Read Tedim Chin 2 KORIN NIHNA 2 Bible Online

2 KORIN NIHNA 2 - Tedim Chin bible

2 KORIN NIHNA 2

¹Tua ahih manin hong pai leng note’ dah nading hong piang ding ahih manin ka hong pai loh nadingin ka lungsim ka khensat hi.

²Kei a hong lungdamsak ding note ke’n hong dahsak leng, kei kua in hong lungdamsak nawn ding ahi hiam?

³Kei lungdam leng note khempeuh zong a lungdam ding na hihna uh teltakin thei ka hih manin, kei a hong lungdamsak ding note in kei’ dahna nong piansakkhak loh nading uh ka deihna tawh kei hong pai loin tua lai a hong gelh ka hi hi.

⁴Tua lai ka gelh laitakin, note’ dah nading piangsakkha loin note ka hong it mahmahna na phawk nading uh ka deihna tawh ka gelh hi a, lungkham sinkhamna le khitui naptui kai-in a gelh ka hi hi.

⁵Mi khatpeuh in heh nading a piansak ciangin kei bek a hong hehsak hi loin note khempeuh zong a hong hehsak ahi hi. Tua ahih manin tua bang mi tungah khauhtat lua nawn kei un.

⁶Note’ gimpiaknasa pen kicing khinzo ka sa hi.

⁷Tua ahih manin a mawhna maisak ta unla hehnemzaw un. Tua hikeileh dahlua-in siatlawh kha ding hi.

⁸Amah na itkik ding uh ka hong thumna thu zong amah na theisak un.

⁹Note in ze-etna bangzah ciang thuakzo-in, ka thugente na hong mangzo uh hiam cih ka theih nadingin tua lai a hong gelh ka hi hi.

¹⁰Note in mawhna na maisak uh ciangin kei zong a maisak ka hi hi. Mawhna maisak ding om ahihleh zong, mawhna ka maisak ciangin Khrih hang le note’ phattuam nadingin a maisak ka hi hi.

¹¹Mawhna maisak kei lehang Satan in nuamtaksa-in eite tungah hong gualzo kha ding ahih manin mawhna a maisak ihi hi. Satan’ nasepna zia a thei lo ihi kei hi.

¹²Khrih hangin lungdamna thu a hilh dingin Troas khua ka tun ciangin tua lai-ah nasep theih nadingin Topa in lampi hong honsakna thu ka mu hi.

¹³Ahi zongin tua lai-ah i sanggampa Titus na om lo ahih manin ka lungsim om thei nawn lo hi. Tua ahih manin tua lai-a om mite nusia-in Masedonia gamah ka paisuak hi.

¹⁴Ahi zongin Pasian tungah lungdam mahmah nading thu a om hi. Khrih tawh ka kipawlna hangun gualzawhna tawh Khrih a paina khempeuhah Pasian in kote hong zuisak hi. Mun khempeuhah paknamtui a kizelh bangin Khrih thu theihna a kizelsak dingin Pasian in kote hong zang hi.

¹⁵Hotkhiatna a ngah mite le a ngah lo mite lakah kote pen Khrih in Pasian tungah a piak paknamtui tawh ka kibang uh hi.

¹⁶Tua a nam pen, thu um lo mite a dingin mi a sisakthei a nam khauh mahmah hi a, hotkhiatna a ngah mite a dingin mi a hingsakthei a namtui mahmah ahi hi. Hih nasep a sem dingin kua kilawm ahi hiam?

¹⁷Ahi zongin kote pen, van gina tum lo a zuak mite tawh a kibang ahi, Pasian’ thu a gen mawkmawk midangte bang ka hi kei uh a, Pasian in a nasem dingin kote hong sawl ahih manin Khrih nasem hihna tawh ama mai-ah lungsim takpi tawh thugente ka hi uh hi.