Read Tedim Chin GALATI 4 Bible Online

GALATI 4 - Tedim Chin bible

GALATI 4

¹Ahi zongin gamhluah ding tapa in a pa’ neihsa khempeuh a luah ding hinapi-in a neulai hun sungteng silate mah bangin bangmah thu nei lo hi.

²A pa in ama gamhluah dingteng a piakma, a neulai hun sungteng, midang in tua naupang kemin a vai ding a hawmsak hi.

³Tua mah bangin eite zong kha thu-ah i neulai hun sungteng huihlak a uk vangneite’ khutnuai-ah a om ihi hi.

⁴Ahi zongin a hun a cin ciangin eite khempeuh Pasian’ tate i suahtheih nadingin Thukham nuai-ah a om mite a hong tankhia dingin Pasian in a Tapa hong paisak a, tua Tapa pen leitung ngeina bangin numei sung panin hong suakin, Jew Thukham sungah hong nungta hi.

⁶Note pen ama tate na hihna uh a hong lah nadingin Pasian in ama Tapa’ Kha Siangtho, eite sungah hong tumsak a, tua Kha Siangtho in Pasian pen, “Pa aw, pa aw,” hong cisak hi.

⁷Tua ahih manin note pen sila hi nawn loin Pasian’ tate na hih manun Pasian in ama tate a dingin a koih khempeuh, note tungah hong pia ding hi.

⁸A beisa hunah Pasian thei lo na hih manun Pasian ahi lo vangliatna a neite’ sila-in na om uh hi.

⁹Ahi zongin note in tu-in Pasian meltheih khinin, tua ahih kei leh Pasian in note hong meltheih khinta ahih manin, a bang hangin bangmah a hih zo lo, a ginalo tua bangte lamah kiheikik nuam a, sila va suakkik nuam na hi uh hiam?

¹⁰Note in nite, khate, hunte, kumte a kipan pawi tuamtuamte limtakin tan ding na hah ngaihsut mahmah uh hi.

¹¹Tua ahih manin note a dingin ka nasepna khempeuh a mawkna a suahkhak ding ka hong lunghihmawhsak mahmah hi.

¹²Sanggamte aw, Thukham thu tawh kisai-in note’ gamtat bangin ka hong gamtat mah bangin kei’ gamtat mah bangin na hong gamtat ding uh ka hong thum hi. A beisa hunah kei tungah na hong gamta khial nai kei uh hi.

¹³Note kiangah lungdamna thu hilh ding ka hong kipatna pen ka pumpi cidam lohna hang ahihna thu na theihsa uh ahi hi.

¹⁴Ka pumpi cidam lohna pen note a dingin thu haksapi hinapi-in kei na hong simmawhbawl tuan kei uh a, zong na hong nolh tuan kei uh hi. Vantung panin a hong pai vantungmi zin do bang le Khrih Jesuh mahmah zin a do bangin na hong limbawl uh hi.

¹⁵Tua hun laitakin lungdam mahmah napi-in tu-in a bangci ta na hi uh hiam? A hithei khat hileh, tua hunin na mittang nangawn uh khelkhia-in kei a hong pianuamte na hihna uh teltakin ka thei hi.

¹⁶Note kiangah thuman ka hong genna hangin kei a hong galbawl na hi uh hiam?

¹⁷Tua mi pawlkhatte in note hong engin hong kin mahmah uh hi; ahi zongin amaute’ ngimna a hoih hi khol lo hi. Amaute’ hong kin bangin note in zong amaute kinin na kipawl theih nadingun kei kiang panin note a hong khenkhia nuam ahi lel uh hi.

¹⁸Ngimna hoih nei ahih nak-uhleh note’ phattuam nading kinna pen note tawh ka hong omkhawm sung bek hi loin, a tawntungin kin ding a hoih ahi hi.

¹⁹Taneute aw, note in Khrih’ pianzia bang na neih dong uh, naupaii nupi in ta a suah ding a gimpih bangin note ka hong lunggimpih ding hi.

²⁰Note in ka maisuah na muhtheih nadingun hithei hileh note tawh ka omkhawm nuam mahmah hi. Tu-in note ka hong lunghimawh mahmah hi.

²¹Thukham nuai-ah a omnuam mite aw, Thukham in a gen thu a tel taktak mah na hi uh hiam?

²²Lai Siangtho sungah hih bangin na kigelh hi: Abraham in tapa nih nei a, khat pen a zi’ silanu tawh a neih a tapa hi a, a khat pen a zi tawh a neih a tapa ahi hi.

²³Silanu tawh a neih a tapa pen leitung ngeina bangin a suak mawkmawk hi a, ahi zongin a zi tawh a neih a tapa pen Pasian’ thuciamna tawh kizui-in a suak ahi hi.

²⁴Hihte pen gentehna lim ahi hi. Hih nupi nihte pen thuciamna nam nih a lahna ahi hi. Sila a suak tate a hingkhia nu Hagar hi a, Sinai Mual tunga kipia thuciamna a lahnopna ahi hi.

²⁵Arabia gam a om Sinai Mual lim ahi Hagar pen tu laitakin a mite tawh salin a om Jerusalem khuapi a cihnopna ahi hi.

²⁶Ahi zongin vantung Jerusalem pen sal hi lo a, eite’ pianna nu ahi hi.

²⁷Bang hang hiam cih leh Lai Siangtho sungah, “A ciing nupi aw, lungdam in. Nausuah natna a thei ngei lo nupi aw, nuamin kiko in. Bang hang hiam cih leh a pasal in a nusiat nupi in a pasal tawh a om tawntung nupi sangin ta hauzaw ding hi,” ci-in na kigelh hi.

²⁸Tu-in eite zong, Isaac mah bangin Pasian’ thuciamna hangin a piang tate ihi hi.

²⁹Tua hun laitakin leitung ngeina bangin a piang mawkmawk tapa in Pasian Kha Siangtho hangin a piang tapa a bawlsiat mah bangin, tuhunin zong eite hong kibawlsia hi.

³⁰Ahi zongin Lai Siangtho sungah, “Sila numei’ tapa in sila ahi lo numei’ tapa tawh gamh luahkhawm thei lo ding ahih manin, sila numei le a tapa hawlkhia in,” na kici hi.

³¹Tua ahih manin sanggamte aw, eite pen sila numei’ tate ihi kei a, sila ahi lo numei’ tate ihi hi.