Read Tedim Chin 2 KORIN NIHNA 4 Bible Online

2 KORIN NIHNA 4 - Tedim Chin bible

2 KORIN NIHNA 4

¹Pasian in hong hehpihna tawh hih nasep hong pia ahih manin ka thaneem hetkei uh hi.

²Ka thuhilhna uhah mite khembawl loin, Pasian thu zong a man lopi-in ka gen kei uh a, tua bang a zumhuai simtham tatnate ka zang hetkei uh hi. Pasian muhna-ah a langtangin thuman takin ka gamta uh a, mi khempeuh a lungkim theih nadingin ka hanciam uh hi.

³Lungdamna thu ka hilhte uh kitel lo ahihleh zong siatna a thuak mite a’ ding bekin a kitel lo hi ding hi.

⁴Tua bang mite pen hih leitung pasian gilote in a lungsim mit uh tawsak ahih manin um lo uh a, Pasian tawh a kibang teekteek Khrih minthanna hangin amaute tungah a hong taang lungdamna thu khuavak mu thei lo uh hi.

⁵Bang hang hiam cih leh kote’ hilh thu pen komau’ thu hi lo a, Khrih Jesuh pen Topa ahi hi, ci-in a hilh ka hi uh a, kote pen Khrih hangin nomau’ na a semte ka hi uh hi.

⁶“Khuamial sung panin khuavak taang hen,” a ci Pasian mah in Jesuh’ maitang a taangsak Pasian’ vangliatna thu theih nading khuavak ka ngahtheih nadingun kote lungsim sungah khuavak hong taangsak hi.

⁷Ahi zongin vangliatna taktak Pasian a’ hi a, kote a’ hi lo hi, ci-in a kilat nadingin kha tawh kisai na manpha a nei kote pen na kikoihna leibeel tawh a kibang bek ka hi uh hi.

⁸Gimna ka tuah zelzel uh hangin ka si kei uh a, lunghihmawhna ka tuah zelzel uh hangin ka lungkia kei uh a,

⁹gal tampi ka neih uh hangin pawl ka kitasam ngei kei uh a, liamna baina ka tuah uh hangin ka si kei uh hi.

¹⁰Kote’ pum tung panin Jesuh’ nuntakna a kilat theih nadingin hih ka leitung pumpi nuntakna mahmah uhah zong Jesuh’ sihna bangmah ka thuak zelzel uh hi.

¹¹Tua ahih manin kote’ leitung pumpi-ah Jesuh Khrih nuntakna a kilat nadingin Jesuh hangin ka leitung nuntak sungun sih nading lauhuaina ka phukha tawntung uh hi.

¹²Tua ahih manin kote a dingin sih nading a kisepsep laitakin note’ nuntak nading a kisem niloh ahi hi.

¹³Lai Siangtho in, “Um ka hih manin ka gen hi,” a cih mah bangin kote in zong um ka hih uh manin a gen ka hi uh hi.

¹⁴Topa Jesuh a hingkik sakpa in Jesuh mah tawh kote zong hong hingkiksak khawmin note tawh ama omna-ah hong paipih khawm ding hi, ci-in ka thei uh hi.

¹⁵Hih thute khempeuh note a’ ding a kikhualna hi a, Pasian’ hehpihna in mi tam ban semsem leh mi a tam semsem mah in Pasian’ minthan nadingin lungdam ko-in thu ngen ding uh hi.

¹⁶Tua thu hangin ka lungkia tuan kei uh hi. Kote’ leitung pumpi in damdamin muatlam ding a manawh ahi zongin ka kha nuntakna uh a nini-in thaksuak semsem hi.

¹⁷Tuhun laitakin tomno sung lungkhamna ka thuakte uh in ka thuakna uh sangin nakpitakin a lianzaw tawntung minthanna sung hong tunpih ding hi.

¹⁸Bang hang hiam cih leh a kimuthei nate a mitsuan ka hi kei uh a, a kimu thei lo nate a mitsuan ka hi uh hi. A kimuthei nate tomno sung bek kimang a, a kimu thei lo nate a tawntungin a kip ahi hi.