Read Tedim Chin 2 KORIN NIHNA 8 Bible Online

2 KORIN NIHNA 8 - Tedim Chin bible

2 KORIN NIHNA 8

¹Sanggamte aw, Masedonia gam pawpite-ah Pasian’ hehpihna hangin a piang thute ka hong theisak nuam uh hi.

²Amaute in haksatna a tuamtuam phukha-in nakpitakin ze-etna thuakin, amaute zawng mahmah hita se le-uh lungdam mahmah uh ahih manin piakna lamsangah cingh thei mahmah uh hi.

³Amaute in amau ngahna tawh kituak bekin a pia hi loin, a piak zawhzah dingun a kilawm sangin a tamzaw a piakna uh ka thei taktak uh hi. Kuama sawl hi loin amau lungsimah a uttawmna uh tawh,

⁴Judea gam a Pasian mite, ko zong hong huh sak un, ci-in hong thumthum uh hi.

⁵Hih bangin a gamtatna uh kote’ lamet sangin sangzaw pek hi. Amaute pen Topa tungah kipia masa uh a, tua ciangin Pasian’ deihna bangin kote tungah zong a hong kipia uh ahi hi.

⁶Tua mah bangin Titus in zong hih bang nasep nading hong pat khit ahih mah bangin midang huh nading na sepnate uh note lakah hong zawhpih vet dingin ka hanthawn uh hi.

⁷Note pen thu upna, thugenna, thutheihna, midang huh ding lawpna, le kote nong itna uh a kipanin na khempeuhah midang sangin ginazaw na hih mah bangun midang huh nading hih nasepna-ah zong na cingh mahmah ta un.

⁸Hih bang ka hong gen ciangin thupiakna tawh a hong gen hi loin, midangte in tua zahin mi huh nading kin ahihleh note in zong midang na itna uh bangzah taktak ahi hiam, ci-in ka theihnopna ahi hi.

⁹Bang hang hiam cih leh i Topa Jesuh zong hau mahmah napi-in ama zawnna tawh note mihau na suahtheih nadingun note’ hangin mizawngin hong kibawl ahih manin i Topa Jesuh Khrih hong itna bangzah takin lian hiam, cih thu na thei uh hi.

¹⁰Hih thu tawh kisai-in keima ngaihsutna panin: Note in ni kumin hih bang nasep ding utna lungsim a nei bek hi loin a pankhia masate na hih uh mah bangin na tangtut ding uh hoihpen hi.

¹¹Tua ahih manin na patsa uh thu a bei dongin zomsuak unla, na geelsa uh na tangtunsak theih nadingun na neihsa uh tawh lawptakin na sem un.

¹²Piaknopna lungsim na neih nak-uhleh na neih lohnate uh siksan hi loin na neihna uh tawh kizui-in na piak uh Pasian in hong sang ding hi.

¹³Hih bangin ka hong gen ciangin midangte in noptuamna a ngah nadingin note in haksapi-in tuam gimpih ding ka cihna hi lo hi.

¹⁴Tu laitakin note cithei na hih manun amau cihmawhnate-ah huh le-uhcin, note in haksat na tuah hun uh ciangin zong amaute in hong huh ding uh ahih manin note khatlekhat na kihuh diamdiam ding uh ka deihna ahi hi.

¹⁵Bang hang hiam cih leh Lai Siangtho in zong, “An tampi a lapa in an hau lua tuan lo a, tawmno a lapa zong zawng lua tuan lo hi,” na ci hi.

¹⁶Kote’ hong kin zahin Titus in note hong kin nadingin Pasian in lungsim guan ahih manin Pasian tungah ka nuam mahmah uh hi.

¹⁷Amah in kote hong sawlna a hong mang ciang bek hi loin, amah in note huhnopna lungsim neitawm ahih manin note kiangah pai ding hong ngaihsun hi.

¹⁸Lungdamna thuhilh nasepna-ah pawlpi khempeuh in a zahtak mahmah, thu upna sungah ka sanggampa uh tawh zong ka hong kithuahsak uh hi.

¹⁹Tua tham loin, Pasian’ minthan nading le midangte ka huhnopna uh a kilat nadingin hih bangin mi huh nading vaihawmin ka khualzinna peuh uhah a hong zui dingin pawlpite in teelin a seh pa uh zong ahi hi.

²⁰Citna tawh mi huh nadingin a kipia hih sum ka zeekna uh tawh kisai-in mi a phunkhak loh nadingun a kidawm mahmah ka hi uh hi.

²¹Bang hang hiam cih leh Topa’ hoihsak ding bek hi loin mite in zong hoih a sak ding bangin na a semnuam ka hi uh hi.

²²Amau tegel tawh hong kithuah dingin thu upna sungah ka sanggam uh adang khat tawh zong ka hong tonsak uh hi. Amah pen na khempeuhah thuman mahmah hi, ci-in ka theih khitsa uh hi a, note hong muan mahmahna hangin note hong huh ding a lawpna khang semsem hi.

²³Titus ahihleh note a’ ding ka nasepna-ah ka kikholhpih ka naseppih mi hi a, amah tawh hong kithuah ka sanggam tegel uh ahihleh pawlpite’ tang hi uh a, Khrih’ min a thangsakte ahi uh hi.

²⁴Tua ahih manin note ka hong kisialhpihna uhah a kisial khial ka suah loh nading uh le pawlpi khempeuh in a theihtel nadingun hih ka sanggamte uh limtakin na limbawl un.