Read Tedim Chin GALATI 5 Bible Online

GALATI 5 - Tedim Chin bible

GALATI 5

¹Khrih in eite hong khahkhiat khitna hangin mi suaktate hi khinta ihih manin tua suahtakna thu-ah kipin om unla, sila va suakkik nawn kei un.

²Tu-in keimah Paul in ka hong gen ding thu limtakin na ngai un: Note in vun-atna na zat uhleh note a dingin Khrih’ nasepna a kimanna a om het lo ahi hi.

³Vun-atna a zang mi khempeuh in Thukham dang khempeuh zong a vekpi-in a zuih ding a tavuan ahihna thu teltakin phawk ta uh hen.

⁴Thukham zuihna hangin Pasian tawh kipawl theih nading a hanciamte pen Khrih tawh a kikhen na hi uh a, Pasian’ hehpihna in note hong huam thei lo hi.

⁵Kote ahihleh Pasian in amah tawh a kipawlthei dingin hong bawl ding hi, ci-in lamenin, kote’ upna hangin Kha Siangtho’ vangliatna tawh hong piang ding hi, ci-in a om ka hi uh hi.

⁶Bang hang hiam cih leh Jesuh Khrih tawh i kipawl ciangin vun-atna le vun-at lohna a thupi tuan om lo a, Khrih i upna hangin midangte i itna a thupi hi bek hi.

⁷A beisa hunah hoihtakin a gamtate na hi uh hi. Tu-in a manin na gamtat loh nadingun kua in lam hong pialsakin Pasian’ thu hong mang losak ahi hiam?

⁸Note a hong sam Pasian in note na pial nadingun hong zolkhia het lo ding hi.

⁹Silngo themno khat in annel lom buppi tawk thei hi, na kici hi.

¹⁰Eite, Topa tawh a kipawl khawmte ihih manin kei tawh a kilamdangin note in bangmah ngaihsut tuam nei het lo ding, ci-in ka hong muang a, a kua a kua hitaleh note hong nawngkaisakte pen Pasian in gim pia ding hi, ci-in ka um hi.

¹¹Sanggamte aw, vun-atna kisam hi, ci-in a hilh lai hi leng, bang hangin bawlsiatna thuak zenzen ding ka hi hiam? Tua bangin thu a hilh hi leng, singlamteh tunga Khrih’ sihna thu ka hilhna hangin bangmah buaina a om kei ding hi.

¹²No hong lungkhamsak mite in a maban uh nawtsuak uh hen la, a ut leh a pasal nateng nangawn uh atkhia mangkhin vet uh hen!

¹³Sanggamte aw, note ahihleh a suakta mi ahi dingin Pasian in a hong sap ahi hi. Ahi zongin tua suahtakna pen na pumpi uh ut bangbangin gamtat theih nadingin paulam zonna-in nei kei unla, itna tawh khatlekhat kikhualna-in zangzaw un.

¹⁴Bang hang hiam cih leh Thukham khempeuh thu khatin kigawm thei a, “Nangmah na ki-it bangin na vengte na it in,” cihna tawh kitomlak thei hi.

¹⁵Ahi zongin note pen gamsa bangin khatlekhat kiphuai-in kipetkha le-uhcin na vekpi-un na siatlawhkhak ding uh lauhuai ahih manin hoihtakin na kidawm un.

¹⁶Note kiangah ka hong gen thu in: Kha Siangtho’ hong sawlna bangin gamta unla, na pumpi uh utna bangin gamta kei un.

¹⁷Bang hang hiam cih leh ei’ pumpi ut bangin gamta lehang Kha Siangtho’ deihna tawh na kituak lo a, Kha Siangtho’ deihna bangin gamta lehang ei’ pumpi deihna tawh na kituak lo zel ahih manin hih nih tegel a kilangpang niloh na hi a, note’ ut bangin a gamta thei lo na hi uh hi.

¹⁸Kha Siangtho’ deihna bangin na gamtat uhleh Thukham khutnuai-ah na om nawn kei uh hi.

¹⁹Tu-in mihing pianzia hong kitel a, tuate pen: Numei tawh mawhna, thangtatna, lanluat mana khialhna,

²⁰milim biakna, mi bumna, kilangbawlna, kitotna, hazatna, hehna, huaihamna, kikhenna, pawltuam lungsim neihna,

²¹enna, zukhamna le biakna pawi-ah zukhamna a kipan adangdangte ahi hi. A beisa hunah ka hong hilhkholhsa bangin tu-in ka hong genkikin-ah: Hih bangin a gamta mite pen Pasian’ Ukna sungah omkha het lo ding hi.

²²Ahi zongin Kha Siangtho’ sawlna bangin gamtatnate pen: Itna, lungdamna, lungnopna, lungduaina, migitna, hoihna, cihtakna,

²³dikna le pumpi ki-ukzawhna hi a, hih bangin a gamta mite, Thukham in bangmah cih thei lo hi.

²⁴Tua hi a, Jesuh Khrih a zui mite in a leitung lungsim pianzia uh le a leitung lungsim deihna khempeuh uh a phiat khitsa ahi hi.

²⁵Kha Siangtho in eite hong nungtasak khinta ahih manin ama hong sawlna bangin eite a nungta ding ihi hi.

²⁶Kuamah kiphasak loin, khatlekhat kiphin loin, kuamah i kihaza kei ding hi.