Read Tedim Chin 2 KORIN NIHNA 13 Bible Online

2 KORIN NIHNA 13 - Tedim Chin bible

2 KORIN NIHNA 13

¹Tu-a ka hong pai nading pen a thumveina hita hi. Lai Siangtho sungah, “Mawhna a bawl khat peuhpeuh a thei mi nih le thum a om ciang bekin a mawh hi, ci-in kingaihsun pan ding hi,” ci-in a kigelh mah bangin tua bangin ka hong sem ding hi.

²A beisa hunah mawhna a gamtate le adangte khempeuh kiangah, a nihveina ka hong hawh lai-in keima kam tawh ka hong gen bangin tu-in zong lai tawh ka hong gelhnop thu in: Ka hong paikik ciangin kuamah hong zah nawn lo ding ka hih manin gim na thuak pelmawh ding uh hi.

³Khrih in keima tungtawnin thu hong gen taktak mah ahi hiam, ci-in theihtelna na deih uh mah bangin tu-in na deihdeih uh na theita ding uh hi. Note tungah amah in na hong sep ciangin hong dam hih hetloin khauhtakin hong hih ding hi.

⁴Bang hang hiam cih leh thaneemna hangin singlamteh tungah a kikhai ahi zongin a hinkikna pen Pasian’ vangliatna hang ahi hi. Amah tawh ka kipawl manun kote zong ka tha uh nem a, ahi zongin note tungah na ka hong sep uh ciangin Pasian’ vangliatna zangin ka hong semkhawm ding uh hi.

⁵Thu um taktak mah ihi hiam, ci-in nomau mahmah na ki-entel ciat un. Na ki-ettelna uhah a cingtaak lo na hih kei nak-uhleh note sungah Khrih om ahih manin thu phawk un.

⁶Na ki-ettel uh ciangin a cingtaak mi hikim dingin ka hong lamen hi.

⁷Kote in ka nasepna uh a tangtun zo lo tawh ka kibangkha uh ahi zongin, kote’ nasepna a tangtun ding deih hi lo zaw-in, note gamta khialkha loin a manin na gamtat nading uh ka deihna uh tawh thu ka hong ngetsakzaw uh hi.

⁸Bang hang hiam cih leh kote pen thuman nasepna a khaktan thei dingte hi loin a khan nadingin nasemte ka hi uh hi.

⁹Kote’ deih bulpi pen note na cingtaak theih nading uh ahih manin note’ thahat laitakin kote ka thaneemna uh zong ka nuam veve uh hi.

¹⁰Note’ siat nading hi loin note’ phattuam nadingin Topa in kei tungah a hong piak thuneihna pen note tungah khauhtakin ka hong zatkhak loh nadingin lai a hong gelh ka hi hi.

¹¹Sanggamte aw, tu-in mangpha na man un. Na omzia uh na kipuahpha-in ka hong thugente na zui unla, khatlekhat kithutuak kilem takin na om un. Itna le kilemna a piathei Pasian in note hong ompih tahen.

¹²Unau ki-itna tawh khatlekhat kihopihin na kinam un.

¹³Hih lai-a om Pasian’ mite khempeuh in note hong hopih uh hi.

¹⁴Topa Jesuh Khrih hong hehpihna thupha, le Pasian’ hong itna, le Kha Siangtho tawh kikholh theihna, note khempeuh tungah hong tung tahen.