Read Tedim Chin 2 KORIN NIHNA 3 Bible Online

2 KORIN NIHNA 3 - Tedim Chin bible

2 KORIN NIHNA 3

¹Hih bangin thu ka gen uh ciangin koleko a kiphattawm ka bang zel uh hiam? Midang pawlkhatte bangin note kiangah lah ding mihoih hihna lai ka kisam kei uh a, note in zong kote nong lah ding uh mihoih hihna lai a kisam na hi kei uh hi.

²Note mahmah pen mihoih ka hihna uh lah nadingin kote’ lai na hi uh a, mi khempeuh in simin a theih nadingun kote’ lungtang tungah a kigelh lai na hi uh hi.

³Hih lai pen Khrih mahmah in gelhin kote a hong puasak ahihna thu kitel mahmah hi. Laidal le suangpek tungah laitui le laikung tawh a kigelh hi lo a, mihing lungtang tungah a nungta Pasian Kha Siangtho tawh a kigelh ahi hi.

⁴Khrih hangin Pasian muang ka hih manun hih bangin a hong gen ka hi uh hi.

⁵Hih bang sepzawh nadingin kote in siamna nei ung a ci hi loin, sepzawh nading siamna pen Pasian hong piak ahi hi.

⁶Thuciamna thak nasem thei dingin kote tungah siamna a hong pia hi. Tua hong piakna pen lai-a kigelh thukham tawh hi loin Kha Siangtho tawh ahi hi. Bang hang hiam cih leh lai-a kigelh thukham in sihna piangsak a, ahi zongin Kha Siangtho in nuntakna hong pia hi.

⁷Thukham pen suangpek tungah a kigelh laimal hi a, a kipiak hunin Pasian’ minthanna tawh hong tonkhawm hi. Moses’ maitang a taang mahmah pen mualkhin tei napi-in, nak taanlua mahmah ahih manin Israel mite in Moses’ maitang en zo lo lai uh hi. Sihna a piangsak thei bek Thukham hong kipiak ciangin tuazah minthanna vangtaang tawh hong kizui ahihleh,

⁸nuntakna a pia Kha Siangtho nasepna bangzahin minthanna lian tawh hong kizuizaw kan ding ahi hiam?

⁹Mite mawhsakin thukhen nasepna-ah tuazahin minthanna vangtaang om ahihleh mite dik hi, ci-in genkhiat nasepna-ah a minthanna vangtaang lianzaw kan lai ding hi.

¹⁰Tuhunin a taang phazaw minthanna vang hong omta ahih manin nidangin minthangin a vangtaang mahmah i cih pen a bei hong suak mai hi.

¹¹Tawlkhat sung bek a kimang na in minthanna nei ahihleh a kip tawntung na in minthanna lianzaw nei kan ding hi.

¹²Hih bang lametna nei ka hih manun hangtakin a om ka hi uh hi.

¹³A maitang panin a vangtaang a beilam Israel mite in a muhkhak ding uh a deih lohna-in Moses in a maitang puan tawh a liah bangin a gamtate ka hi kei uh hi.

¹⁴Amaute’ lungsim khauh ahih manin tu dongin bangmah thei tuan loin om uh a, thuciamna lui laibu a sim uh ciangin puan tawh liah bangmahin bangmah mu thei lo, theithei lo uh hi. Bang hang hiam cih leh mi khatpeuh Khrih tawh a kipawl ciang bekin a muhtheih nadingin a kiliahna puan a kilakhia pan ahi hi.

¹⁵Tuhun dongin amaute in Moses Thukham laibu a sim uh ciangin liahna puan in a lungsim uh a liah lai hi.

¹⁶Ahi zongin Lai Siangtho in, “Topa’ mai-ah Moses a pai ciangin a kiliahna puan a lakhia hi,” a cih mah bangin Topa lamah mi khatpeuh a kihei ciangin a liah puan kilakhia hi.

¹⁷Hih lai munah Topa a cih pen Kha Siangtho hi a, Topa’ Kha Siangtho a omna mun peuhpeuhah suahtakna om hi.

¹⁸Tua ahih manin eite khempeuh i maitang hong kiliah nawn loin Topa’ minthanna vangtaang i kilangsak hi. Topa kiang panin a hong pai Kha Siangtho ahi tua minthanna vang in amah tawh a kibang dingin eite hong bawlpha a, minthanna khat panin minthanna sangzaw-ah hong omsak hi.