Read Tedim Chin 2 KORIN NIHNA 7 Bible Online

2 KORIN NIHNA 7 - Tedim Chin bible

2 KORIN NIHNA 7

¹Tua ahih manin ka hong it lawmte aw, pumpi le lungsim a ninsak theite khempeuh panin kisiansuahin, Pasian zahtakna tawh nungta-in siangtho sinsenin om ni.

²Kuama tungah kote hong khial lo, kuamah hong siasak lo, noptaksa-in kuama tungah hong gamta lo ka hih manun na lungsim uh hong pia un.

³Hih bang ka hong cih ciangin note mawhsak nopna tawh thu a hong gen ka hi kei hi. Bang hang hiam cih leh ka hong gensa mah bangin note hong it mahmah ka hih manun note na hin uhleh hingkhawm, na sih uhleh zong a sikhawm ngam ka hi uh hi.

⁴Note hong muang mahmahin note hangin ka kisathei a, lungkhamna a tuamtuam ka tuah hangin lunghimawh loin ka lungnuam mahmah hi.

⁵Masedonia gam ka tunkhit uh ciang nangawnin tawldam cih om thei tuan lo a, a koimah peuhah kitotna le lungkhamna om kawikawi ahih manin lungsim patauhna hi tawntung hi.

⁶Ahi zongin a lungkia mite a hanthawn Pasian in Titus hong tunna tawh kote hong thakhauhsak hi.

⁷Ama hong tunna hang bek zong hi loin ama lungsim a thahat nadingin note’ gamtatna zong a hong zasak hi. Note in kei na hong muhnopna thu uh, note na dahna thu uhleh kei na hong hutnopna thu uh hong gen ahih manin ka lung a dam semsem hi.

⁸Ka hong laigelhna in note tawlkhat sung a hong dahsak manin ka lungsim nuam lo ahi tei ta zongin tua ka hong laigelhna hangin ka kisik kei hi.

⁹Bang hang hiam cih leh tu-in ka lung a dam hi. Note ka hong dahsak khakna hangin a lungdam hi loin note na dahna hangun na ngaihsutna uh kheel thei na hih manun a nuam ka hi hi. Tua na dahna uh Pasian in a hoihlamin hong zang ahih manin note a dingin siatna a hong piangsak ka hi kei zaw uh hi.

¹⁰Tua na dahna uh hotkhiatna ngahtheih nadingin na lungsim uh na kheel nadingun Pasian in hong zang ahih manin dah nading bangmah om lo hi. Ahi zongin hih leitung dahna lelte in ahihleh sihna piangsak hi.

¹¹Hih note’ dahna pen Pasian in a hoihlamin hong zatsak ahih manin mawk om nawn loin lungsim takpi tawh kinna na nei uh a, hoih lo hi, ci-in ka hong gente lunghimawhin siansak nopna lungsim na nei uh hi. A thupiangsate hangin lau-in lunghimawhin a hoih lote gim na pianuam uh hi. Hih thu khempeuhah note na paubaan nading uh a om lo hong suaksak hi.

¹²Tua bangin lai ka hong gelh hangin a khial pa ahih kei leh a thuak pa ngaihsutna tawh hong gelh hi lo zaw-in, Pasian’ thu sungah kote’ thu bangzahin na hong mang uh hiam cih a kitheih nadingin a hong gelh ka hizaw uh hi.

¹³Tua ahih manin tu-in ka lung uh nuam mahmah hi. Kote’ lungsim hong nuamsak bek hi loin, Titus lungsim a noptheihna dingin ama tungah na gamta na hih manun ama lungdamna in zong kote’ lungdamna hong behlapto sawnsawn hi.

¹⁴Titus mai-ah note ka hong kisialhpih ngei a, note in ka kisialhna thu-ah kei na hong zahhuaisak kei uh hi. Note tungah thuman bekbek a hong gen ka hih mah bangun Titus tungah ka kisialhna uh zong a kisial khial ka hihlohna uh hong kilang hi.

¹⁵Note in ama thu mangin, launa le linna tawh amah na zindona uh a ngaihsut ciangin Titus in note hong itna khang semsem hi.

¹⁶Note hong muang mahmah ka hih manin ka lungsim a nuam hi.