aw, ka hihna khempeuh uh note’ phattuam nading ka deihna uh tawh Khrih in kote’ gen ding a hong deih bangin Pasian’ mai-ah thu genin nasem ka hi uh hi.

²⁰Bang hang hiam cih leh note kiangah ka hong tun ciangin note’ omzia ding ka deih bangin na om loh khak ding uh le note in keima maisuah na muhnopzia bangun na hong muh loh khak ding uh ka lunghimawh hi. Note lakah kitotna, hazatna, hehna, huaihamna, mi zahpihna, mi gensiatna, kiphatsakna, le buaina a omkhak ding ka lunghimawh hi.

²¹Note kiangah ka hong tun ciangin a beisa hunah note tampi tak thangtatin, numei tawh mawhna, hukna, lannate hangin na khialhnate uh na kisik loh manun keimah dahin kapin, note’ muhna-ah ka Pasian in kei hong maizumsak khak ding ka lunghimawh mahmah hi.